Tuladenyo ni Jehova Babaen ti Napudno a Pannakaseknan Kadagiti Sabsabali
1 Ni Jehova ti katan-okan nga ulidan iti panangipakita iti napudno a pannakaseknan kadagiti sabsabali. (1 Ped. 5:7) Pinaregta ni Jesus dagiti pasurotna nga iparangarangda dagiti galad ni Amana. (Mat. 5:45) Mabalinyo a tuladen ni Jehova babaen ti panangipakita iti napudno a pannakaseknan kadagiti sabsabali—a sisasagana a mangiranud iti mensahe ti Pagarian iti tunggal maysa a masabetyo. No naan-anay a kabesadoyo dagiti broshur a mausar iti ministerio bayat ti Hulio, addakayo iti nasayaat a posision a tumulong kadagiti sabsabali iti naespirituan. Mangipaay dagiti sumaganad a singasing iti sumagmamano a kapanunotan no kasanokay a makapagsagana para iti umuna nga isasarungkar sa surnadan ti interes iti naintiempuan nga isasarungkar.
2 No itukonyo ti broshur a “Pudno Aya a Maseknan ti Dios Kadatayo?” mabalinyo a kunaen:
◼ “Napampanunotyo kadin no apay a palubosan ti Dios dagiti tattao nga agsagaba no pudno a maseknan kadakuada? [Palubosanyo a sumungbat.] Saan laeng a sungbatan daytoy a broshur daytoy a saludsod no di ket ipakitana met nga inkari ti Dios a gibusanna amin a didigra nga inyeg ti tao iti bagina ken iti daga a taengna.” Basaenyo ti parapo 23 iti panid 27. Ipakitayo ti ilustrasion iti babana, sayo basaen ti Salmo 145:16 iti parapo 22. Itukonyo ti broshur. No maawat, mangibangonkayo iti saludsod a masungbatan iti sumaruno nga isasarungkar, kas iti: “Kayatyo kadi a maammuan no kasano nga ibanag ti Dios ti panggepna a pagbalinen a paraiso ti daga?”
3 No agsarungkarkayo kadagidiay napaimaanyo iti broshur a “Pudno Aya a Maseknan ti Dios Kadatayo?” mabalinyo nga irugi ti sabali pay a saritaan iti kastoy:
◼ “Iti napalabas nga isasarungkarko, nausigtayo a pudno a maseknan ti Dios kadatayo ken panggepna a gibusan amin a didigra nga inyeg ti tao iti bagina ken iti daga a taengna.” Luktanyo ti broshur iti ilustrasion iti panid 2-3 sayo kunaen: “Idi napalabas naisaludsodtayo, Kasano nga ibanag ti Dios ti panggepna a pagbalinen a paraiso ti daga? Ania ti makunayo?” Palubosanyo a sumungbat. Ukagenyo ti panid 17, sayo basaen ti parapo 2 ken Daniel 2:44. Kalpasanna, basaenyo ti parapo 12 iti panid 18. No umannugot ti bumalay, adalenyo a dua ti paset 9 iti broshur.
4 Adtoy ti maysa a pamay-an a mabalin a mausar no itukonyo ti broshur a “No Adda Matay nga Ay-ayatenyo.” Ipakitayo ti akkubna sayo kunaen:
◼ “Ituktukonmi ita daytoy a broshur a nangted iti liwliwa ken namnama kadagiti minilion a tattao a natayán kadagiti ay-ayatenda. Napampanunotyo kadin no ania ti namnama dagiti natay? [Palubosanyo a sumungbat.] Sibabatad nga ibaga ti Biblia ti kari ti Dios a panagungar.” Basaenyo ti Juan 5:28, 29. Ukagenyo ti broshur ken komentuanyo ti maudi a parapo iti panid 28 ken ti umuna a parapo iti panid 31. Mabalinyo nga iruangan ti panagsarungkar babaen ti panangisaludsod iti, “Kasanotayo a masigurado a maawanton a naan-anay ti ipapatay?”
5 Kadagidiay napaimaanyo iti broshur a “No Adda Matay nga Ay-ayatenyo,” mabalin a kayatyo nga usaren daytoy a presentasion iti panagsarungkar:
◼ “Idi napalabas, napagsaritaantayo ti nakaskasdaaw a namnama a panagungar. Ilawlawag ti broshur nga imbatik kadakayo no apay a masiguradotayo a maawanton a naan-anay ti ipapatay. Saan kadi a makaliwliwa ken mangted namnama dagiti kari ti Dios?” Palubosanyo a sumungbat. Sa ukagenyo ti broshur iti panid 31, ken basaenyo ti maikadua ken maikatlo a parapo, agraman Apocalipsis 21:1-4. Depende iti interes a maipakita, mabalinyo nga itukon ti panagadal iti Biblia iti libro a Pannakaammo wenno mangibangon iti sabali a saludsod a mangiruangan iti sumaruno nga isasarungkar.
6 Mabalinyo a kunaen ti sumaganad no iparangyo ti broshur nga “Ania ti Panggep ti Biag—Kasanoyo a Masarakan Dayta?”:
◼ “Adu a tattao ti mangpampanunot no ania ti panggep ti biag. Isalsaludsodda: ‘Apay nga addaak ditoy? Ania ti masakbayak?’ Sadino ti pagarupenyo a pakasarakan kadagiti sungbat? [Palubosanyo a sumungbat.] Imutektekanyo no ania ti kuna ti Biblia. [Basaenyo ti Salmo 36:9.] Saan kadi a ti Namarsua iti tao ti kangrunaan a makailawlawag no apay nga addatayo ditoy? [Palubosanyo a sumungbat.] Ipakita daytoy a broshur ti naindaklan a panggep ti Dios a maipaay kadatayo.” Ukagenyo iti panid 20-1, basaenyo ti kapsion, ken komentuan ti ilustrasion; kalpasanna itukonyo ti broshur. No maawat, isaludsodyo: “Kasanotayo a masigurado a panggep pay la ti Dios a dagiti tattao agbiagda nga agnanayon iti Paraiso a daga?” Ibagayo no kaanokay nga agsubli.
7 No naipaimayo ti broshur nga “Ania ti Panggep ti Biag—Kasanoyo a Masarakan Dayta?”, mabalinyo a kunaen ti kas iti daytoy no agsarungkarkayo:
◼ “Iti napalabas nga ibibisitak, talaga a naragsakanak a nangilawlawag kadakayo a pudno nga adda panggep ti biag ti tao.” Ipakitayo ti ilustrasion iti panid 31 sayo isaludsod, “Kasanotayo a masigurado a pagayatan pay la ti Dios a dagiti tattao agbiagda nga agnanayon iti Paraiso a daga?” Basaenyo ti parapo 3 iti panid 20. Pagsaritaanyo dagiti punto iti babaen ti paulo a, “Panggep Pay La ti Dios,” iti panid 21. Iturongyo iti makinlikud nga akkub ti broshur, sa basaen ti maipapan iti maituktukon a libre a panagadal iti Biblia iti pagtaengan. Ibagayo a kayatyo nga idemostra no kasanot’ panagadal iti libro a Pannakaammo.
8 Masapul nga iyanninaw ti ministeriotayo ti napasnek a tarigagay a tumulong kadagiti nasingpet panagpuspusona a tattao a ‘dumteng iti umiso a pannakaammo iti kinapudno.’ (1 Tim. 2:4) Gapuna, mangilasinkayo iti tiempo nga agsubli kadagiti amin a napaimaanyo iti broshur. No ipakitayo ti napudno a pannakaseknan kadakuada mabalin a matulonganyo a maikari a makalasat dagidiay agsensennaay ken agsasaibbek gapu kadagiti makarimon a banag a maar-aramid iti ulbod a relihion. (Ezeq. 9:4, 6) Masagrapyo met ti pannakapnek nga agtaud iti panangtulad ken Jehova babaen ti napudno a pannakaseknan kadagiti sabsabali.—Idiligyo ti Filipos 2:20.