Panangiparang ti Naimbag a Damag—Babaen ti Saot’ Dios a Libro
1 Iti suratna iti padana nga ebanghelisador, ni apostol Pablo insuratna: “Amin a Kasuratan impalting ti Dios ket naimbag a pakasursuruan, pakatinggaran, pakababalawan, ken pakadisiplinaan iti kinalinteg.”—2 Tim. 3:16.
2 Kas moderno-aldaw a manangibunannag iti naimbag a damag, pattientayo daytoy a teksto iti amin a pusotayo. Akseptarentayo ti Biblia a napaltiingan a Sao ti Dios. Abrasaentayo ti panangigiyana iti tunggal aspeto ti biagtayo. (Sal. 119:105; Juan 17:17) Ngem kasano a matulongantayo dagiti dadduma a mangawat iti Biblia bilang Sao ti Dios ket iyaplikarda met dagiti prinsipiona iti inaldaw a panagbiagda?
NO KASANO TI PANANGARAMID ITI DAYTA
3 Kabayatan a makipaspasettayo iti damo a panangiwaras iti daytoy baro a libro a Ti Biblia—Saot’ Dios wenno iti Tao? iti bulan ti Nobiembre, iparparegtatayo ti panagtalek iti Biblia ken tultulongantayo dagiti tattao a makakita kadagiti benepisio ti panagbiag a maitunos kadagiti naipaltiing a balakad. Anian a pribilehionto daytoy!
4 Ania ti mabalin nga ibagatayo no itukontayo ti libro? Kalpasan ti nainggayyeman a kablaaw, mabalin nga iturong ti atension ti bumalay idiay Proverbio 14:12 tapno ipakita kenkuana a ti naballigi a panagbiag kasapulanna ti masirib a pannakaiwanwan. Iti saan nga umiso a pannakiwanwan agturong iti pannakadadael. Kalpasanna basaem ti Proverbio 2:6, 7 tapno ipakita a ni Jehova mangipaay iti pudno a sirib. Makirinnasontayo idiay bumalay maipapan ti pannakasapul nga agturongtayo iti Biblia tapno masarakan ti nadiosan a sirib. Kalpasanna kunaentayo: “Daytoy a publikasion ipakitana a ti Biblia ket maysa a mapagtalkan a gubuayan ti umiso a balakad kadagiti problema a maipaspasango kadagiti tattao. Pangngaasiyo ta kitaenyo ti naimaldit ditoy parapo 2 ditoy panid 5. [Basaem ti parapo 2, ket no ipalubos ti tiempo, basaem ti parapo 4.] Daytoy a publikasion tulongannaka a mangapresiar a ti Biblia talaga a Saot’ Dios ken linaonna dagiti praktikal a giya kadagiti amin a bambanag iti biag. Daytoy a libro kukuamon iti kontribusion a ₱16.00 laeng.”
5 Daydiay bumalay mabalin nga agparang nga adu ti tamtamingenna wenno ibagana nga isut’ saan nga interesado, a saanna a tarigagayan ti atiddog a tungtongan. Tapno makaaramid ti ababa a presentasion, mabalin a kunaem: “Awan panagduadua nga umanamongka kaniak no ibagak kenka a nagadu la unay dagiti problema a sangsanguen ti sangatauan ita.” Kalpasanna basaem ti umuna a parapo iti kapitulo 1. Kalpasan nga agkomento ti bumalay idiay kamaudianan a saludsod iti isu met laeng a parapo, mabalin a kunaem: “Ti Biblia ibagbagana kadatayo nga iti asideg la unayen a masanguanan ti Dios solbarennanto dagiti amin a makariribuk a problema ti sangatauan. Daytoy a libro mangipaay ti nabileg nga ebidensia a mangipakpakita a ti Biblia ket pudno, gapu ta daytat’ Sao ti Dios saan nga iti tao. Kayatko a maaddaankayo iti daytoy a libro babaen ti kontribusion a ₱16.00 laeng.”
PANANGPUNNO TI KASAPULAN
6 Daytoy a baro a libro, Ti Biblia—Saot’ Dios wenno iti Tao? tulonganna dagiti napasnek a managbasa a mangtarus ken mangapresiar a ti Biblia ket pudno a Saot’ Dios. Ti napudno a panangkonsiderar iti ibagbagana mabalin nga isut’ mangirugi kadakuada a mangsurot iti dana ti biag. Gapuna, mangaramidtayo ti espesial a panagregget a mangipaima iti daytoy a libro kadagiti amin a kabaelantayo a makatungtong. Aramidentayo ti kasasaknapan a panangiwaras iti daytoy a libro aniaman ti ipalubos ti kasasaadtayo.