Memorial—Ti Kristiano a Selebrasion
1 Ni Jesus ti nangipasdek iti Memorial idi Nisan 14, 33 K.P., ken inwardasna dagiti disipulona: “Aramidenyo daytoy a panglaglagip kaniak.” (Luc. 22:19) Inlawlawag ni Pablo a ti panangaramid iti dayta “itultuloyyo nga iwaragawag iti ipapatay ti Apo, agingga iti iyaayna.” (1 Cor. 11:26) Maikanatad ngarud iti panaglaglagip iti ipapatay ni Jesus agsipud ta babaen iti daytoy a matungpal amin dagiti panggep ni Jehova. Ti daton a subbot isut’ mangted iti mismo a basaran ti pammatitayo ken mangted iti namnamatayo iti masanguanan.
2 Manipud pay nangrugi iti Kristiano a kongregasion, simamatalek a sinelebraran dagiti disipulo ni Jesus iti Memorial. Iti moderno a tiempo naireport a ti kasapaan a kas idi 1899 adda 2,501 idiay Estados Unidos a nakipaset iti selebrasion ti Memorial. Ita, 92 a tawtawen iti kalpasanna, ti Nisan 14 isut’ agtupak iti Sabado, Marso 30, iti kallennek ti init, ket nasurok a sangapulo a milion a tattao iti manamnama a tumabuno iti sangalubongan.
KASAPULAN DAGITI PANGLAKAYEN
ITI PANAGSAGANA
3 Maigapu iti importansia daytoy nga okasion ken iti manamnama a kaadu dagiti tumabuno, masapul iti nasakbay a panagsagana ti kongregasion. (1 Cor. 14:40) Saan a mairaman iti ritual ken nainget a pormalidad iti daytoy. Saan, ta iti Mateo 26:26-30 makita iti kinasimple daytoy a selebrasion kas inyusuat ni Jesus. (1 Cor. 11:23-26) Ngem adda nasken a detalye a masapul a maannurot tapno ti Memorial ket umiso iti pannakaselebrarna. Ania dagitoy?
4 Umuna, siguruen dagiti panglakayen a ti panagraem isut’ masapul a maipakita iti Pangrabii ti Apo babaen iti kaadda dagiti umiso nga emblema. Ti awan lebadurana a tinapay, a naaramid laeng babaen iti tapong a trigo ken danum isut’ maaramat. Kasta met laeng iti awan laokna a nalabaga nga arak iti ubas, a kas iti Chianti, Burgundy, wenno claret, ti masapul a mausar. Ti maysa nga inaramid iti balay a nalabaga nga arak ket mabalin met nga usaren no laket ta saan a naasukaran wenno narekaduan.
5 Kayat met a pilien dagiti panglakayen dagidiay mapagulidanan a kakabsat a lallaki, nga no mabalin ket papanglakayen ken ministerialda nga adipen, nga isudat’ mangiserbi kadagiti emblema. Masapul nga organisadoda a naimbag ken maawatanda no ania iti aramid a nakadutokanda. Nasken met a makasao dagiti attendant no ania iti rebbengenda, kas iti panangiturong kadagiti tattao iti pagtataripnongan ken mangkontrol iti trapiko. Nasken unay daytoy no adu a kongregasion ti mangusar iti isu met laeng a Kingdom Hall. Umiso met koma ti pannakapakaammo daydiay ispiker iti oras ken lugar iti selebrasion.
PERSONAL A PANAGSAGANA
6 Amintayo ti mangikagumaan a magunggonaan a naan-anay manipud iti daytoy a sagrado a selebrasion. Isaganatayo iti mismo a panunottayo babaen ti panangsurot iti panagbasa ti Biblia a maipaay iti Marso 25-30, kas agminar idiay kalendariotayo ken iti panid 3 daytoy Ti Ministeriotayo iti Pagarian. Kasta met a masapul nga awisen ken dagasen agingga iti mabalin dagiti adu a tattao a tumabuno. Ket ipariknatayo koma kadagidiay a tumabuno a maawatda.
7 Babaen iti naan-anay a panagsagana a nasakbay, maipakitatayo a matmatantayo iti itatabuno ti Memorial a kas pribilehio ken kas oportunidad a mangipakita iti panangipateg iti daton ni Kristo. Sapay koma ta ti selebrasion iti Memorial iti daytoy a tawen ket mapaneknekan a kas tiempo iti makapabileg a pammaregta kadagiti amin nga ad-adipen ni Jehova. Maipapuso koma kadatayo amin ti espiritu iti panagtalek a kas impannayag ni Jesus. Ti panagtalektayo ken Jehova isut’ tumulong kadatayo a mangparukma iti lubong ken magun-odan iti tumutop a gunggonatayo.—Juan 16:33; 2 Ped. 1:10; Apoc. 7:9, 10, 14.