Ti Kangrunaan nga Aldaw iti 1992
1 Ti kangrunaan a petsa iti kalendarioyo ti daytoy a tawen isut’ Biernes, Abril 17. Iti kallennek ti init iti dayta nga aldaw, rambakantayo ti Memorial iti ipapatay ni Kristo. (1 Cor. 11:20, 24) Apay a ti petsa iti ipupusay ni Jesus ket naaramid nga aldaw a naidumduma ti pannakalaglagipna?
2 Ti Memorial—Ti Kaipapananna: Ti ipapatay ni Jesus isut’ maysa a pasamak nga adda sapasap nga importansiana. Idi nagsurat iti naiyanak ti espiritu a kongregasion iti Kristiano, nakuna ni apostol Pablo: “Kas masansan a kanenyo daytoy a tinapay ken inumanyo daytoy a kopa, itultuloyyo nga iwaragawag iti ipapatay ti Apo, agingga iti iyaayna.” (1 Cor. 11:26) Gapuna a ti Memorial ket kiddawenna iti espesial nga asikaso maipapan ti kaipapanan iti ipapatay ni Kristo Jesus kas pakaibanagan ti panggep ni Jehova. Ilawlawagna ti kaipapanan iti naisakripisio nga ipupusay ni Jesus ken ti panangapektar iti ipapatayna kadagidiay a makipagtawid kenkuana ti nailangitan a Pagarian.—Juan 14:2, 3; Heb. 9:15.
3 Babaen ti panangsalimetmetna iti kinatarnaw agingga ti ipapatayna, sinantipikarna iti nagan ni Amana ken indemostrana a ti maysa a perpekto a tao ket mapaneknekanna a matalek iti Dios uray ti sidong iti amin a kita ti suot ni Satanas a maibusor kenkuana. Impaay met ti ipapatayna iti perpekto a natauan a daton a subbot dagiti kaputotan ni Adan ken aramidenna a posible kadagiti adu a mangalagad ti pammati nga agbiagda iti agnanayon ti maysa a paraiso a daga. Gapu amin kadagitoy a maitungpal iti ipapatay ni Jesus, a maitutop unay kenkuana ti panangiwardasna kadagiti disipulona a lagipenda iti ipapatayna.—rs p. 266-7 (322-3 iti Iloko.)
4 No Kasanotayo a Maipakita ti Panangipateg: Daytoy lubong ket adu ti rambakna iti las-ud ti makatawen, ket nawadwad iti maaramid tapno maitandudoda dagitoy. Iti sabali a bangir, ti Pangrabii iti Apo isu laeng ti kakaisuna a selebrasion nga imbilin ni Jesus a rambakan dagiti debotado a pasurotna. Awan duadua, isut’ kadakkelan a selebrasion kadagiti amin a pudno a Kristiano. Saan kadi a ti nabatad a kaeskan iti Pangrabii ti Apo iti mangtignay kadatayo a mangipamaysa ti asikaso iti dayta bayat ti Abril?
5 Nalabit a maisapar iti sumagmamano a minutos ti kada lawas iti Abril a mangilawlawag kadagiti estudiantetayo ti Biblia dagiti kasuratan a mangisalaysay iti kaipapanan ti ipupusay ni Kristo ken ipakita kadakuada iti basaran ti Memorial. Mabalintayo met a paregtaen ida a makidanggay iti panagbasa ti Biblia iti Memorial bayat ti Abril 12 aginggat’ 17. Tumulong daytoy kadakuada a mangpauneg ti panangipategda iti Pangrabii ti Apo.
6 Maigapu iti pateg ti selebrasion iti Memorial, aramidentayo ti amin a pamuspusan a matulongan dagiti dadduma a tattao a tumabuno. Dagiti makatulong a palagip kadagiti panglakayen ti naited iti panid 7 daytoy a Ti Ministeriotayo iti Pagarian.
7 Sanguentayo ngarud daytoy a kangrunaan nga aldaw iti 1992 a buyogen ti nabatad a pannakaawat ken napasnek a panangipateg iti amin a kaipapanan ti ipapatay ni Jesus nga agpaay iti sangatauan. Wen, sapay koma ta addatayo amin inton Abril 17 bayat a maminsan manen a dagiti managdayaw ken Jehova ket simamatalek nga agtulnogda iti bilin ni Jesus nga “itultuloyyo nga iwaragawag iti ipapatay ti Apo, agingga iti iyaayna.”