Panangirugi iti Panagadal a Mausar Ti Panangbiruk ti Sangatauan iti Dios
1 Kinuna ni Jesus, “Iti amin a nasnasion ti naimbag a damag isut’ maikasaba nga umuna.” (Mar. 13:10) Kaipapananna daytoy a dagiti disipulona ket masabetda dagiti tattao iti adu a kita ti nagduduma a pagsasao ken relihion.
2 Ti baro a librotayo a Ti Panangbiruk ti Sangatauan iti Dios isut’ tumulong kadatayo a mangdanon iti nagduduma a kita dagiti tattao babaen ti kinapudno. (Juan 4:21-24) Kasanotayo nga irugi dagiti panagadal ti Biblia a mausar daytoy a publikasion?
NO KASANO NGA IRUGI ITI PANAGADAL
3 Iti umuna a sarungkaryo, no adda maipaimayo a libro, nalabit nga maiturongyo ti bumalay iti maysa a kapitulo wenno parapo. Dayta met laeng a punto ti mausar a kas basaran iti saritaan nga agturong iti maysa a panagadal. Babaen ti panangusar kadagiti saludsod iti baba ti panid, addaankayo iti sadagan iti maysa a makapakaradkad a diskusion. Mairugi idiay umuna a benneg iti libro wenno aniaman a kapitulo, ti panggep isu koma iti pannakiturongto daydiay tao kadagiti kapitulo 10, 15, ken 16. Apay a kasta?
4 Ti panangsapul iti Dios isut’ babaen ken Kristo. Kinuna ni Jesus, “Siak ti dalan ken ti kinapudno ken ti biag. Awan ti makapan ken Ama no saan a magna kaniak.” (Juan 14:6) Ti Kapitulo 10 patalgedanna a ni Jesus ket maysa a pudno a persona, ipakitana no kasano a naipasakbay babaen iti padto, ken no kasano nga ammotayo nga adda kenkuana iti anamong ti Dios. (Juan 6:44, 65) Ti Kapitulo 15 ken 16 saklawenda iti “Isusubli iti Pudno a Dios” ken “Ti Pudno a Dios ken ti Masanguananyo.”
USIGEN TI KASAPULAN ITI TUNGGAL MAYSA
5 Kalpasan iti adun a panagadal mabalin a nainsiriban iti iyaakar iti mas pamunganayan a libro a kas iti Agbiag nga Agnanayon a libro. Idinto ta ti Panangbiruk iti Dios a libro ket nadisenio a pangallukoy kadagiti tattao iti nagduduma a relihion iti Dios, saan a kada kapitulo ket makaguyugoy iti tunggal tao. Kasapulantayo nga itutop ti panangiparang ken iti urnos ti panagadal kas maitunos iti kasapulan ti tunggal maysa.—1 Cor. 9:19-22.
6 Kas ehemplo, mabalin a naipaimatayo daytoy libro iti maysa a tao a kunaenna nga isu ket Kristiano. Ita ti saludsod a maipaay iti panagsarungkar isut’ mabalin a kastoy, “Apay a nagadu a relihion iti agkunkuna a Kristianoda?” Iti kasta, ti kapitulo 11 maipapan iti apostasia ken kapitulo 13 maipapan iti Repormasion isudat’ mabalin a batayan iti mairugi a panagadal. Matulongantayo daydiay tao nga agrason maipapan iti sursuro ti Biblia a maikontra iti apostata a doktrina ti Kakristianuan. Namnamaentayo a ti kinapudno ket wayawayaanna iti panunotna ket mapatanorna ti relasion ken Jehova. (Juan 8:31, 32) Kalpasanna ti panagadal isut’ agtultuloy iti kapitulo 15 ken 16 idiay Agbiag nga Agnanayon a libro.
PANANGDANON KADAGITI DI-KRISTIANO A RELIHION
7 Iti panagadal kadagiti tattao a sabali ti relihionda, ti Kristiano nga ayat ken taktika isut’ kanayon a maipakita. (Col. 4:6) Kadagiti Hindu mabalin a mairugi ti panagadal iti panid 372 idiay baba ti subtema a “Naikari a Baro a Lubong.” Kalpasanna maitultuloy iti kapitulo 5 maipapan ti Hinduismo.
8 Nangruna a kasapulan ti taktika no makilangenkayo kadagiti Muslim. (1 Ped. 3:15) Awan duadua a maatrakarda iti kapitulo 12 maipapan ti Islam. Iti dayta a kapitulo, dagiti teksto ti Biblia a maipaay iti panangidilig ti naisinggalut kadagiti saludsod, nangruna manipud iti parapo 23 nga agpatpatuloy a sadiay mausig dagiti doktrina.
9 Laglagipenyo a bayat nga agmula ken agsibugtayo, ti Dios isut’ mamagtubo iti bukel no nadam-eg ti daga.—1 Cor. 3:6, 7; Mat. 13:18-23.