Saludsod
● Sakbay a maanamongan iti bautismo, iti ania a beddeng a ti saan pay a bautisado nga agibumbunannag ket makiramramanen iti tay-ak ti ministerio?
Ti maysa a maikari kas saan pay a bautisado nga agibumbunannag isut’ nangipakitan iti nabileg a tarigagay nga agbalin a Saksi ni Jehova. (Sal. 110:3) Binaliwannan ti pampanunot, kababalin ken kabibiagna. Regularen a makitimtimpuyog kadagiti tattao ni Jehova kadagiti gimong ken asamblea. (Heb. 10:24, 25) Mabalin a natignay metten nga agkomento manipud pusona kadagiti gimong, ket nalabit a nakapalista metten iti Teokratiko a Pagadalan iti Ministerio.—Sal. 40:9, 10; om p. 73.
Apaman a ti maysa nga estudiante ti Biblia ket ipakitana ti napudno a panangipateg iti mensahe ti Pagarian, mabalinna metten ti makiraman iti pribilehio ti panagbalaybalay a ministerio. (Mat. 24:14; 28:19, 20; om p. 111) Iti daytoy a punto, agpadpada ti agibumbunannag a mangidadaulo iti panagadal ken dagiti panglakayen ti kasapulan a mangsiguro no iti intero a panagbiag daytoy nga estudiante ket maitunosen iti Kristiano a prinsipio. Masapul nga addaan iti napasnek a tarigagay a makiraman iti panangasaba ken panagaramid iti disipulo a trabaho.—Gal. 6:6; w88 11/15 p. 17; om p. 98-9, 174.
Saan a kasapulan a mabayag unay manipud pannakaikari daytoy nga estudiante ti Biblia a kas agibumbunannag agingga nga idatagnan ti bagina iti bautismo. Idinto ta agkurang pay ti kapadasan iti publiko a ministerio, masapul a mapalubosan iti umdas a kapaut ti tiempo a mangipakita nga isu ket determinado nga maaddaan iti regular ken napinget a pannakipaset iti tay-ak ti ministerio.—Sal. 40:8; Roma 10:9, 10, 14, 15.
Iti kanito a daytoy a tao ket nakasaganan a maipaay iti bautismo, masapulen a regular a mangiranranud iti naimbag a damag iti sabsabali, a mangusar iti nasursurok ngem ti basta maysa wenno dua nga oras idiay tay-ak iti kada bulan. (w84 6/1 p. 8 par. 2) Siempre, ti personal a kasasaad iti kada agngayangay iti bautismo ti masapul met a marepaso. Dagiti panglakayen ti maidalan babaen iti panangiwardas a naited idiay panid 174 iti Ti Ministeriotayo a libro: “Babaen iti naayat a tulongyo, dagidiay a mabautisaran ti maparegta ken matulongan a sumrek iti Kristiano a ministerio, a naan-anay a nakasagana a mangitungpal iti dayta a napateg a nakatudingan a trabaho.”—Mat. 16:24; Juan 4:34; 1 Ped. 2:21.