Panagsubli a Mangpabara ti Interes iti Biblia
1 No dadduma masabet dagiti tattao idiay tay-ak ti serbisio a mangipakita iti interes maipapan ti naimbag a damag ngem kupadoda unay a makisao kadatayo no mapantayo kadakuada. Padasentayo kadi ti sumubli iti sabali a tiempo tapno iraman ti kinapudno kadakuada? Wenno nalabit nga adda makapainteres a saritaantayo iti bumalay, ngem saan nga immawat ti literatura. Agsublitayo aya a makisao manen kadakuada?
2 Nasken unay a sarunuen ti amin nga interes a masarakantayo. Agsarungkartayo laeng aya kadagidiay umawat ti literatura? No kasta, nalabit a malab-awantayo dagiti dadduma nga interesado a tattao. Sigurado a ditay kayat nga ukomen iti maysa a tao a kas saan a maikari gapu ta saan nga immawat iti literatura. (Maidilig iti Roma 14:4.) Nalabit a kalpasan iti ipapantayo, mabalin a ti bumalay ket pinanunotna no ania daydiay nakunatayo kenkuana ket lalo pay a dumngeg inton agsublitayo.
3 No agsublikayo iti maysa a tao a kupado idi, mabalinyo a kunaen:
◼ “Maragsakanak a makakita manen kadakayo. Idi napalabas a kaaddak ditoy, saantayo a makapagsao agsipud ta awan ti tiempoyo. Makitak a maysakayo a kupado a tao, gapuna a saanak nga agbayag. Awan duadua a maseknankayo maipapan iti naimbag a salun-at a maipaay kadakayo ken kadagiti ingungotenyo. Bueno, ammoyo kadi a ti Dios ket inkarina a pagnguduen iti amin a saksakit? [Palubosan a sumungbat.] Siputanyo ti punto iti parapo 4 daytoy a broshur a napauluan ti ‘Adtoy! Pagbalinek dagiti Isuamin a Bambanag a Baro.’” No palubosan iti tiempo, basaen ti parapo 4 a nangiladawan iti kasasaad idiay baro a lubong. No awaten ti bumalay, mabalinen a mairugi iti panagadal ti Biblia iti pagtaengan.
4 No sarungkaran manen ti maysa nga immawat ti tract, mabalinyo a kunaen iti kaasping daytoy:
◼ “Idi napalabas a nagkitatayo, immawatkayo iti kopia ti tract a napauluan iti Sino a Talaga ti Agturay ti Lubong? Nasarakanyo kadi a narigat a patien a ni Satanas isut’ agturturay ditoy lubong? [Palubosan a sumungbat.] Timudenyo ti umuna a parapo iti panid 6.” Basaen ti parapo, sa isaludsod: “Apay a kayat ni Satanas nga allilawennatayo?” Kalpasan a makasungbat ti bumalay, usigenyo a dua iti maikapat a parapo idiay panid 3. Mabalinyo nga itultuloy ti naan-anay a pannakausig daytoy a tract, wenno kayatyo nga iyammo ti broshur a Pudno Aya a Maseknan ti Dios Kadatayo? ken mausig iti parapo 8 idiay panid 13.
5 Adda naimbag a rason nga agpositibo ken sarunuen iti interes a masarakan bayat ti panangasaba a trabahotayo uray no dayta ket naiyebkas iti limitado laeng a wagas.
6 No adda nasayaat a saritaan iti maysa a tao a nalabit a bassit laeng ti interesna, dikay liwayan a sarungkaran tapno makultibar iti interesna. Mabalin nga agresulta ti mairugi a panagadal ti Biblia iti pagtaengan ken mailugar ti maysa a tao iti dalan ti biag.—1 Tim. 4:16.