1992 a “Dagiti Manangawit iti Lawag” a Kombension ti Distrito
1 Nakuna ni Jesus a dagiti pasurotna ket agbalinda a “ti silaw iti lubong.” (Mat. 5:14) Maisupadi, ti espiritual ken moral a kinasipnget daytoy lubong isut’ kumarkaro iti inaldaw. (Isa. 60:2; Roma 1:21) Ti responsabilidadtayo kas manangawit iti lawag ket dakkel ti kaipapananna bayat nga umadanitayo iti panagngudo daytoy a sistema. Idinto ta mabigbig iti papeltayo, nagagartayo koma a kumita ti masanguanan a tumabuno iti 1992 a “Dagiti Manangawit iti Lawag” a Kombension ti Distrito. Ti umuna iti daytoy a serye isut’ mangrugi iti Biernes, Disiembre 18.
2 Tallo nga Aldaw a Kombension: Iti daytoy a tawen naiplanomi ti agdagup iti 37 a kombension ditoy Pilipinas. Ti programa isut’ mangrugi iti 8:40 t. a. iti Biernes ken agserra babaen ti kanta ken kararag iti agarup a 4:15 t.m. iti Domingo. Amin dagiti tattao ni Jehova ti aggartem a tumabuno iti intero a programa. Nangaramidkayo kadin ti bukod a desision nga addakayo sadiay bayat iti tallo nga aldaw? Siguruenyo nga ikararag ti nabaknang a bendision ni Jehova iti reggetyo.
3 Manipud pangrugi a palawag iti agsapa ti Biernes agingga iti pangserra a komento ti malem iti Domingo, ti intero a programa isut’ masapul nga imutektekantayo. Dagiti makapakaradkad nga impormasion isudat’ maputar ken maidatag babaen iti palawag, demostrasion, interbio, ken maysa a drama. Iplanoyo ti maadda iti tugawyo sakbay a mangrugi ti programa iti Biernes. Gagangay, iti umuna nga aldaw mas adu a tiempo ti kasapulan nga agparke, mangsapul iti pagtugawan, ken dadduma pay. Gapuna pawaywayanyo ti bagiyo iti umdas a tiempo. Babaen ti panangtabuno iti amin a sesion ken panagtalinaed agingga ti pangserra a kanta ken kararag, magun-odtayo iti intero a magunggona manipud ti programa ken maipakita iti panangipateg ti pribilehiotayo nga agserbi kas manangawit iti lawag.
4 Agimdeng Koma Dagiti Lapayagyo: Inwaragawag ti salmista: “Nagtultuloy nga inutobko dagiti pammalagipmo. Anian ti panagayatko iti lintegmo! Imutektekak iti agmalmalem.” (Sal. 119:95b, 97) Iti kada okasion a nagtataripnongtayo a paisuro ken Jehova, kasapulan unay ti panangimutektek ken panagimdeng a saan laeng a babaen iti lapayag ngem kasta met koma babaen ti pusotayo. Daytoy a panagkasapulan ti nangruna a nasken, nupay kasta, no tumabunotayo iti dadakkel a taripnong a kas kadagiti kombension ti distrito. Nawadwad ti makita dagiti mata ken mangngeg iti lapayag. Anian a nagdakkel a pukawtayo no impusta ti tiempo ken kuartatayo a tumabuno iti kombension ngem agawidtayo a bassit laeng ti malagiptayo a naimbag a puntos no kasano a maparayray iti lawag nga awittayo! Aramiden ti kasayaatantayo a mangatipa iti aniaman a makasinga tapno magunggonaantayo a naan-anay manipud ti programa. Kasanotayo a masiguro a ti impormasion ket maimula a naimbag iti puso ken panunot inton agngudo ti programa iti kombension?
5 Ti panagimdeng isut’ maysa nga arte a masapul a makultibar ken masanay. Ti sao a “dumngeg” kaipapananna iti “panagimdeng a buyogen ti panagpanunot.” Usigenyo dagitoy sumagmamano a singasing: (1) Ikagumaanyo ti sumangpet iti lugar ti kombension a nakainana a naimbag iti kada agsapa. Kasapulanna daytoy ti plano ken kooperasion iti pamilia. No nabannogankayo gapu ti kurang a turog wenno mabisinkayo agsipud ta saankayo a namigat, wenno umanangsabkayo gapu iti panagapura, bassit ti magunggonayo manipud iti programa. (2) Mamataudkayo ti panagsegga no kasano a naputar iti maysa a tema. Sumagmamano a lawas sakbay ti kombension, kas paset iti panagadal ti pamiliayo, apay a dikay pagkomentuen iti kada miembro no ania ti kayat a sawen iti manangawit ti lawag. Bayat ti kaadda idiay kombension, miraenyo iti kada paset ti programa iti dayta nga aldaw sakbay a mangrugi. (3) Agkaweskayo iti maitutop, ket idianyo ti mangan ken uminum bayat iti sesion. Adda dagiti maimatangan idiay stadium a mangan ken uminumda bayat iti programa. Maysa daytoy a saan a panagraem, makasinga iti dadduma, ken ebidensia ti saan a kinateppel. Maiyataday iti daytoy, amin nga estante ti represko ket agserra kabayatan dagiti sesion iti kombension.
6 Kayattayo nga ipaay ti naiduma nga asikaso iti panagnotar. No maaramid nga umiso, tumulong daytoy kadakayo a sumurot iti daydiay ispiker a siaannad ken masanikuayo dagiti mangngegyo kenkuana. Idinto ta mamimpat a daras ti partaktayo nga agpanunot ngem iti panagsao, ti kasayaatan a wagas tapno saan nga agpasiar iti panunot isut’ panangala ti nota. Kas nakuna iti maysa a mannurat, “Ti panagdengngeg iti maysa a palawag masansan a narigrigat ngem ti mangted iti dayta.” Malagipyo a dagiti immuna a Kristiano ket naammuan a nangalada kadagiti ribak ti banga iti gimongda tapno inotarda dagiti kasuratan kadakuada babaen ti tinta. Siyayaman, nalaklaka kadatayo ti maaddaan iti kalalainganna ti kadakkel a notebook ken maysa a pen wenno lapis. Ti kinalaing nga agnotar kaipapananna iti panangisurat laeng ti umdas a pangawatan iti ideya tapno saantayo unay a kanayon nga agsurat. Ta daytoy ket singaenna iti panggeptayo nga agbanag ti pannakalab-aw iti puntos a madakamat ti ispiker. Isuratyo dagiti panulbek a sasao, nga agusarkayo ti pangpaababa. Agserbi kadakayo nga epektibo iti notayo no repasuenyo ida ti rabii ken sakbay manen iti diskusion ti kongregasion maipapan iti lawag ti programa iti Gimong ti Serbisio.
7 Napusuan a Kanta ken Kararag: Ti panagkanta iti dayaw ken Jehova ken ti naraem nga iyaadani kenkuana iti kararag ket paset ti panagdayawtayo. (2 Cron. 30:21, 27) Nasken dagitoy a benneg iti kombension nga amin ket masapul a makipaset. Bayat iti tallo nga aldaw daytoy “Dagiti Manangawit iti Lawag” a Kombension ti Distrito, kumantatayo iti 18 a kanta ti panagdayaw ken Jehova ken agkaykaysatayo kadagiti walo a kararag iti nailangitan nga Amatayo. Pudno a saan a magatadan dagitoy a pribilehio. Mangted ni Jehova kadatayo ti nasurok a 12 oras a maipaay iti espiritual nga edukasion ken panagsanay. Bayat ti sumagmamano a minutos a nairanta iti kanta ken kararag, agyamantayo ken Jehova gapu ti nabuslon a paraborna ken panagdayaw kenkuana. Idinto ta maysatayo a dakkel a taripnong a sumaklang ken Jehova babaen ti kararag, kayattayo kadi a matmatannatayo a kas naagum ken ingrata a tattao agsipud ta napaaytayo a nakiraman iti kanta ken kararag gapu laeng ti nalaad a panagplano? Gapuna nga awan koma iti pumanaw sakbay a malpas ti sesion ket mapanen makipila a maipaay iti taraon wenno mangala ti literatura tapno maunaan dagiti dadduma.—Mat. 7:12; Roma 12:10; Fil. 2:1-4.
8 Aramiden ti Amin a Bambanag iti Dayaw ti Dios: Kada tawen a maipaayantayo ti naanus a palagip maipapan iti pateg ti naimbag nga urbanidad ken umiso a kondukta iti kombension. Makomendaran dagiti kaaduan ti panangipngagda kadagitoy a pammalagip. Bayat a daytoy a sistema ket manungpalen, mapuersatayo a makikuyog kadagiti tattao iti panggedan ken pagadalan a ti kababalinda ket naipadto iti 2 Timoteo 3:1-5. Daytoy nga asosasion ti mabalin a dakes iti impluensiana kadatayo no ditay agannad. Ni saantayo met a kayat nga adda asinoman nga ‘agsao a maibusor kadatayo a kas managdakdakes.’ (1 Ped. 2:12) Kasapulanna daytoy kadatayo ti mas naannad a panangasikaso iti Kristiano a personalidad. Naridamtayo koma amin iti konduktatayo bayat ti kombension ken iti sadinoman a publiko, kas kadagiti motel ken restauran. Interesado koma dagiti panglakayen iti kakabsatda. (Fil. 2:4) Masapul a tumulongda ken komendaranda dagiti naimbag ti kababalinda. Riknaen met dagiti panglakayen ti mangted iti naayat a balakad no dayta ti kasapulan, nupay saanda nga am-ammo a personal iti maysa a kabsat a lalaki wenno babai. Aniaman a madlaw a serioso a problema ti masapul a maireport iti Administration Office ti kombension.
9 Ti baro a kinatao a nadakamat iti Efeso 4:24 isut’ naiyasping iti maysa a kawes a naisuot kalpasan a nauksob iti daan a kinatao. Daytoy a nagbalbaliw a kinatao ti masapul a maiyanninag met iti literal a kawestayo. Dadduma kadagiti kakabsat a lallaki ken babbai, nangruna dagiti agtutubo, ti napaliiw nga agkawes iti pangbugar wenno pang-inaldaw, saan a natakneng no dadduma. Kastoy aya ti langatayo idiay Kingdom Hall? Dadduma met kadagiti kandidato iti bautismo ti nakakamiseta iti nasuratan ti nailubongan a sasao ken logo wenno namalditan iti anunsio dagiti produkto. Dagiti panglakayen a mangirepaso ti salsaludsod kadagidiay maisagana iti bautismo ti mangsiguro a dagidiay mabautisaran ket maawatanda koma iti umiso a panagkawes a maipaay ti okasion.—Kitaenyo iti Ti Pagwanawanan a Disiembre 1, 1985 iti Iloko, ken Abril 15, 1973, pinanid 254-5, iti Ingles.
10 Adu a tattao ditoy lubong ti agkomento maipapan iti kinadalus dagiti tattao ni Jehova kadagiti kombensiontayo. Sigurado a kayattayo a masalimetmetan iti nangato a paguadan, a ditay agibelleng kadagiti papel, balkot ti kendi, wenno dadduma a basio, iti pagbaddekan. Agtutunostayo koma a mangpidut kadagiti rugittayo tapno ipisok iti basuraan wenno ikarga ti plastic bag tapno iyawid ket sadiayton nga ibelleng. No kasano a saantayo nga agibelleng ti papel iti suelo ti Kingdom Halltayo, maipakita met iti respito idiay paglugaran ti asambleatayo bayat iti kaaddatayo sadiay.
11 Tumabunotayo iti kombension tapno agtaraontayo ti naespirituan. Gapuna a maysa a saan a panagraem iti lamisaan ni Jehova no usarentayo daytoy nga okasion a panguartaan iti aniaman a wagas, a gundawayan ti dakkel a taripnong a tabunuan. Maminsan manen a mapalagipan dagiti amin nga awan ti personal a tagilako a maipalubos iti uneg ti pagkombensionan, ket dagiti laeng kukua iti Sosiedad ti maipalubos iti bookroom ken ti dadduma a departamento.
12 Dagiti Remienta a Pagirekord: Nupay maipalubos ti video camera, kiddawenmi kadagiti mangusar kadagitoy a nakonsiderarda iti dadduma, napilida no ania iti irekordda, ken nadayawda kadagidiay nalabit a dida kayat ti maretrato bayat a mangmanganda, agdengdengngeg iti programa, wenno agkararagda. Siasinoman nga agirekord iti video wenno mangusar ti recorder masapul a liklikanda iti mangsinga wenno mangdisturbo kadagiti timmabuno. Awan pagdaksanna ti agirekord iti dadduma a programa manipud ti tugawyo. Ngem bayat ti sesion, saan a maiparbeng iti siasinoman ti agdakiwas kadagiti nagbabaetan ken iti sango dagiti dumdumngeg, tapno agirekord ti programa. No kasapulan, makisao dagiti attendant kadagiti siasinoman a saan a makaipakita ti nainkabsatan nga ayat iti daytoy a banag. Pangaasiyo ta laglagipenyo nga awan iti camera wenno pagirekord a remienta a maikonekta idiay elektrikal ken sistema iti timek ti kombension, ni awan met dagiti kagawaan a maibangen iti nagbabaetan wenno lugar ti trapiko.
13 Kadagiti Nagannak: Kayatmi manen a maigunamgunam iti pateg ti panangtming dagiti nagannak kadagiti annakda iti amin a tiempo, agpada idiay uneg ken ruar ti pagkombensionan ken uray iti pagdagusan. (Prov. 29:15b; Luc. 2:48) No madama iti programa, siguruenyo nga agim-imdeng dagiti annakyo ken agalada ti nota. Bayat ti intermision adda oportunidad a makisinnarak kadagiti gagayyem iti dadduma a kongregasion.
14 Tapno mailadawan ti pateg iti panangammo no sadino ti ayan dagiti annak iti amin a tiempo, maysa a driver ti taxi iti maysa a siodad ti kombension ket nagreport iti maysa a kabsat a nakasalaw ti dua nga ubbing a babbai idiay sentro ti kombension. Nabatad a planoda ti agpasiar iti intero a malem ket nakunada idiay driver a saan kano a madanagan da nanangda kadakuada agingga ti 5:00 t.m. Daytoy driver ti taxi ket maseknan iti pagimbaganda, ngem komusta ngay kada nanangda? Anian koma a trahedia no adda kalamidad a dimteng kadakuada, malaksid laeng iti pannakaumsi ti nagan iti Dios ken dagiti tattaona!
15 Maipateg ti Naan-anay a Kooperasionyo: Kasano ti kapategna no tunggal maysa ket makitunos iti panangiturong ti Sosiedad maipapan iti itatabuno ti kombension idiay nakadutokan iti kongregasiontayo? Naannad iti panagplano ti Sosiedad ken dagiti responsable a kakabsat iti kada siodad ti kombension maipapan iti panagsagana. Ramanenna ti kaadda iti umdas a tugaw, taraon, literatura, ken dadduma pay. No adu a kakabsat ti tumabuno kadagiti kombension a saanda a nakatudingan, agresulta daytoy ti problema. Nalabit, adda sumagmamano a ti kasasaadda ket kiddawenda iti tumabuno idiay sabali a kombension. Dagiti dadduma a lugar ti kombension ket agparang a makaay-ayo gapu iti nagduduma a rason, ngem no nawadwad a porsiento dagiti kakabsat ti mangpili iti kaykayatda, mabalin nga agtinnag iti riribok.
16 Madawat ti kooperasionyo maipapan iti panagreserba ti pagtugawan. Pangaasiyo ta lagipenyo a dagiti TUGAW KET MABALIN LAENG A MAIRESERBA KADAGITI ASIDEG A MIEMBRO TI PAMILIAYO KEN ITI SIASINOMAN A MAKILUGAN KADAKAYO.
17 Maisingasing a saanyo unay nga aduen ti gargaret nga itugotyo iti kombension. No adda kagawaan a saan a mailugar iti sirok ti tugawyo, nasaysayaat no ibatiyon iti pagtaenganyo.
18 Patgen dagiti tattao ni Jehova ti kabaelanda nga agtataripnong tapno magunggonaanda iti naisagana a naespirituan a programa. Patgentayo met iti adu a serbisio ken pagnam-ayan a maipaay kadagiti kakastoy a taripnong. Babaen ti nawadwad nga annad ken gasto ti Sosiedad, naiyurnos iti umdas a pagtugawan, naipasdek iti nangina a sistema ti timek, panagandar iti Food Service Department, ken adu pay a serbisio a pagnumaran dagiti tumabuno ti kombension ken makapresko kadakuada iti naespirituan. Dagitoy a gastos iti masulnitan babaen ti boluntario a kontribusionyo kas suportar a maipaay iti sangalubongan a trabaho ti Sosiedad. Amin dagiti kontribusion iti maipateg unay, ket ti Sosiedad iyebkasna iti nasakbay a panagyaman kadakayo gapu ti nabuslon a suportaryo iti intereses ti Pagarian babaen iti kastoy a wagas. Dagiti kahon ti kontribusion isudat’ masarakan iti nagduduma a beddeng ti stadium tapno mausaryo.
19 Tabunuanyo “Dagiti Manangawit iti Lawag” a Kombension ti Distrito: Babaen ti itatabuno iti “Dagiti Manangawit iti Lawag” a Kombension ti Distrito, maragsakantayo a dumngeg no apay a daytoy panagbalin a manangawit iti lawag ket dakkel a dayaw ken pribilehio. Mapalagipantayo a daytoy ket serioso met a responsabilidad. Babaen ti panangimutektek iti labes ngem ti gagangay kadagiti bambanag a mangngegan iti kombension, maparang-aytayo ti laing ken panangipateg iti papeltayo kas manangawit iti lawag. Aramidenyo itan iti planoyo ken sapaenyo ti maadda iti amin a sesion, manipud ti panglukat a kanta iti Biernes agingga ti pangserra a kararag iti malem ti Domingo.
Dagiti Palagip iti Kombension ti Distrito
Pagdagusan: Mangipatulodkami ti abasto a Room Request forms iti kada kongregasion. Dagidiay agkasapulan ti pagdagusan iti masapul a mangsurat ti maysa kadagitoy a porma ket itedda iti sekretario ti kongregasionyo. Sitaren ken pirmaanna, kalpasanna ipatulodna idiay Watch Tower Convention iti maysa kadagiti direksion nga agparang ditoy baba.
Disiembre 18-20, 1992
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
Disiembre 25-27, 1992
Ilagan, Isabela: c/o Zosimo G. Linda, Baculod, Ilagan, 3300 Isabela.
Vigan, Ilocos Sur: c/o Pablo Nolasco, 54 Quirino Boulevard, Vigan, 2700 Ilocos Sur.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Binalonan, Pangasinan: c/o Manantan Technical School, Urdaneta, 2428 Pangasinan.
Lucena City: Kingdom Hall, 1 Granja Street, 4301 Lucena City.
Quezon City: (1): P. O. Box 2044, 1099 Manila.
San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.
Pili, Camarines Sur: c/o Bautista Marketing, Pili, 4418 Camarines Sur.
Masbate, Masbate: c/o Yolando Alburo, 56-K Tara Street, Masbate, 5400 Masbate.
Dumaguete City: c/o Alexander Echon, 110-A Springville, Tubod, 6200 Dumaguete City.
Tagbilaran City: c/o Hermenegildo Sang-an, 11 Tamblot Street, 6300 Tagbilaran City.
Bacolod City: c/o Serafin Sabordo, 68 Mabini Street, 6100 Bacolod City.
Surigao City: c/o Alfredo Alutaya, 735 Navarro Street, 8400 Surigao City.
Surallah, South Cotabato: c/o Eugenio Ordanza, Poblacion, Surallah, 9512 South Cotabato.
Mati, Davao Oriental: c/o Norberto B. Morales, 2851 Ravelo Compound, Matiao, Mati, 8200 Davao Oriental.
Davao City: c/o Cesar’s Portrait, City Hall Drive, San Pedro Street, 8000 Davao City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Kabacan, North Cotabato: c/o Eliseo Mapanao, 1245 USM Avenue, Kabacan, 9407 North Cotabato.
Enero 1-3, 1993
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Baguio City: c/o Anastacio Cruz, 47 Bayan Park Extension, Aurora Hill, 2600 Baguio City.
Alaminos, Pangasinan: c/o Roland’s Photo Service, Alaminos, 2404 Pangasinan.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Legaspi City: Kingdom Hall, Camia Street, Imperial Court Subdivision II, 4500 Legaspi City.
Puerto Princesa City: Kingdom Hall, Malvar Street, 5300 Puerto Princesa City.
Marikina, Metro Manila: P. O. Box 2044, 1099 Manila.
Quezon City (2): P. O. Box 2044, 1099 Manila.
Cavite City: Kingdom Hall, 497 Padre Pio Street, Caridad, 4100 Cavite City.
Cebu City: c/o Parcon’s Machine Shop, Bagumbayan Street, 6000 Cebu City.
Catbalogan, Western Samar: c/o Juana Cinco, 537 San Francisco Street, Catbalogan, 6700 Western Samar.
Iloilo City: 65 Escarilla Subdivision, Mandurriao, 5000 Iloilo City.
General Santos City: c/o Clarustino Labrador, P. O. Box 122, 9500 General Santos City.
Digos, Davao del Sur: c/o Zosimo Tagalog, Post Office, Digos, 8002 Davao del Sur.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Cagayan de Oro City: Kingdom Hall, F. Abellanosa Street, 9000 Cagayan de Oro City.
Oroquieta City: c/o Luis Tuanggang, 25 Naranjo Street, Lower Lamac, 7207 Oroquieta City.
Bautismo: Masapul dagiti kandidato ti bautismo nga addadan iti naituyang a benneg a pagtugawanda sakbay a mangrugi ti programa iti agsapa ti Sabado. Maysa a natakneng a kawes a pagbabasa ken tualia ti itugot iti tunggal maysa a nakaplano nga agbautisar. Kalpasan iti palawag ti bautismo ken iti kararag ti nagpalawag, mangted iti ababa nga instruksion ti tserman iti sesion kadagiti kandidato ti bautismo ket kalpasanna agpakanta. Kalpasan ti maudi a bersikulo, dagiti kandidato iti bautismo ti iturong dagiti attendant idiay lugar a pangitaneban wenno kadagiti lugan a mangiturong kadakuada sadiay. Idinto ta ti bautismo a simbolo iti dedikasion ket maysa a nasinged ken personal a banag ti nagbaetan iti maysa a tao ken ni Jehova, awan koma daydiay maawagan nga aggiddan a maitaneb ti dua wenno ad-adu a kandidato babaen iti panagrakep wenno panagkapet dagiti imada no mabautisaranda.
Dagiti Espesial a Miting: Maysa a miting ti maaramid kadagiti amin a regular ken espesial payunir ken managdaliasat a manangaywan iti 11:15 t.a. ti Biernes, bayat met a ti miting kadagiti amin a panglakayen ken ministerial nga adipen isut’ maaramid iti 11:15 t.a. ti Sabado. Ti paglugaran dagitoy a miting ti maiyanunsio manipud iti plataporma.
Pioneer Identification: Amin a regular ken espesial payunir ken managdaliasat a manangaywan ti agkasapulan a mangitugot iti bukodda nga Identification and Assignment card (S-202) iti kombension. Dagiti payunir iti listaan manipud Hulio 1, 1992 wenno sakbay dayta a petsa ti umawat iti ₱80.00 a gatad ti tiket iti kombension no idatagda ti ID a kard nga agpaay iti maysa laeng a kombension. Tratuen dagiti kard a siaannad a kas kuarta. Saan a masukatan dagitoy idiay kombension.
Boluntario a Serbisio: Kasapulan iti boluntario a tulong a maipaay ti naannayas nga andar iti kombension ti distrito. Nupay paset laeng iti kombension ti kabaelanyo a panagtrabaho, maipateg unay ti serbisioyo. No makatulongkayo, pangaasiyo ta agreportkayo idiay Volunteer Service Department apaman a makasangpetkayo iti kombension. Dagiti ubbing nga agedad ti nababbaba ngem iti 16 ti makaipaay met iti balligi ti kombension, ngem kasapulan a makipagtrabahoda a kadua dagiti nagannakda wenno sabali a responsable a nataengan.
Dagiti Lapel Cards: Pangaasiyo ta ikapetyo dagiti naigagara a nadisenio a lapel card ti kombension bayat nga agbiahekayo a mapan ken agawid manipud iti lugar ti kombension. Masansan a mangaramid daytoy kadatayo iti nasayaat a pammaneknek bayat ti panagbiahe. Dagiti lapel card ti maala babaen iti kongregasion, ta saan a maala dagitoy idiay pagkombensionan. (Nota iti sekretario: Dagiti lapel card ti masapul koman a napedido babaen iti Special Order Blank for Forms. Ngem no saan pay a naaramid daytoy, mangipatulodkayo itan ti regular nga S-14 a pagpediduan kadagitoy.)
Pakdaar iti Panagannad: Uray sadino ti tabunuanyo, annadanyo dagiti sanikuayo iti amin a tiempo. No adda luganyo, siguruenyo a serraan ken dikay mangibati ti napapateg a bambanag iti naiparke a lugan. Kasta met nga agaluadkayo kadagiti mannanakaw ken managkaut ti bulsa, isuda a maatrakar iti dadakkel a taripnong. Ramanenna daytoy ti saan a panangibati a mabaybay-an iti aniaman a napateg a bambanag kadagiti pagtugawan ti kombension. Pangaasiyo ta agannadkayo.