Umaykayo iti “Nadalus a Pagsasao” a Kombension
1 Kastoy ti naimpadtuan a sasao ni Jehova iti Sofonias 3:9: “Iti kasta itdekto kadagiti tattao iti panagbaliw nga agturong iti nadalus a pagsasao, tapno isuda amin ket awagandanto ti nagan ni Jehova, tapno agserbida kenkuana iti abagan-abaga.” Ti kombension iti daytoy a tawen saanna laeng nga ilasin no ania daydiay “nadalus a pagsasao” ngem tulongannatayo pay iti nasken a panangipateg no apay a suruen ken sawen dayta iti nabatad ken no kasano a ti abilidadtayo a mangusar iti dayta pabilgenna ti panagkaykaysa iti sangalubongan a panagkakabsattayo.
2 SAPAENYO TI SUMANGPET: Awisennatayo ti organisasion ni Jehova a mataraonan iti espiritual a lamisaanna. Maysa a tanda ti panagraem no nasapatayo a sumangpet. Kaipapanan daytoy a masapul a sumangpettayo a nasapa iti kada aldaw ken nakatugawtayon sakbay a mangrugi ti programa. Kasapulanna daytoy kadatayo ti umdas a tiempo a mangiparada iti lugantayo ken sumapul iti pagtugawantayo.—1 Cor. 14:40.
3 Dagiti delegado ti kombension idiay Poland idi napan a tawen ti naparagsakan babaen iti nadiosan a debosion, ayat, ken panagkaykaysa dagiti kakabsatda. Naparang unay ti napasnek a panangipateg kadagiti espiritual a parabor. Kada agsapa, dagiti kakabsat ket addadan a nasapa iti pagkombensionan, a nakatugaw ken nakasaganadan a maipaay iti panglukat a kanta ken kararag. Nagtalinaedda agingga iti pangserra a kanta ken kararag, ken nagbatida pay kalpasan iti programa tapno makilangenda kadagiti kakabsatda.
4 Ti kinaurnos dagiti kakabsat isut’ mapagtuladan. Timmabunoda tapno dumngeg ken agadalda. Nupay nagtudo idiay awan ti atepna nga estadium iti Poznan ken Chorzow saanna a naibaw-ing ti atensionda iti programa. Dagiti agtutubo, agraman dagiti babassit nga ubbing, ket disiplinadoda, natalna ken atentiboda iti programa. Dagiti pamilia ti nagkakatugaw a sangsangkamaysa. Kasanotayo a magunggonaan manipud iti ehemploda?
5 Nainkasuratan no tuladen ti naimbag nga ehemplo dagiti dadduma. (2 Tes. 3:7) Bayat a dagiti personal a kasasaadtayo ket nalabit a nagduduma, kayattayo met a magun-odan daydiay kaimbagan manipud iti kombensiontayo. Tapno maliklikan iti panaglagaw ken pannakapaay gapu iti naladaw a panagrubuat a mapan iti pagasambleaan, naikeddeng dagiti dadduma a pamilia ti umiso a tiempo a pannaturog. Iti kasta maaddaanda ti naimbag a turog iti rabii ken sisasaganada nga agrubuat iti sumaganad nga aldaw. Kaipapananna a maliklikan ti panagsangpet bayat a madaman ti programa, a daytoy ket makasinga kadagiti nalpasen a nakatugaw. Ti kinamanagpanunottayo iti daytoy a banag isut’ maysa a pakakakitaan ti panagdayaw ken panagraem ken Jehova ken ti ayat ken konsiderasion kadagiti kakabsattayo.
6 UPPAT NGA ALDAW A KOMBENSION: Ti “Nadalus a Pagsasao” a Kombension ti Distrito agpaut iti uppat nga aldaw. Mangrugi iti Huebes iti 1:30 t.m. ket agngudo iti 5:10 t.m. iti Huebes, Biernes, ken Sabado, ken 4:00 t.m. iti Domingo. Iti Biernes aginggat’ Domingo ti programa mangrugi iti 8:30 t.b. Napno ti kada sesion iti nasken nga impormasion maipapan iti panagsao ti nadalus a pagsasao. Addanto dagiti palawag, demostrasion, kapadasan, simposium, ken dua a drama ti Biblia. Nota: Ti programa isut’ agpapada kadagiti amin a kombension, agraman dagidiay maaramid iti Metro Manila. Ti laeng naiduma iti Manila isu ti kaaddanto dagiti ganggannaet a delegado a naawis a tumabuno.
7 Ikeddengyo koma nga awan ti masayangyo uray maysa a sesion. Nalabit a kaipapananna daytoy ti personal a sakripisio ken panangihusto iti iskediolyo. Mabalin a kasapulan dagiti dadduma ti espesial a pannakiurnos kadagiti amo a pagtrabahuanda. Adu pay dagiti mangpalabas iti pinansial a bentaha tapno matabunuanda laeng dagiti amin a sesion. Nupay kasta, panunotenyo no kasano ti panagsakripisio dagiti adu a kakabsat ken nagibtorda tapno makatabunoda laeng iti kombension idiay Poland idi napan a tawen. Saan kadi a mangtignay daytoy kadakayo a presente idiay kombensionyo iti kada sesion? Sigurado a bendisionan ni Jehova dagidiay mangaramid iti daytoy a kas suheto iti napasnek a kararagda ken ikagumaanda ti naimpusuan a panagragot a tumabuno.—Heb. 10:24, 25.
8 AGIMDENGKAYO A SIPAPASNEK: Iti Salmo 50:7 kuna ni Jehova: “Dumngegkayo, dakayo a tattaok, ta agsaoak.” Gapuna, bayat iti programa ti kombension, saankayo koma a masinga babaen kadagiti mabuya ken mangngeg nga awan ti kaeskanna iti material a madama a maidatag idiay plataporma. Ti gagartayo a makapagsao iti nadalus a pagsasao iti nalawag isut’ manggutugot kadatayo a mangalagad a naan-anay iti kiddaw ni Jehova idiay Isaias 55:2: “Agimdengkayo a sipapasnek kaniak.”
9 Amin dagiti material a maiparang iti daytoy a kombension agpaay iti espiritual a pagimbagantayo ken agserbi a mamabileg iti naresolbartayo nga agtalinaed a natibker iti serbisio ken Jehova ken makikaykaysa kadagiti kakabsattayo. Mangyeg daytoy a kombension kadatayo iti kasapaan a kasapulantayo ken tumulong kadatayo a makidanggay iti organisasion ni Jehova. Ti saan a panagimdeng isut’ agresulta iti pannakapanawtayo ti likudan. Masapul nga ipamaysatayo nga utoben dagiti programa tapno magun-odtayo ti naan-anay a gunggona manipud iti dayta ket kalpasanna ikagumaan nga aramiden dagiti naadaltayo.—Sant. 1:25.
10 Adda kadi banag a mabalin nga aramiden tapno makapagimdengtayo a naimbag ken saan a malipatan dagiti naiparang? Wen, adda. Adu dagiti delegado ti nakapataud iti ugali a mangalada iti notas bayat ti programa. Iramanyo ti maysa a notebook a kadua iti Biblia ken songbook no tumabunokayo iti kombension. No matmatanyo a sipapangadua ti panagala ti nota, apay a dikay padasen ita iti daytoy “Nadalus a Pagsasao” a Kombension? Masarakanyonto a naimbag a wagas daytoy a mangipamaysa iti atensionyo kadagiti bambanag a maisao ken saluadanna ti panagpasiar ti panunotyo.
11 Saan a kasapulan nga atiddog dagiti nota. Masansan a ti maysa wenno dua a grupot’ sasao ket umdasen a maipaay iti maysa a punto. Masarakan dagiti panglakayen a makatulong ti kaadda iti nadalus a notada a mangidaulo iti nabagas a repaso iti programa ti kombension iti Gimong ti Serbisio. Kasta met a mabalinda nga usaren dagiti adu a puntos a naidiaya iti panangisuro ken panangipastor a trabahoda.
12 KANTA KEN KARARAG: Maraemtayo ni Jehova babaen ti panagkanta iti dayawna. Paset daytoy iti panagdayawtayo. Maragsakan met ni Jehova no dagiti tataona ket umasidegda kenkuana iti napasnek a kararag. (Prov. 15:8b) Dagiti kombension iti distrito ipaayannatayo ti naisangayan a gundaway a makidanggay kadagiti rinibo a kakabsattayo iti panagdayaw ken Jehova babaen ti kanta ken kararag. Nupay kasta, ipakita dagiti dadduma ti kurang a panagraem kadagitoy a napateg a paset iti panagdayawtayo. Kasano? Babaen ti saan a rumbeng panagsangpet iti kombension a madaman wenno nalpasen iti panglukat a kanta ken kararag. Wenno iti konklusion ti programa, pumanawen dagiti dadduma manipud ti tugawda bayat ti kanta ken sakbay iti kararag. Apay? Iti dadduma nga okasion mabalin nga adda naimbag a rason nga aramiden daytoy. Nupay kasta, ti kadi umiso a panagraem ket maipakita iti lamisaan ni Jehova no dagiti dadduma ket panawandan ti pribilehio a panagkanta ken pannakiraman iti kararag tapno ti kasta ket nasapada a makaawid ken makapangan?—Mat. 6:33.
13 Alagaden met koma ti panagannad iti panangsurot ti bukod a pagnam-ayan, a ditay koma palubosan ti nailubongan a kababalin a siak pay iti umuna a daytoy ti mangsinga iti espiritual a progresotayo. Ipakitatayo koma ti isu met laeng a panangipateg kadagiti sagrado a bambanag a kas kadagiti kakabsattayo idiay kombension ti Poland idi napan a tawen, ket makipagnatayo koma kadakuada iti abagan-abaga babaen iti panangipakita ti raem iti kararag ken kanta a pakaidayawan ni Jehova.—Sal. 69:30.
14 TI KRISTIANO A KABABALINTAYO: Ti Kristiano a kababalin ken langatayo kadagiti kombension ket nakagun-odda iti naimbag a pakasasawan kas Saksi ni Jehova. Agsipud ta serioso ti panagdayawtayo ken Jehova ken ditay matmatan ti itatabuno ti kombension a kas maysa laeng a sosial rambak. No tumabunotayo kadagitoy espesial nga okasion, masapul a salimetmetantayo ti Kristiano a dignidad ken ti espiritual a sukog ti panunot, nga agtignaytayo a kas ministro iti amin a tiempo.—1 Cor. 10:31-33.
15 Nupay kasta, makadisturbo a makita nga adda sumagmamano a tumabuno iti kombension a saan a maawat iti panagkawes, panagsao, ken ti konduktada. Ania ti maaramid no adda maimatangan a kakastoy iti lokal a kongregasion ken iti kombension? Dagidiay addaan iti espiritual a kualipikasion ti masapul a mangitukon iti naayat a balakad maipapan iti panangritubar wenno panangihusto. (Gal. 6:1; Efe. 4:11, 12) Ti panagsao iti nadalus a pagsasao ti mangtignay koma kadatayo a mangitandudo iti naimbag a reputasion ken ti nangato a pagalagadan iti kondukta.
16 Maysa a bisita iti maysa a kombension ti nangipisok iti daytoy sumaruno a nota iti kahon ti kontribusion: “Nagragsakak unay ti programayo. Agadalak metten ti Biblia babaen iti maysa kadagiti kakabsat. Isu daytoy ti kaunaan nga itatabunok iti aniaman nga asambleayo. Naiplanok nga umayak laeng koma iti Sabado, agsipud ta ti Domingo isut’ aldaw ti iglesiak. Ngem gapu ta magustuak unay immayak manen iti daytoy nga aldaw agraman iti intero a pamiliak. Ti laeng makaupay isu daydiay napigsa a panagsasarita dagiti nataengan bayat nga agpalpalawag daydiay ispiker.”
17 Napaliiw met kadagiti dadduma a kombension nga adda sumagmamano nga agtutubo a nakatugaw iti likudan nga agiinnarasaasda, a masansan a saanda nga agim-imdeng iti programa. Ipakita daytoy a kasapulanda pay laeng iti naamaan ken nainaan a pannarabay ket masapul a makikatugawda iti pamiliada. Dagiti responsable a nagannak ti masapul a mangted iti asikaso kadagitoy a bambanag ken mangipaayda iti giya a kasapulan dagiti annakda. (Efe. 6:4) Amin, nataengan ken agtutubo, masapul a patgenda koma a no madama ti programa, isut’ tiempo ti panagdengngeg, saan a panagsao.—Deut. 31:12.
18 Nupay kaaduan kadagiti kakabsat ti mangyeg ti dayaw iti nagan ni Jehova, masapul nga awatentayo nga adda sumagmamano a pamilia a tumabuno iti kombension a pagtaudan dagiti reklamo. Kas ehemplo, kalpasan ti panangabangda iti maysa a kuarto nga agkapasidad ti saan a nasursurok ngem iti uppat wenno lima a katao, dadduma ti nangipastrek iti sangapulo a tattao, ket daytat’ maysa a saan a kinamapagpiaran. Tapno makalaon daytoy kadakuada, dagiti abbong ti katre isudat’ naikkat tapno maiyaplagda iti suelo. Kalpasanna dimmawatda pay iti kanayonan nga ules manipud iti makinkukua. Dadduma kadagiti motel ti madi metten nga agpaabang kadagiti Saksi ni Jehova agsipud ta sinalungasing dagiti dadduma ti regulasion a maiparit ti panagluto ti taraon. Adda pay sabali a reklamo maipapan kadagiti kakabsat a nangpanaw iti kuarto ti motelda a nawarawara ti langana. Masapul met koma a maipakita ti kinadalus ken konsiderasion saan laeng nga iti panagkawes ken konduktatayo ngem kasta met koma iti panangtrato iti sanikua dagiti dadduma, nangruna no agnaedtayo iti kuarto ti pagadalan wenno patakder ti gobierno a siaayat nga intukon kadatayo dagiti makinkukua ti estadium. Adda aya rason a saan a panawan dagiti kuarto a naurnos ken nadalus? Ti awan konsiderasionna a kababalin ket mulitanna ti naimbag a nagantayo. Bayat ti umay a kombension dagiti distrito, ikagumaantayo koma amin ti agparbeng iti konduktatayo tapno “maarkosan ti sursuro ti Namarsuatayo, ti Dios, iti amin a bambanag.”—Tito 2:10.
19 Kadagiti dadduma a kombension, nadlaw idi napan a tawen a nawadwad ti wara a napanawan manipud iti patakder a nagasambleaan. Adu dagiti pedaso ti papel, balkot ti kendi, botelia, ken dadduma a basio, a nabati a nakawara iti aglawlaw dagiti pagtugawan. Sigurado a daytoy ket saan a panangipakita iti panagraem iti nagan ni Jehova ken konsiderasion kadagidiay nadutokan nga agdalus apaman a makapanawtayo. Siguruenyo a piduten ti aniaman a nakawara iti aglikmutyo ken ibbellengyo ida iti basuraan, wenno no saan nga umdas dagitoy, mabalinyon nga iyawid tapno sadiayton ti pangibellenganyo.
20 Idiay kombension dagiti panunottayo ti masapul koma a nakasentro iti espiritual a bambanag, idinto ta daytoy ket paset iti sagrado a serbisiotayo. Maysa ngarud a saan a panagraem iti lamisaan ni Jehova no usaren daytoy nga okasion iti negosio wenno aniaman a panguartaan a gakat, a gundawayan dagiti umariwekwek a kakabsat a timmabuno. Maminsan manen a kayatmi nga ipalagip iti amin nga awan dagiti personal a tagilako a maipalubos iti uneg ti pagkombensionan, ket dagiti laeng bambanag a kukua ti Sosiedad ti mapalubosan idiay bookroom wenno iti dadduma a departamento.
21 Maitunos kadagitoy adda iti ngato, dagiti departamento iti represko ti masapul nga agserra kabayatan dagiti amin a sesion, gapuna a kasapulan nga alaenyo dagiti kasapulanyo iti nagbaetan dagiti sesion. Iti kastoy a wagas mabalintayo a mangngegan dagiti maisao idiay plataporma, agraman dagidiay agtartrabaho iti departamento ti represko.
22 PARA ITI NAGANNAK: Masapul met dagiti ubbing ken agtutubo ti agsao iti nadalus a pagsasao iti nalawag. Anian a nagsayaat a makita dagiti agtutubo a nakaadalda nga agimdeng a naimbag kadagiti amin a gimong dagiti Kristiano ken napinget ti interesda kadagiti programa ti kombension! (Sal. 148:12, 13) Ngem agpannuray daytoy iti ehemplo ken tarawidwid dagiti nagannak. Adun dagiti agtutubo a nasanayen a naimbag a mangala kadagiti nota. No kas nagannak ket saanyo pay a naisuro dagiti annakyo no kasano ti panangala iti nota, apay a dikay usaren iti natda a tiempo sakbay ti kombension nga aramiden dayta? Uray pay dagiti ubbing ket mabalin a maparegtada a mangisurat kadagiti sitasion ti Kasuratan ken kadagiti adda singgalutna a panulbek a sasao a mangngegda manipud kadagiti ispiker. Iyurnos met dagiti dadduma a nagannak ti panangrepaso kadagiti kangrunaan a puntos manipud iti inaldaw a programa inton makaawidda wenno bayat nga agbiaheda nga agawid.
23 Siempre, kaaduan kadagiti nagannak ti mangipateg a ti gagangay a turong dagiti annak ket managay-ayamda. Agkurangda pay laeng iti kapadasan ti biag, ken saanda pay a nataengan. Gapuna, masapul a masuruanda no kaano nga agimdengda ken no kasano ti panagparbengda kadagiti gimong. Dadduma kadagiti nagannak ti naliway iti daytoy. No dadduma, nupay dagiti nagannak ket mabalin nga ipakitada ti umiso a panagraem ken Jehova bayat ti kararag, dagiti annakda ti agay-ayam ken makasinga iti dadduma. Masapul nga ammo dagiti nagannak ti ar-aramiden dagiti annakda bayat ti panagkararag. Kasta met, ania ti ar-aramidenda no panawanda dagiti tugawda bayat ti programa?—Prov. 29:15.
24 MAIPATEG TI NAAN-ANAY A KOOPERASIONYO: Ti nakonsiderar a plano isut’ naaramid tapno adda umdas a pagtugawan, literatura, taraon, ken dadduma pay a kasapulan a maala dagiti amin a makikombension. Tapno a maisiguro ti kaepektibo dagitoy nga urnos, ti kada kongregasion ket nadutokan iti maysa a masinnunuo a lugar ti kombension. Ti naan-anay a kooperasionyo isut’ nasken tapno maliklikan iti linnetletan. Nangruna a maipateg no dagidiay agnanaed iti Metro Manila ket istrikto a surotenda iti nakatudinganda a maysa kadagiti tallo a kombension inton Enero 3-6, 1991. Iti kasta maliklikan iti panagpurruok iti maymaysa nga estadium. Dagiti taga probinsia ti maabrasa met a tumabuno kadagiti kombension ditoy Manila ket ikagumaanmi nga isiguro ti umdas nga espasio a paglugaran. Nupay kasta, kas nasaon ditoy ngato, pareho met laeng dagiti programa ditoy Manila a kas iti tabunuanda idiay probinsia.
25 Madawat met ti naan-anay a kooperasionyo maipapan iti panagreserba ti pagtugawan. Pangaasiyo ta adda iti panunotyo a dagiti PAGTUGAWAN TI MABALIN A MAIRESERBA LAENG KADAGITI ASIDEG A MIEMBRO TI PAMILIAYO KEN ITI SIASINOMAN A NAKIPAGBIAHE KADAKAYO ITI MISMO A LUGANYO. Pangaasiyo ta dikay agreserba iti pagtugawan ti sabsabali. No dadduma, adda esktra a tugaw a maireserba iti maysa a masinunuo a tao. Daytoy ket saan a naayat ken makatikaw kadagiti attendant ken iti dadduma nga agsapsapul ti pagtugawanda. Kas maiyataday iti balakad ti Biblia, ikagumaantayo ti mangipakita iti nainkabsatan a rikna ken naan-anay a makitunos iti naanamongan nga urnos a maipaay iti panagreserba ti tugaw.—2 Ped. 1:5-8.
26 Mapalubosan ti panangusar iti video camera ken remienta ti audio recording idiay lugar ti kombension. Nupay kasta, dagidiay mangusar kadagitoy a kagawaan ti saan koma a makadisturbo wenno makasinga iti dadduma. Dagita a remienta ti saan koma a maipuesto kadagiti pagnaan wenno pagserkan ken pagruaran. Saan met a maikonektar dagita a kagawaan iti sistema ti public address. Saan a maipalubos iti makasisirap a panglawag. Dagidiay mamataud kadagitoy a makasinga a bambanag ti madagdagus a makorehir no maiyeg iti atension. Masapul a naridam dagiti attendant a mangbabalaw iti aniaman a panagsalungasing kadagitoy a pagalagadan, ket umawatda koma ti naan-anay a kooperasion manipud kadagidiay a mangusar kadagitoy a kagawaan.
27 Sigurado, ipateg dagiti tattao ni Jehova ti agtataripnong kadagiti nasayaat a pasilidad iti kada tawen tapno magunggonaanda manipud iti espiritual a programa a naisagana. Patgentayo met dagiti adu a serbisio ken pagnam-ayan a maipaay kadagitoy a taripnong. Babaen iti nawadwad a gastos ti Sosiedad, naaramid ti urnos a maipaay kadagiti estadium, patakder, sound system, ken adu pay a sabsabali a serbisio tapno makaparag-o ken makabang-ar iti naespirituan dagitoy a kombension.
28 Dagitoy a gastos ti masulnitan babaen iti boluntario a kontribusionyo kas suportar iti sangalubongan a trabaho ti Sosiedad. Agpaay a kombeniente kadakayo, adda dagiti nalawag ti pannakamarkada a kahon ti kontribusion a masarakan iti aglawlaw ti pasilidad iti kombension. Amin dagiti kontribusion ti maipateg unay, ket kayat iti Sosiedad ti agyaman a nasakbay iti daytoy a nabulos ken nakaykaysa a suportar a maipaay iti interes ti Pagarian iti kastoy a wagas. Agtalekkami a matignay dagiti amin a mangrikna iti bukodda a responsabilidad iti daytoy a banag ket makikooperarda a naan-anay babaen ti pannakiramanda iti aginggat’ ipalubos ti kasasaadda.—Luc. 6:38.
29 UMAYKAYO ITI “NADALUS A PAGSASAO” A KOMBENSION TI DISTRITO: Babaen ti itatabuno iti “Nadalus a Pagsasao” a Kombension ti Distrito ken panagimdengyo a siaasikaso iti programa, lalo pay a tagipatgenyo a naan-anay no apay nga impaay ni Jehova kadatayo iti nadalus a pagsasao ken no apay a masapul a kanayon ti panagaluad a maibusor iti naagum a tendensia a mangsinga iti pannakikaykaysa kadagiti kakabsattayo. Aramidenyo dagiti planoyo itan tapno addakayto iti panglukat a kanta a tumabuno iti amin a sesion aginggat’ pangingudo a kararag iti malem ti Domingo.
[Kahon iti panid 4]
Dagiti Palagip iti Kombension ti Distrito
PAGDAGUSAN: Mangipatulodkami ti abasto a porma ti Room Request iti kada kongregasion. Dagidiay agkasapulan iti pagdagusan kadagiti kombension idiay probinsia ti masapul a mangsurat iti maysa kadagitoy a porma ket itedda iti coordinator ti kombension iti mismo a kongregasionyo. Usisaen ken pirmaanna, sa ipatulodna idiay Watch Tower Convention iti maysa kadagiti direksion nga agparang ditoy baba. Nota: Awanto ti urnos iti pagdagusan kadagiti kombension ditoy Manila. Gapuna a dagidiay aggapu iti probinsia a tumabuno ditoy Manila isuda a mismo ti makaammo a mangurnos iti pagdagusanda.
Disiembre 13-16, 1990
Masbate, Masbate: c/o Yolando Alburo, 56-K Tara Street, Masbate, 5400 Masbate.
Disiembre 20-23, 1990
Ilagan, Isabela: c/o Zosimo G. Linda, Baculod, Ilagan, 3300 Isabela.
Laoag City: c/o Leon Agbayani, PLDT Radio Station, Gen. A. Luna Street, 2900 Laoag City.
Binalonan, Pangasinan: c/o Santiago Partido, Assembly Hall of Jehovah’s Witnesses, Binalonan, 2436 Pangasinan.
Alaminos, Pangasinan: c/o Bonifacio Rancudo, 20 Don Carlos Garcia Street, Alaminos, 2404 Pangasinan.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Lucena City: Kingdom Hall, 1 Granja Street, 4301 Lucena City.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Tagbilaran City: c/o Hermenegildo Sang-an, 11 Tamblot Street, 6300 Tagbilaran City.
Roxas City: Kingdom Hall, Dayao, 5800 Roxas City.
Dumaguete City: c/o Alexander Echon, 110-A Springville, Tubod, 6200 Dumaguete City.
Tacloban City: 185 M. H. del Pilar Street, 6500 Tacloban City.
Davao City: Kingdom Hall, Corner Lopez Jaena and F. Torres Streets, 8000 Davao City.
Digos, Davao del Sur: Kingdom Hall, Lim Street Extension, Digos, 8002 Davao del Sur.
Cagayan de Oro City: Kingdom Hall, F. Abellanosa Street, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Disiembre 27-30, 1990
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Baguio City: c/o Osmundo Delis, 46 General Luna Road, 2600 Baguio City.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.
Puerto Princesa City: Kingdom Hall, Malvar Street, 5300 Puerto Princesa City.
Cebu City: c/o Parcon’s Machine Shop, Bagumbayan Street, 6000 Cebu City.
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
Bacolod City: c/o Serafin Sabordo, 68 Mabini Street, 6100 Bacolod City.
Koronadal, South Cotabato: c/o Candido Alima, 756 Posadas Street, Koronadal, 9506 South Cotabato.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Surigao City: c/o Alfredo Alutaya, 735 Navarro Street, 8400 Surigao City.
Dipolog City: c/o Jose Machutes, Jr., 097-E Magsaysay Street, 7100 Dipolog City.
Kabacan, North Cotabato: c/o Felipe Mapanao, Poblacion, Kabacan, 9407 North Cotabato.
Enero 3-6, 1991
Manila: P.O. Box 2044, 1099 Manila.
Marikina: P.O. Box 2044, 1099 Manila.
Quezon City: P.O. Box 2044, 1099 Manila.
BAUTISMO: Masapul nga ikagumaan dagiti kandidato iti bautismo ti kaaddadan iti tugaw a naidesignar kadakuada sakbay a mangrugi ti programa iti agsapa ti Sabado. Maysa a natakneng a pagbabasa ken tualia ti itugot iti tunggal maysa nga agplano nga agpabautismo. Kalpasan ti palawag ti bautismo ken kararag iti ispiker, mangted ti tserman iti sesion ti ababa nga instruksion kadagiti kandidato ti bautismo ket kalpasanna iyawisna ti panagkanta. Mangrugi iti maudi a bersikulo wenno stanza, iturongen dagiti attendant dagidiay kandidato ti bautismo idiay lugar ti pangitaneban wenno kadagiti behikulo a mangiturong kadakuada sadiay, bayat a dagiti natda a timmabuno ket iringpasda iti kanta. Idinto ta ti bautismo ket simbolo ti dedikasion ti maysa a nadekket ken personal a banag iti maysa a tao ken Jehova, awan ngarud daydiay maawagan nga aggiddan a bautismo iti dua wenno ad-adu pay a kandidato ti bautismo nga agrakep wenno agkakapet ti imada bayat a mabautisaranda.
DAGITI ESPESIAL A MITING: Maysa a miting ti maaramid nga agpaay kadagiti amin a regular ken espesial payunir ken managdaliasat a manangaywan iti 11:15 t.b. iti Biernes, bayat a maysa met a miting ti agpaay kadagiti amin a panglakayen a maaramid iti 11:15 t.b. ti Sabado. Ti lugar dagitoy a miting isut’ maiyanunsio manipud iti plataporma.
PIONEER IDENTIFICATION: Amin a regular ken espesial payunir, agraman dagiti managdaliasat a manangaywan, ti masapul a mangitugot kadagiti Identification and Assignment card (S-202) iti kombension. Dagiti payunir nga adda iti listaan manipud ti Hulio 1, 1990 wenno sakbay daytoy a petsa ti umawat iti ₱80.00 ti kantidadna a tiket iti kombension babaen ti panangiparangda iti ID kardda iti maysa laeng a kombension. Tratuenyo ti kard a siaannad a kas kuarta. Saan a masukatan idiay pagkombensionan.
BOLUNTARIO A SERBISIO: Kasapulan ti boluntario a tulong a maipaay iti nalammuyot nga andar ti kombension ti distrito. Agpapan pay kabaelanyo laeng ti agtrabaho iti maysa a benneg bayat ti kombension, maipateg unay ti serbisioyo. No makatulongkayo, pangaasiyo ta agreportkayo idiay Volunteer Service Department apaman a sumangpetkayo iti kombension. Dagiti agtutubo a nababbaba ngem 16 iti edadda ti makaipaay met iti balligi ti kombension, ngem kasapulan kadakuada ti agtrabaho a kadua dagiti nagannak wenno sabsabali a responsable nga adulto.
LAPEL CARDS: Pangaasiyo ta ikapetyo koma iti espesial a nadisenio a lapel card idiay kombension ken bayat nga agbiahekayo a mapan ken agawid manipud iti lugar ti kombension. Masansan a daytoy ti manglukat kadatayo iti pannangted iti nasayaat a panangsaksi bayat ti panagbiahe. Dagiti lapel card ti masapul a maala babaen iti kongregasion, agsipud ta saan a maala dagitoy manipud iti kombension. (Nota iti sekretario: Dagiti lapel card masapul koma a napedidon babaen iti Special Order Blank for Forms. No saan pay a naaramid daytoy, mangipatulodkayon iti regular a S-14 a pedido nga agpaay kadagitoy.)
PAKDAAR ITI PANAGANNAD: Sadinoman iti tabunuanyo, siputanyo dagiti sanikuayo iti amin a tiempo. No adda behikuloyo, siguruenyo a nakatulbek ken dikay mangibati kadagiti napateg a sanikuayo iti uneg ti nakaparke a luganyo. Kasta met nga agaluadkayo kadagiti mannanakaw ken managsipdut isuda a maatrakar kadagiti dadakkel a taripnong. Ramanenna daytoy ti saanyo a panangpanaw iti aniaman a sanikua nga awan ti agbantay kadagiti tugaw iti kombension. Pangaasiyo ngarud ta agannadkayo.