Panangibaklay iti Bukodtayo nga Awit a Responsabilidad
1 Ti ideya maipapan iti responsabilidad isut’ maysa a dadagsen kadagiti tattao kadagitoy nga aldaw. Adu dagiti mangpadas a mangliktad iti daytoy. Kas resultana, adu nga asawa a lallaki ti mangbaybay-a iti asawada, dagiti nagannak panawanda iti annakda, dagiti agtutubo ti agsardeng iti panagadalda, dagiti umili ti agtukkiad nga agbuis. Ti maysa a responsable a tao isut’ maysa a mapagtalkan, a situtuddio a mangsungbat a maipaay iti konduktana. Gapuna, sibabatad ti panagkuna iti Sao ti Dios kadagiti Kristiano a “tunggal maysa ibaklayna ti bukodna nga awit.” (Gal. 6:5) Anian nga agpagtutop a ti tema iti asamblea ti sirkito iti 1992 isut’ “Panangibaklay iti Bukodtayo nga Awit a Responsabilidad”! Daytoy a serye ti mangrugi inton Pebrero. Amintayo ti masapul nga agplano a tumabuno.
2 Babaen dagiti palawag, demostrasion, kapadasan, ken interbio, daytoy a programa iti sibabatad a nangbalabala ti nagduduma a rebbengentayo kas Kristiano. Iti malem ti Sabado, maysa a nagkapat a simposio iti maiparang a mangilawlawag no kasano a sirarag-o a mataming dagiti responsabilidadtayo. Dagiti agtutubotayo ti addaan iti ibaklay a pagrebbengan, ket ti palawag iti manangaywan ti sirkito iti malem ti Sabado isut’ nairanta a maiturong kadakuada. Iti Sabado magundawayan met dagiti baro a dedikado ti mabautisaran. Amin a nakaplano nga agbautisar bayat ti asamblea iti sirkito ti masapul a nasakbay a mangibaga iti mangidaulo a manangaywan tapno maisaganada iti daytoy.
3 Iti agsapa ti Domingo sabali manen a nagkapat iti pasetna a simposio ti maiturong iti responsabilidadtayo a mangasaba. Kalpasanna, iti malem ti Domingo, daytoy palawag iti publiko a napauluan ti “Baro a Lubong iti Dios—Siasino Dagiti Kualipikado a Sumrek?” isut’ ited iti manangaywan ti distrito.
4 Amintayo ti agmayat a mangurnos kadagiti ar-aramidtayo tapno makatabuno ken naan-anaytayo a magunggonaan iti daytoy nagpaiduma a dua nga aldaw a programa. Ti manangaywan iti sirkitoyo ti mangibaga kadakayo iti lugar ken petsa a naiyiskediol nga agpaay ti kongregasionyo.