Agtalinaed a Siririing ken Sisasalukag
1 Maigapu iti agbaliwbaliw a kasasaad ti lubong, anian a maibagay a ti tema ti asamblea sirkito para ti 1991 ket “Agtalinaed a Siririing ken Sisasalukag.” (1 Tes. 5:6) Daytoy a serye ket mangrugi intono Pebrero, 1991. Amintayo kasapulan a mangaramid kadagiti panagsagana a tumabuno insigida kalpasan nga ipakaammo ti manangaywan ti sirkito dagiti petsa.
2 Sumagmamano kadagiti tampok ti programa iramanna ti maysa nga uppat-a-paset a symposium a nadisenio a tumulong kadatayo nga ‘agtalinaed a sisasalukag kadagiti amin a bambanag.’ (2 Tim. 4:5) Nupay iti napalabas a panawen adda naaramidtayo a kinamaag, kasano nga makapagballigitayo itan a mangliklik kadagiti silo ni Satanas ken mangparmek iti espiritu ti lubong? Siguraduenyo a saanyo a liwliwayan daytoy a napateg nga impormasion. Iti las-ud ti dua-nga-aldaw nga asamblea, maiturong met ti atensiontayo kadagiti praktikal a balakad a masarakan iti publikasion a Dagiti Saludsod nga Iyimtuod ti Agtutubo—Dagiti Sungbat nga Epektibo. Mabalin nga itugotmo ti kopiam idiay asamblea. Dagiti agtutubo a nangnangruna tarigagayandanto nga ipaayan ti naisangsangayan nga atension ti impormasion nga iturong kadakuada ti manangaywan ti sirkito intono aldaw ti Sabado. Kas gagangay, addanto urnos para ti bautismo iti Sabado, isu a dagidiay agtartarigagay a mangisimbolo ti dedikasionda idiay asamblea sirkito kasapulan nga ipakaammoda dayta iti manangidaulo a manangaywan iti kabiitan a tiempo sakbay ti asamblea.
3 Iti agsapa ti Domingo, dagiti napateg a leksion ket maipaganetget babaen kadagiti serye ti demonstrasion a mangipakpakita no kasano a magunggonaantayo manipud kadagiti pakarigatan, agraman dagiti bukodtayo a kamali. Iti malem ti manangaywan ti distrito ipaayna ti palawag publiko iti tema a “Panagtignay a Sisisirib iti Maysa a Maag a Lubong.” Amin nga agibumbunannag ti Pagarian ken dagiti interesado a tattao kasapulan a ganetgetanda ti tumabuno.
4 Gapu ta umad-adu dagiti pakarigatan iti biag, mamatikami nga amin ket magunggonaan ken mabang-aran manipud itoy a material a naisagana a pakapabilgantayo. Determinadotayo koma a presente ken atentibo kabayatan ti intero a programa, “gapu ta ti pannakaisalakantayo ket as-asidegen ngem idi panawen nga immuna a namatitayo.”—Roma 13:11.