Iyurnosyo Itan ti Tumabuno iti 1991 “Managayat ti Wayawaya” a Kombension ti Distrito
1 Maigapu iti sasaaden daytoy lubong ita, saan a nakaskasdaaw a kadagiti adu a pagilian dagiti tattao ket aggarasugasda a maipaay iti ad-adu pay a wayawaya. Ngem sadino ti pakasarakan iti napudno a wayawaya? Kinuna ni Jesus: “No agtalinaedkayo iti sasaok, dakayo dagiti pudno a disipulok, ket maammuanyonto ti kinapudno, ket ti kinapudno wayawayaannakayto.” (Juan 8:31, 32) Daytoy a wayawaya ket saan a maysa a limitado a kita ti wayawaya a namnamaen dagiti tattao no agtukkiadda iti maysa a porma ti gobierno a pabor iti maysa a sabali. Imbes, isut’ mangiramut agingga iti bugas dagiti natauan a problema. No ania a wayawaya ti nadakamat ni Jesus isu daydiay wayawaya manipud iti panangadipen ti basol. (Kitaenyo iti Juan 8:24, 34-36.) Gapuna, no ti maysa a tao ket agbalin a pudno a disipulo ni Kristo Jesus, agresulta iti madlaw a panagbalbaliw iti biagna, maysa a pannakawayawaya.
2 TALLO NGA ALDAW A KOMBENSION: Dagiti serye iti 1991 a “Managayat ti Wayawaya” a Kombension ti Distrito isut’ mangrugi ditoy Pilipinas inton Disiembre 13-15, 1991. Ti panglukat a sesion isut’ mangrugi iti alas 8:50 t.a. ti Biernes, ket ti kombension isut’ agngudo iti alas 4 t.m. ti Domingo. Dagiti naannad ti pannakapilida nga impormasion a nasken iti espiritual a salun-attayo isuda ti maidatag iti kada sesion. Adda nagduduma a suheto a mailawlawag no kasano a ti wayawaya a nadakamat iti Roma 8:21 ket magun-odtayo. Makapakaradkad nga impormasion dagiti maputar ken maidatag babaen kadagiti palawag, demostrasion, interbio, ken maysa a drama.
3 Aramidenyo a resolusion a dikay saawen iti uray maysa a sesion. Nalabit a kasapulanyo ti personal a sakripisio ken panangihusto iti iskediolyo. Mabalin a maaramid iti espesial nga urnos kadagiti amo ti panggedanyo. Aduda dagiti agpalugi iti pinansial a ganansia tapno matabunuanda laeng dagiti amin a sesion. Pudno a bendisionan ni Jehova dagidiay a mangaramid iti daytoy a banag a kas suheto ti napasnek a kararagda ket ikagumaanda iti maadda sadiay.—Luc. 13:24.
4 SUMANGPETKAYO A NASAPA: Agdindinnamag dagiti Saksi ni Jehova maipapan iti kinamapagpiaran ken kinamanagsapsapa. (Luc. 16:10) Nasken met daytoy iti itatabuno ti kombension iti distrito. Sumangpetkayo koma a nasapa iti kada aldaw, a nakatugawkayon sakbay a mangrugi ti programa. Kasapulanna daytoy ti umdas a tiempo a mangtaming kadagiti bambanag a kasapulan iti kombension, kas iti panangiparke ti luganyo ken panangsapul iti pagtugawan ti pamiliayo.
5 Ti itatabuno iti kombension ti distrito isut’ mangted kadatayo iti naimbag a gundaway a masagrap iti naragsak nga asosasion. Ngem ti panangbisita kadagiti gagayyem agingga iti tengnga ti rabii isut’ manglapped iti kinasapatayo ti sumaruno nga aldaw. Nawadwad a pannakataktak ken pannakapaay ti agresulta no naladaw ken agapuratayo iti kabigatanna. Tapno maparukma daytoy, makagunggona no sapaen ti maturog iti rabii ken nasapatayo a nakasagana iti sumaruno nga agsapa. Iti kasta maliklikan ti panagsangpet a madaman iti programa, a daytoy ket makasinga ken mabalin a makapasikor pay kadagidiay a nakatugawen. Ti nasapa nga isasangpet isut’ mangipalubos iti pannakilangen kadagiti kakabsat. Ti Kristiano nga ayat ken konsiderasion, agraman panagraem ken Jehova ken kadagiti espiritual a bambanag a maipaay, isuda koma ti mangtignay kadatayo a sumangpet a nasapa iti kada aldaw.
6 AGIMDENGKAYO A NAIMBAG: Ti panagdengngeg kaipapananna iti napudno a panagimdeng nga agpadpada iti panunot ken puso. Kasapulan ti panagimdeng ken “dumngeg iti sao ni Jehova.” (Jer. 2:4) Iti Isaias 55:2 imbilin ni Jehova iti Israel: “Umimdengkayo a sipapasnek kaniak.” Ti sao a “napasnek” isut’ nadepinar a kas “direkta a buyogen iti nainget wenno nagagar nga asikaso.” No atentibotayo, sigagagartayo a “dumngeg ken dumegdeg iti pannakasursuro.” (Prov. 1:5) Ti panagdengngeg ken panagsursuro iti kombension ti distrito isut’ masansan a mangala iti mas napinget nga asikaso ngem ti kaadda iti Kingdom Hall. Apay? Agsipud ta nakatugawtayo iti napapaut a periodo ti tiempo, ken ad-adu dagiti makasinga gapu iti kawadwad ti umariwekwek a timmabuno. No saantayo nga atentibo, masaawtayo dagiti nabaknang nga espiritual a taraon a maidasar kadatayo. (1 Ped. 2:2) Ania ngarud ti maaramid? Makaparagsak a mapaliiw nga adu kadagiti delegado iti kombension ti mangala kadagiti nota kabayatan iti programa. Bayat a dadduma kadagiti palawag iti kombension ti distrito ket agparangdanto kadagiti publikasion, dagiti dadduma ket saan. Maparegta ngarud dagiti amin a mangalada iti ababa a nota bayat iti kombension ti distrito agsipud ta dayta iti naimbag a wagas a mangiroskas ti asikasotayo kadagidiay a maipalawag.
7 Saan a kasapulan nga atiddog wenno nalabor dagiti nota. Masansan a ti maysa wenno dua a prasa ket umdasen a maipaay iti maysa a nasken a punto. Uray dagiti ubbing ket makagun-odda met iti nawadwad kadagiti palawag ken makatulong kadakuada nga agimdeng no maikkanda ti notebook ken pen wenno lapis tapno maisuratda dagiti panulbek a puntos daydiay ispiker ken dagiti basaran a kasuratan wenno baro a kapanunotan a maidatag. Masarakan dagiti panglakayen a makagunggona no sidadalimanet a maurnos dagitoy a nota a maipaay iti maikondukta a narayray a repaso inton programa iti Gimong ti Serbisio a sumaruno iti kombension ti distrito. Mabalin a kayatda met nga ikalammiat dagiti adu a puntos a naidatag iti kombension bayat dagiti panangisuro ken panangipastor a trabahoda.
8 MAKIKAYSAKAYO ITI KANTA KEN KARARAG: Kas paset iti panagdayawtayo masapul nga iramantayo ti panagraem ken Jehova babaen iti panagkanta ti dayawna, kas inaramid idi ni Jesus ken dagiti apostolna. (Mar. 14:26) Iti sasao ni Pablo iti 1 Corinto 14:15 agparang a ti panagkanta isut’ maysa a regular a benneg iti Kristiano a panagdaydayaw. (Kitaenyo met Ti Ministeriotayo iti Pagarian nga Abril, 1991, panid 7.) Ipaay dagiti kombension ti distrito kadatayo iti uniko wenno nagpaiduma nga oportunidad a makikaysa kadagiti rinibo a kakabsattayo a mangidayaw ken Jehova nga agpadpada iti kanta ken kararag. Nupay kasta, adda dadduma a nangipakita ti kurang a panagraem kadagitoy a nasken a paset iti panagdayawtayo. Kasano? Babaen ti saan nga umiso a panagsangpetda iti kombension kabayatan wenno kalpasanen iti panglukat a kanta ken kararag. Iti ngudo ti programa, adda dadduma a pumanawdan manipud iti tugawda kabayatan ti kanta wenno sakbay pay iti kararag. Iti karkarna nga okasion mabalin nga adda naimbag a rason a mangaramid iti dayta. Agpapan kasta, maipakita ngata ti umiso a panagraem iti lamisaan ni Jehova no dagiti dadduma ket saandan a makipagkanta ken makipagkararag a sangsangkamaysa tapno makaunada laeng a mapan mangan ken makasakay iti luganda?—Mat. 6:33.
9 Masalimetmetan met koma iti panagannadtayo maipapan ti bukod laeng a pagnam-ayan, a ditay palubosan iti nailubongan a siak-ti-umuna a kapanunotan wenno kababalin kas iti kinabuklis ken kinaagum nga isuda ti mangatipa iti espiritual a progresotayo. Iti kallabes a tawtawen, adu dagiti kakabsattayo iti Makindaya a Europa ti nakagun-od iti kamaudiananna ti naragsak a wayawaya nga agkanta ken agkararag. Kas kadakuada a nabang-aran a siwayawayada a makipagkanta ken makipagkararag a kadua iti nawadwad a bilang, kasta met koma ti ipakitatayo nga espiritu iti panangipateg itan a maipaay iti sagrado a bambanag ken ditay koma laglag-anen iti gundawaytayo nga agkanta ken agkararag a sangsangkamaysa.
10 TI KRISTIANO NGA URBANIDADTAYO: Ti Kristiano nga urbanidad ken langatayo kadagiti kombension ti distrito isut’ agtultuloy a nakagun-od iti naimbag a reputasion wenno pakasasawan kas Saksi ni Jehova. Maigapu daytoy iti kinaseriosotayo iti panagdayaw ken Jehova ken gapu ta ditay matmatan iti itatabuno ti kombension a kas maysa laeng a sosial a rambak. No agtitimpuyogtayo kadagiti kakastoy nga espesial a taripnong, masapul a salimetmetantayo iti Kristiano a dignidad ken ti maysa nga espiritual a sukog iti panunot babaen ti panagtignaytayo a kas ministro iti amin a tiempo.—1 Cor. 10:31-33.
11 No mapaaytayo a mangaramid iti daytoy, maapektarantayo ti ragsak dagiti dadduma, ken mabalin a maitibkoltayo pay dagiti agdadamo. Mapagyamanantayo kadi uray dagiti babassit laeng a bambanag a naipakita kadatayo? Masapul koma a sipupuottayo kadagiti adda iti aglawlawtayo babaen ti panangipakita iti panagraem ken konsiderasion. Patgen ti tunggal maysa a no madama iti programa, isut’ tiempo ti panagimdeng, saan a tiempo iti panagpagnapagna wenno panagsasarita.—Deut. 31:12.
12 Iti sabali a bangir a ti Kristiano nga urbanidad wenno kababalin ket isarmingna ni Jehova a Dios isu daydiay pannakilangentayo kadagiti nangsangaili kadatayo. No addatayo kadagiti motel, masapul a maipakita ti panangipateg ken kinakonsidera kadagiti empleadoda, babaen ti kinadayaw ken saantayo unay a namandar. (Gal. 6:10) Adda dadduma a Saksi a nagpakada kadagiti motel ken pimmanawda kadagiti kuartoda a nawarawara ti langana. Masapul a maipakita ti kinadalus ken konsiderasion saan laeng nga iti panagkawes ken kondukta ngem kasta met iti wagas ti panangtrato iti sanikua dagiti dadduma. No dagiti autoridad ti stadium ket siaanus a mangipalubos nga usaren iti benneg dagiti sanikuada a pagdagusan, iti kasta kasapulan a mataginayon daytoy a nadalus ken nadalimanet, ken masapul a dalusantayo dagiti kuarto ken panawan dagitoy iti naimbag a kasasaad kalpasan ti kombension. Wen, iti umay a kombension ti distrito, ikagumaan nga ikeddengtayo amin ti agtignay a maiparbeng tapno “maarkosan iti sursuro ti Manangisalakantayo, a Dios, iti amin a bambanag.”—Tito 2:10.
13 Kadagiti dadduma a kombension nadlaw idi napan a tawen nga adda nawadwad a basura a nabati iti assembly hall. Adu a pedaso ti papel, balkot ti kendi, botelia, ken dadduma a pagkargaan, ti nabati a nakawara iti aglawlaw dagiti pagtugawan. Sigurado a daytoy ket saanna nga ipakita ti panagraem iti nagan ni Jehova ken saan met a konsiderasion kadagidiay a natudingan nga agdalus kalpasan ti ipapanawtayo. Siguruenyo a piduten iti aniaman a nakawara ken ibellengyo ida kadagiti basuraan, ngem no saan nga umdas dagitoy, mabalin nga iyawidtayon dagitoy tapno sadiayton a maibelleng.
14 Iti kombension masapul a ti panunottayo ket maisentro kadagiti espiritual a bambanag. Maysa ngarud a di panagraem iti lamisaan ni Jehova no usarentayo daytoy nga okasion iti negosio wenno aniaman a gakat a panguartaan, a gundawayan iti dakkel a taripnong dagiti kakabsat a tumabuno. Maminsan manen nga ipalagipmi kadagiti amin nga awan ti personal a tagilako a maipalubos iti lugar a pagkombensionan, ket dagiti laeng bambanag a kukua ti Sosiedad iti maipalubos idiay bookroom ken kadagiti dadduma pay a departamento.
15 Maitunos kadagiti adda iti ngato, dagiti departamento ti represko isudat’ agserra kabayatan dagiti sesion ti kombension, gapuna a nasken nga alaenyon no ania dagiti kasapulanyo iti nagbaetan dagiti sesion. Iti kastoy a wagas mabalin a maipamaysayo ti dumngeg kadagiti maisawang idiay plataporma, agraman dagiti agtartrabaho kadagiti departamento ti reprekso.
16 PARA KADAGITI NAGANNAK: Maabrasa ken manamnama dagiti ubbing ken agtutubo a tumabuno iti “Managayat ti Wayawaya” Kombension ti Distrito. Ti wayawaya a maitukon daytoy lubong isut’ mangiturong iti espiritual nga ipapatay, a kas ken Adan a napukawna ti wayawaya a naited iti sangatauan idi damo. Ti naayat nga organisasion ni Jehova isut’ nangipaay kadatayo iti amin a buyogen ti umiso a rason iti daytoy a banag. Maparegtatayo a kumita kadagiti agtutubo a nakaadal a dumngeg a siaasikaso kadagiti amin a gimong dagiti Kristiano ken sipapasnekda nga agimdeng iti programa ti kombension. (Sal. 148:12, 13) Ngem agpannuray dayta iti ehemplo ken panangimaton dagiti nagannak. Adu dagiti agtutubo ti nasanay a naimbag a mangala iti nota. No saanyo pay a nasuruan dagiti annakyo no kasano ti panangala iti nota, apay a dikay mangusar iti natda a tiempo sakbay ti kombension a mangaramid iti dayta? Uray dagiti babassit nga ubbing ket maparegtada a mangisurat kadagiti sitasion ti kasuratan ken dagiti naisinggalut a panulbek a sasao a mangngegda nga iyebkas dagiti ispiker. Dadduma kadagiti nagannak ti mangiyurnos iti repaso kadagiti kangrunaan a puntos manipud ti kada aldaw a programa kalpasan iti panagawidda idiay dagusda wenno inton agbiaheda nga agawid iti balayda.
17 Siempre, kaaduan kadagiti nagannak iti makaawat a ti natural a turong dagiti ubbing isut’ panagay-ayam. Kurang pay ti kapadasanda iti biag, ken addada iti kinaganus. Gapuna, masapul a masuruanda no kaano ken kasano iti panagimdeng ken panagulimekda kadagiti gimong. Sapulenna daytoy iti naimbag a panangidarirag dagiti nagannak. Dadduma kadagiti nagannak ti nalukay iti daytoy a banag. No dadduma, nupay dagiti nagannak ket ipakpakitada iti umiso a panagraem ken Jehova kabayatan ti kararag, dagiti annakda ti agtultuloy nga agay-ayam ken makasinga iti dadduma. Masapul nga ammo dagiti nagannak no ania ti ar-aramiden dagiti annakda kabayatan iti panagkararag. Kasta met, ania ti ar-aramidenda no pumanawda kadagiti tugawda bayat ti programa? Adda aya ubbing a saan a maay-aywanan kabayatan ken kalpasan iti programa ti kombension?—Prov. 29:15.
18 Iti dadduma a kaso dagiti ubbing ti saan a maaywanan iti rumabii, no dagiti nagannak ket rummuarda a mapan mangan wenno agtrabaho. Saan nga umiso daytoy. Addada dagiti ubbing a nabangad ken saan a naraem kadagiti nataengan a kakabsat isuda a mangpadas a mangbabalaw kadakuada iti naanus a wagas. Ti kasta a kinaalikuteg isut’ masansan a resulta iti kinapanuynoy ken kinakurang ti disiplina idiay pagtaengan. Masapul a mapalinteg daytoy. Rebbeng dagiti amin a Kristiano a nagannak nga ipaay iti nasinged a panangaywan kadagiti annakda iti amin a tiempo bayat ti “panangpadakkel kadakuada iti disiplina ken makaiturong iti panunot ni Jehova.”—Efe. 6:4.
19 MAIPATEG TI NAAN-ANAY A KOOPERASIONYO: Maaramid ti nasakbay a plano nga adda umdas a pagtugawan, literatura, taraon, ken dadduma pay a kasapulan a maipaay iti tunggal maysa a tumabuno ti kombension. Tapno maisiguro ti kaepektibo dagitoy nga urnos, kada kongregasion ti natudingan iti maysa a masinnunuo a kombension. Ti naan-anay a kooperasionyo isut’ nasken tapno malapdan ti panagdaragup. Siempre, nalabit nga adda sirkumstansia a kasapulan dagiti sumagmamano ti mapan tumabuno iti kombension idiay sabali a lugar. Nupay kasta, kaaduan ti masapul a makabael a tumabuno idiay kombension a nakatudinganda a papanan.—1 Cor. 13:5; Fil. 2:4.
20 Makiddaw ti naan-anay a kooperasionyo maipapan iti panangsalbar ti pagtugawan. Laglagipenyo a dagiti PAGTUGAWAN TI MAILAK-AM LAENG KADAGITI ASIDEG A MIEMBRO TI PAMILIA KEN DAGIDIAY MABALIN A MAKISAKAY ITI BUKODYO A LUGAN. Pangaasiyo ta dikay agreserba ti pagtugawan iti sabsabali. No dadduma, adda ekstra a tugaw a maireserba iti saan a partikular a tao. Daytoy ket saan a naayat a banag ken makaallilaw kadagiti attendant ken kadagiti dadduma nga agsapsapul ti pagtugawanda. Maitunos iti balakad ti Biblia, ikagumaantayo nga ipakita ti nainkabsatan nga rikna ken makitunostayo a naan-anay iti naanamongan nga urnos maipapan ti panagreserba ti pagtugawan. Awan ti maikari iti nasursurok a pagtugawan ngem iti daydiay umdas nga agpaay iti pamilia wenno grupoda iti pagluganan.—2 Ped. 1:7.
21 Saan a maipalubos ti panangsalbar iti pagtugawan nga agpatnag. Dagidiay sumangpet a nasapa iti kabigatanna ti masapul nga istrikto a mangalagad kadagitoy nadakamat iti ngato a giya maipapan ti panagreserba iti pagtugawan. Dagiti attendant ti masapul nga adda iti naidutok a lugarda a nasapa iti kada bigat tapno imatonanda no ania ti masapul a maaramid, tapno maliklikan iti panangabuso iti daytoy giya ti Sosiedad maipapan iti panagreserba ti pagtugawan. Pangaasiyo ta makitunoskayo koma a naan-anay kadagiti attendant bayat a tungpalenda ti pagrebbenganda a pagimbagan dagiti amin a tumabuno.
22 Maisingasing a mausar ti naimbag a panangutob no itugot dagiti personal a kagawaan iti pagkombensionan. Adda dagidiay mangitugot iti napadiwakal a kagawaan a narigat a maipuesto iti pagtugawan ket agtinnag a mailugarda kadagiti pagnaan wenno iti mismo a pagtugawan. Agbanag daytoy a mapaidaman dagiti dadduma iti pagtugawan, ket no dadduma makaserrada pay iti pagnaan. Masapul a maipakita ti umiso a konsiderasion kadagitoy a bambanag.
23 Sigurado, dagiti tattao ni Jehova ket tagipatgenda ti panagtataripnong kadagiti napintas a pasilidad tapno magunggonaanda iti espiritual a programa a naisagana. Patgentayo met dagiti adu a serbisio ken pagnam-ayan a maipaay kadagitoy a panaguummong. Babaen iti naannad a taripato ken kalalainganna a gasto ti Sosiedad, maurnos iti kaadda ti umdas a pagtugawan, maipuesto dagiti nangina a sound system, agandar iti Food Service Department, ken maimatonan dagiti dadduma nga urnos ken serbisio a mangaramid a ti itatabuno iti kombension ket makaparagsak ken makapresko iti espiritual.
24 Dagitoy a paggastuan ti masulnitan iti boluntario a kontribusion kas suporta iti sangalubongan a trabaho ti Sosiedad. Maipaay a kombeniente kadakayo, nabatad iti pannakamarka dagiti kahon ti kontribusion a masarakan iti intero a pasilidad ti kombension. Maipateg unay dagiti amin a kontribusion, ket kayat ti Sosiedad nga iyebkas iti nasakbay a panagyaman kadakayo gapu iti kinamanagited ken pannakikaysayo a mangsuporta iti intereses ti Pagarian iti kastoy a wagas. Agtalekkami nga amin ket matignay iti riknada a maipaay iti responsabilidad ti tunggal maysa kadagitoy a paggastuan ken makitunosda a naan-anay babaen ti pannakiramanda agingga iti aniaman a banag nga ipalubos ti kasasaadda.—Luc. 6:38.
25 ADDAKAYO KOMA INTON “MANAGAYAT TI WAYAWAYA” A KOMBENSION! Babaen ti itatabuno iti “Managayat ti Wayawaya” a Kombension ti Distrito ken agimdeng a naimbag iti programa, maparnuay ti panangipategtayo iti wayawaya a dumteng babaen ken Kristo ken maipaay iti umiso nga usar ti Kristiano a wayawaya. Aramidenyo itan ti plano a makagteng iti panglukat a kanta ken tumabuno iti amin a sesion agingga nga agngudo babaen ti kararag iti malem ti Domingo.
[Kahon iti panid 6]
Dagiti Palagip iti Kombension ti Distrito
PAGDAGUSAN: Mangipatulodkami iti abasto a Room Request a porma iti kada kongregasion. Dagidiay agkasapulan iti pagdagusan ti masapul a mangsurat iti maysa kadagitoy a porma a maited iti sekretario ti kongregasion iti kongregasionyo. Usisaenna daytoy ken pirmaanna, sa ipatulodna iti Watch Tower Convention iti maysa kadagiti direksion nga agparang ditoy baba.
Disiembre 13-15, 1991
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
Disiembre 20-22, 1991
Ilagan, Isabela: c/o Zosimo G. Linda, Baculod, Ilagan, 3300 Isabela.
Vigan, Ilocos Sur: c/o Pablo Nolasco, 54 Quirino Boulevard, Vigan, 2700 Ilocos Sur.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Lucena City: Kingdom Hall, 1 Granja Street, 4301 Lucena City.
Quezon City: P. O. Box 2044, 1099 Manila.
San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.
Dumaguete City: c/o Alexander Echon, 110-A Springville, Tubod, 6200 Dumaguete City.
Tacloban City: 186 M. H. del Pilar Street, 6500 Tacloban City.
Tagbilaran City: c/o Hermenegildo Sang-an, 11 Tamblot Street, 6300 Tagbilaran City.
Bacolod City: c/o Serafin Sabordo, 68 Mabini Street, 6100 Bacolod City.
Surigao City: c/o Alfredo Alutaya, 735 Navarro Street, 8400 Surigao City.
General Santos City: c/o Clarustino Labrador, P. O. Box 122, 9500 General Santos City.
Mati, Davao Oriental: P. O. Box 6, Mati, 8200 Davao Oriental.
Davao City: c/o Cesar’s Portrait, City Hall Drive, San Pedro Street, 8000 Davao City.
Pagadian City: Kingdom Hall, V. Sagun Street, 7016 Pagadian City.
Tantangan, South Cotabato: c/o Liberato Supnet, New Cuyapo, Tantangan, 9510 South Cotabato.
Disiembre 27-29, 1991
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Baguio City: c/o Anastacio Cruz, 47 Bayan Park Extension, Aurora Hill, 2600 Baguio City.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Puerto Princesa City: Kingdom Hall, Malvar Street, 5300 Puerto Princesa City.
Marikina, Metro Manila: P. O. Box 2044, 1099 Manila.
Cavite City: Kingdom Hall, 497 Padre Pio Street, Caridad, 4100 Cavite City.
Cebu City: c/o Parcon’s Machine Shop, Bagumbayan Street, 6000 Cebu City.
Iloilo City: 65 Escarilla Subdivision, Mandurriao, 5000 Iloilo City.
Kidapawan, North Cotabato: c/o Ponciano Dongog, P. O. Box 34, Kidapawan, 9400 North Cotabato.
Surallah, South Cotabato: c/o Eugenio Ordanza, Poblacion, Surallah, 9512 South Cotabato.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Cagayan de Oro City: Kingdom Hall, F. Abellanosa Street, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Enero 3-5, 1992
Urdaneta, Pangasinan: c/o Manantan Technical School, Urdaneta, 2428 Pangasinan.
Masbate, Masbate: c/o Yolando Alburo, 56-K Tara Street, Masbate, 5400 Masbate.
BAUTISMO: Masapul nga ikagumaan dagiti kandidato ti bautismo iti maadda kadagiti tugawda idiay nairanta a paglugaranda sakbay a mangrugi ti sesion iti agsapa ti Sabado. Maysa a kalalainganna a kawes a pagbabasa ken tualia ti itugot dagidiay a nakaplano a pabautisaran. Kalpasan ti palawag iti bautismo ken kararag babaen ti ispiker, mangted ti tserman iti sesion ti ababa nga instruksion kadagiti kandidato ti bautismo ken iyawisna iti panagkanta. No mangrugin iti maudi a bersikulo, iturong dagiti attendant dagidiay kandidato iti bautismo idiay lugar ti pangitaneban wenno kadagiti behikulo a mangiturong kadakuada sadiay, bayat a dagiti nabati a timmabuno ket iringpasda iti panagkanta. Idinto ta ti bautismo ket simbolo iti dedikasion ti maysa a tao iti nasinged ken personal a banag ken Jehova, awan ti urnos a maipaay iti maawagan nga agkadua iti bautismo, a dua wenno ad-adu a kandidato iti bautismo ti agrakep wenno agkapet iti imada bayat a mabautisaranda.
DAGITI ESPESIAL A MITING: Maysa a miting ti maaramidto kadagiti amin a regular ken espesial payunir ken dagiti agbambaniaga a manangaywan iti 11:15 t.a. ti Biernes, bayat a maysa met a miting ti agpaay kadagiti amin a panglakayen ken ministerial nga adipen ti maaramidto iti 11:15 t.a. ti Sabado. Ti lugar dagitoy a miting isut’ maiyanunsio manipud iti plataporma.
PIONEER IDENTIFICATION: Amin a regular ken espesial payunir, agraman dagiti agbambaniaga a manangaywan, ti agkasapulan a mangitugot iti bukodda nga Identification and Assignment card (S-202) iti kombension. Dagiti payunir iti listaan manipud ti Hulio 1, 1991 wenno sakbay daytoy a petsa ti mabalin nga umawat iti ₱80.00 ti balorna a tiket iti kombension babaen ti panangiparangda iti ID card iti dayta maysa a kombension laeng. Tratuenyo daytoy a card a kas kuarta. Saan a masukatan dayta idiay pagkombensionan.
BOLUNTARIO A SERBISIO: Kasapulan ti boluntario a tulong a maipaay iti naannayas nga andar iti kombension ti distrito. Uray no mabalinanyo laeng ti agtrabaho iti maysa a paset ti kombension, maipateg dagiti serbisioyo. No makatulongkayo, pangaasiyo ta agreportkayo iti Volunteer Service Department apaman a makasangpetkayo iti kombension. Dagiti annak a nababbaba ngem ti 16 iti edadda ti makabadang met iti balligi ti kombension, ngem kasapulan a makipagtrabahoda a kadua ti nagannakda wenno maysa a mapiar nga adulto.
LAPEL CARDS: Pangaasiyo ta ikapetyo dagiti espesial ti diseniona a lapel card iti kombension bayat nga agbiahekayo nga agpapan ken agawid manipud pagkombensionan. Masansan a pangipuonan daytoy iti maited a nasayaat a pammaneknek bayat ti panagbiahe. Maala dagiti lapel card babaen ti kongregasion, agsipud ta saankayo a makaala kadagitoy idiay pagkombensionan. (Nota iti sekretario: Dagiti lapel card ti mapedido babaen iti Special Order Blank for Forms. No saan pay a naaramid daytoy, ipatulodyon a dagus babaen iti regular nga S-14 a pagpediduan.)
SASAO A PAMMAKDAAR: Uray sadinoman ti tabunuanyo, saluadanyo dagiti sanikuayo iti amin a tiempo. No adda luganyo, siguruenyo a serraan ken dikay mangibati kadagiti napateg a bambanag iti uneg ti nakaparke a luganyo. Agannadkayo met kadagiti mannanakaw ken managsipdut ti bulsa, isuda a maatrakar kadagiti dadakkel a taripnong. Ramanenna daytoy ti saanyo a panangpanaw kadagiti napateg nga alikamenyo nga awan ti agbantay kadagiti tugaw iti kombension. Pangaasiyo ta agannadkayo.