Panangikondukta iti Nabagas a Panagadal ti Biblia iti Pamilia
1 Maysa kadagiti kapatgan nga aktibidad nga ibanag dagiti nagannak isu ti panangisuroda kadagiti annakda iti kinapudno. Maysa dayta nga obligasion manipud ken Jehova. (Deut. 6:6, 7) Kasapulan dagiti annak ti direksion iti nalinteg a dalan a pagnaanda iti daytoy dakes a lubong. Masapul a maadalda ti panangayat ken Jehova ken ti kinapudno ken determinado nga agintek iti dayta. Daydi Agosto 1, 1988 a Pagwanawanan, iti panid 11, kunaenna: “Agpapan pay aniaman a sabali nga obligasionyo wenno pakariribukan a sanguenyo, ti panangipaay iti tiempo a kadua dagiti annakyo ti rebbeng a maipangpangruna. Ti panawen a busbosenyo a kaduada ti mangipalubos kadakayo a mangipasagepsep kadagiti naespirituan nga ipatpateg nga isuntot’ mangsaluad iti puspuso dagiti annakyo a mangikabil kadakuada iti umiso a kurso.”
2 Masapul a maituding ti tiempo a maipaay iti regular a panagadal ti pamilia. Kasapulan dagiti ulo ti pamilia nga iyuna iti pannakataripato ti espiritualidad ti pamilia. No saan a maited ti umiso nga asikaso iti espiritual a kasapulan itan, manamnama a dagiti nagannak ket agsagabadanto iti serioso a problema iti masanguanan.
DAGITI MATERIAL A MAADAL KEN METODO
3 Ania ti masapul a maadal? Ti ulo iti pamilia isut’ adda iti kasayaatan a posision a mangammo no ania ti kasapulan iti pamilia. Mabalinna nga amaden no ania ti makuna dagiti dadduma a makagunggona ket usigenna dagiti singasingda. Ti kinamanangibagay isut’ mangaramid iti panagadal ti pamilia a praktikal ken makapakaradkad. Adu dagiti pamilia ti agsagana iti linawas a leksion idiay Ti Pagwanawanan. Nupay kasta, mabalin a nasken no dadduma a pagsasaritaan dagiti suheto a mangsaklaw iti problema dagiti agtutubo a maipasango idiay pagadalan. Dagiti impormasion maipapan ti pannakikuyogkuyog, ay-ayam ken imoral nga tendensia ti mabalin a mausig. Nasken unay a ti ulo iti pamilia ket itultuloyna nga utoben no ania dagiti kasapulan ti pamilia ken no kasano iti kasayaatan a panangidanon kadagiti pusoda kadagitoy.—Kitaenyo idiay The Watchtower, Pebrero 15, 1971, pinanid 105-6.
4 Kasano a maikondukta iti panagadal? Makultibar koma iti maysa a naaliwaksay ngem naraem nga atmospera. Liklikan met ti maysa a mekanikal, subra a kinapormal a wagas. Maisaludsod dagiti kanayonan a saludsod, nga usaren dagiti ilustrasion a pangriing iti panunot tapno makiraman dagiti amin. Dagiti maipakita a katulongan, a kas iti mapa ken tsart ti mabalin a mausar a panglawag iti material. Maited dagiti paset a mangsukimat kadagiti material idiay Index wenno kadagiti tomo ti Insight, kas maiyataday iti edad ken abilidad dagiti annak. Dagiti nalaka a saludsod a kasapulanna laeng iti sumagmamano a balikas ti pasungbatan kadagiti basbassit nga ubbing. Saanyo koma nga aramaten iti periodo ti panagadal a pangungtan kadagiti ubbing. Imbes, komendaranyo ida, nga ipakitayo ti panangipategyo iti reggetda, ken narayraykayo a mangiranud iti espiritual a bambanag kadakuada.
5 Kasanoyo a masiguro a madandanonyo ti pusoda? Paregtaenyo dagiti amin a sumungbat babaen iti sasaoda. Usarenyo dagiti saludsod no ania iti makunada tapno maikeddeng no ania ti adda iti pusoda. Mabalin a maisaludsodyo: “Ania ti makuna dagiti annak idiay pagadalan maipapan iti daytoy a banag? Adda kadi panagduaduayo iti daytoy a punto?” Annadanyo a dikay koma subraan ti panangdillaw iti sungbat dagiti annak, wenno nalabit a saanda a maiyebkas a sipupudno no ania ti adda iti panunotda. Mangtedkayo ti umdas a tiempo iti panagsaoda. Ti pannakaammoda nga interesadokayo kadakuada ken iti problemada isut’ mangaramid a nalaklaka ti panangisuroyo kadakuada.—Kitaenyo ti The Watchtower, Nobiembre 1, 1986, pinanid 23-5.
6 Laglagipenyo a ti panggep isut’ panangimula iti pampanunot ni Jehova a saan laeng a tapno masarakan iti sungbat a sawen bayat dagiti gimong ti kongregasion. (Efe. 3:17-19) Kaipapananna daytoy ti panangdanon iti puso. Ited iti pamilia dagiti rason no apay a kayatenda nga aramiden iti pagayatan ti Dios ken no apay nga isut’ kasayaatan a kurso iti biag.
7 Ti regular a panagadal ti Biblia isut’ nasken a pangpatanor iti espiritualidad ti pamilia. Sanayen ken kabalanna dagiti annak a mangsaranget kadagiti problema ti biag. Dakayo a nagannak ti adda iti kasayaatan a takder a tumulong iti annakyo. Ibaklayyo dayta a responsabilidad. Sigurado a bendisionan ni Jehova iti bannogyo a mangaramid iti dayta.