Panangiparang iti Naimbag a Damag a Buyogen ti Positibo a Kababalin
1 Kayattay amin ti makasarak iti rag-o iti aramidtayo, nangruna iti trabaho a panagaramid iti adalan. Ania ti mangyeg kadatayo iti kasta a pannakapnek? Mangrugi dayta iti panangsalimetmet iti positibo a panagpampanunot no tultulongantayo dagiti sabsabali. (Prov. 11:25) Ti wagastayo a mangiparang iti naimbag a damag ipakitana koma a pudno a patientayo ti ibagbagatayo. No naimpusuan ti panagsaotayo, maanninaw ti kinapasnek ken pammatitayo. (Luc. 6:45) No ensaywentayo ti presentasiontayo, napigpigsa ti nakemtayo a makisarita kadagiti tattao. Matulongannatayo daytoy nangruna iti Setiembre a mangitukon iti libro a Life—How Did It Get Here? By Evolution or by Creation? Mabalin a masarakanyo a makatulong dagiti sumaganad a singasing.
2 No itukonyo ti libro a “Creation,” mabalinyo nga ibaga daytoy iti damo nga isasarungkaryo:
◼ “Iti pannakisaomi kadagiti kaarrubatayo, nasarakanmi nga addaan dagiti dadduma iti panagtalek iti Dios. Dagiti dadduma marigatanda a mamati kenkuana. Ania ti makunayo? [Palubosanyo a sumungbat.] Imutektekanyo no ania ti kuna ti Biblia maipapan itoy a banag. [Basaenyo ti Roma 1:20.] Makitatayo ti pammaneknek ‘ti agnanayon a pannakabalin ken kina-Dios’ ti Dios babaen ti panangimatang kadagiti bambanag a pinarsuana.” Basaenyo ti maudi a parapo iti panid 48 ti libro a Creation, sayo iturong ti atension iti kinarikut ti sibibiag a selula. Wenno usarenyo ti parapo 18 iti panid 147 a mangipakita no kasano nga itampok ti nakaskasdaaw a circulatory system ti maysa a kayo ti aramid ti Namarsua. Itukonyo ti libro sayo iyurnos ti panagsubliyo.
3 No sarungkaranyo dagidiay nakasaritayo maipapan iti kina-Namarsua ti Dios, nalabit a kayatyo nga ibaga daytoy:
◼ “Iti napalabas nga isasarungkarko, nagsaritaantayo ti maipapan iti pammaneknek ti kaadda ti Dios—dagiti nakaskasdaaw a parsuana. Narigatyo kadi a patien a maseknan met iti masakbayantayo Daydiay namarsua iti uniberso? [Palubosanyo a sumungbat.] Makapainteres a maammuan a naikeddengen ti Namarsua ti masanguanan.” Basaenyo ti Isaias 46:9, 10. Depende iti interes daydiay tao, usarenyo dagiti ladawan ken kapsion iti kapitulo 19 iti libro a Creation a mangitampok iti nagsayaat a kasasaad nga inkari ti Dios. Basaenyo ti parapo 1 ti kapitulo 20, sayo itukon ti panagadal iti Biblia. No maawat, irugiyo ti panagadal iti libro a Pannakaammo.
4 Mabalinyo nga ipadas daytoy a presentasion no itukonyo ti libro a “Creation”:
◼ “Iti pannakisaok kadagiti kaarrubayo, napaliiwko nga il-iliwen ti kaaduan ti natalged a komunidad ken natalna a lubong. Apay ngata a napaay ti tao a mangragpat iti kasta a kasasaad? [Palubosanyo a sumungbat.] Mabalin a napasnek ken adda naimbag a maar-aramidan dagiti dadduma a panguluen, ngem imutektekanyo ti ibalakad ti Biblia.” Basaenyo ti Salmo 146:3, 4; kalpasanna isaludsodyo: “Adda kadi asinoman a makapennek kadagiti kasapulan ti tao?” Basaenyo ti bersikulo 5 ken 6. Ipakitayo ti ladawan iti panid 251 iti libro a Creation, ken iturongyo ti atension kadagiti gunggona nga iyeg ti turay ti Dios. Itukonyo ti libro.
5 No ti panagturay ti Dios ti napagsaritaanyo idi damo, mabalinyo nga ipadas daytoy a singasing no agsarungkarkayo:
◼ “Idi addaak ditoy sumagmamano nga aldawen ti napalabas, napagsaritaantayo ti pannakapaay ti tao a mangyeg iti talna ditoy daga. Nalabit a malagipyo ti rason nga inted ti Biblia iti kasta a pannakapaay. [Basaenyo manen ti Salmo 146:3.] Nasiputanyo kadi no apay nga imbalakad ti Dios a ditay isaad ti namnamatayo kadagiti tattao? [Palubosanyo a sumungbat.] Nalabit nga umanamongkayo nga agtaud iti Dios ti aniaman a namnama iti manayon a solusion. Nailawlawag iti Salmo 146:10 ti rason a mabalintay ti maaddaan iti kastoy a panagtalek. [Basaenyo.] No kayattayo ti agbalin nga iturayan ti Pagarian ti Dios, ania ti masapul nga aramidentayo?” Ukradenyo ti libro a Creation iti panid 250, basaenyo ti parapo 13, ken ilawlawagyo ti Juan 17:3. Ibagayo a kayatyo nga idemostra no kasano ti pananggun-od iti pannakaammo a mangiturong iti biag nga agnanayon. No maipalubos, ipakitayo ti libro a Pannakaammo ken irugiyo ti panagadal.
6 Iti panagtrabaho kadagiti tiendaan, mabalinyo nga usaren daytoy ababa a wagas ti panangitukon iti libro a “Creation”:
◼ “Ita nga aldaw mangipapaaykami iti naidumduma a serbisio kadagiti negosiante iti daytoy a komunidad. Maseknantayo amin iti ilalanlan ti krimen ken kinaranggas iti lugartayo. Iti panagkunayo, adda kadi makaipaay iti napaypayso a solusion iti daytoy a parikut? [Palubosanyo a sumungbat.] Addaan ti Dios iti solusion.” Ukradenyo ti panid 196 ti libro a Creation; basaen ken komentuanyo ti Proverbio 2:21, 22 iti parapo 19. Ipakitayo ti paulo ti kapitulo 16, sayo itukon ti libro.
7 No agsarungkarkayo iti maysa a negosiante a napaimaanyo iti libro a “Creation,” mabalinyo nga ibaga daytoy:
◼ “Iti napalabas nga isasarungkarko, nadakamatko a ti Dios laeng ti addaan iti manayon a solusion iti krimen ken kinaranggas. Sigun iti karina, makapagtalektayo nga addanto natalna a daga. Imutektekanyo ti pagpilian a naidatag iti tunggal maysa kadatayo.” Basaenyo ti parapo 11 iti panid 250 ti libro a Creation, agraman Salmo 37:37, 38. Komentuanyo ti ladawan iti panid 251, ken basaenyo ti umuna a sasao ti parapo 14. Itukonyo ti libre a panagadal iti Biblia, a maaramid iti mismo a panggedan wenno pagtaenganda.
8 Kas “katrabahuan ti Dios,” adda panggapuantayo nga agbalin a positibo a mangiparang iti naimbag a damag. (1 Cor. 3:9) Ti panangsalimetmettayo iti daytoy a kababalin agresulta iti nabaknang a pammendision ni Jehova.