Ammuenyo Dagiti Baro a Nairuar iti Kombension
1 Adda dua a baro a nairuar a nainayon iti nabaknang nga abasto iti espiritual a taraon. Kas nairuar iti “Nadalus a Pagsasao” a Kombension ti Distrito, dagitoy a baro a publikasion ti tumulong kadatayo amin nga agsao iti nadalus a pagsasao a mas nabatad.—Sof. 3:9.
2 Idi nairuar ti baro a broshur maipapan iti dara, nakuna ti ispiker: “Idiay tay-ak ti ministerio masansan a maisaludsod kadatayo no apay a ditay agpaiyalison iti dara. Tapno matulongankayo a sumungbat iti dayta a saludsod, maysa a ragsak ti mangiruar iti maysa a baro a publikasion. Isu daytoy kadakkel ti maysa a magasina a broshur, Kasano nga Ispalen ti Dara ti Biagyo?” Nabasayo kadin daytoy a broshur a siaannad? Napateg unay nga aramidenyo dayta tapno mapabilegyo ti bukodyo a pammati ken nakasaganakayo a tumulong iti dadduma a mangawat iti Kristiano a panangmatmat iti dara.—Ara. 15:28, 29.
3 Daytoy a broshur ti mangkabal kadakayo a mangilawlawag iti takdertayo kadagiti dodoktor. Nupay kasta, saan laeng a nangruna nga agpaay daytoy kadagiti dodoktor ken abogado. Nadisenio nga agpaay iti publiko. Maisingasing a mangitugotkayo iti maysa wenno dua a kopia kadakayo idiay tay-ak. Usarenyo a naan-anay daytoy a napateg nga impormasion a maipaay iti bukodyo a pagimbagan ken makatulong met iti dadduma a mangipakita ti panagraem iti dara.
MAYSA A BARO A LIBRO
4 Panunotenyo iti pateg daytoy baro a libro a Ti Panangbiruk ti Sangatauan iti Dios idiay ministeriotayo. Tumulong kadatayo nga agbalin a lalo pay a nakabalan a mangasaba kadagiti tattao nga agpadpada iti Kakristianuan ken kadagidiay mangitantandudo iti sabsabali a relihion. Maigapu iti nawadwad a panagakar iti populasion bayat daytoy maika-20 a siglo, mabalin a masarakantayo dagiti tattao iti nagduduma a pagsasao ken relihion iti teritoriatayo. Babaen ti tulong daytoy a libro, ditay marikna iti panagammangaw no makasabettayo kadagiti tattao iti nagduduma a relihioso a nalikudan.
5 Ti impormasion iti daytoy a baro a libro isut’ nasukimat ken narepaso babaen dagiti tattao a makinkabisado kadagita a suheto a nailawlawag. Gapuna, mabalintayo ti agsao a buyogen iti autoridad no usarentayo dagiti balbalikas a masarakan iti daytoy a libro. Sigurado, ti panangipaay iti daytoy nga impormasion iti daytoy a tiempo isut’ maysa nga ebidensia iti naindaklan nga ayat ni Jehova kadagiti tattaona iti amin a nasnasion. Usarentayo ngarud daytoy a siiepektibo tapno maipakaammo iti naimbag a damag iti amin a kita dagiti tattao idiay teritoriatayo.—Mat. 28:19, 20; Tito 2:11.