Panangawat iti Responsabilidad nga Agsarungkar
1 Adda adu a rason no apay a makiramantayo a naan-anay iti panagsarungkar. No maan-anay a sarungkaran dagiti amin nga interesado a tattao, masalimetmetantayo ti naimbag a konsensia ken maibanag iti ministeriotayo a naan-anay, kas idi ken Pablo.—Ara. 20:21, 24; 2 Tim. 4:5.
2 Ti Pannakaammo Aramidennatayo a Makabael: Ti kinapudno a dagiti biag ket agpeggadda isu koma ti mangtignay kadatayo nga aggaget nga agsarungkar. (Juan 17:3) Ti pannakaammotayo iti kaasidegen ti Armagedon isut’ mamaggunay kadatayo a saan laeng a mangpakdaar kadagiti nadangkes ngem masapul met a tulongan dagidiay nga ‘agsasaibbek ken agsinsinnaay gapu iti makarimon a bambanag a mapaspasamak ditoy daga.’ (Ezek. 9:4) Masapul a matulongan ida a tumimpuyog iti makita nga organisasion ni Jehova.
3 Masapul dagiti tattao ti tulong nga umawat iti kinapudno a siuumiso. (Ara. 8:30, 31; 18:26) Daytoy ti sabali a rason kadatayo nga agsarungkar tapno “sibugan” iti bukel ti kinapudno a naimula. Kasano koma ti panagprogresotayo iti espiritual no saan koma a gapu ti kaadda dagiti nagsarungkar kadatayo a masansan tapno tulongandatayo a gumun-od iti umiso a pannakaammo?—Mat. 7:12.
4 Ipakita ti Ayat ken Regta: Ti panagsarungkar isut’ nasayaat a wagas a maidemostra iti ayattayo kadagiti tattao. Maysa a bulsek a kabsat a lalaki nga agserserbi kas regular payunir ti nagkuna: “Manipud pay bautismok, ti tarigagayko isu ti panangibaga kadagiti sabsabali no ania daydiay naadalko manipud ti Biblia. Maragsakanak ta saan a ti sagubanitko ti nanglapped kaniak a mangaramid iti daytoy. . . . Naadalko met nga irekord iti panunotko ti kada balay ken kalsada, ket iti kastoy a wagas, nabalinak ti nagsarungkar kadagiti tattao nga interesado ti panagadal iti Biblia.”
5 No agsarungkartayo, masansan nga adda oportunidadtayo a mangusar iti Biblia ken mangted ti rason iti namnamatayo. (1 Ped. 3:15) Saan laeng a tumulong daytoy iti bumalay ngem pasgedanna met ti mismo a regta ken panangipategtayo iti kinapudno. Ti panagsarungkar isut’ mangyeg iti rag-o a saan a magun-odan iti sabali a pamay-an. Ket daytoy a rag-o ti kanayon a mapabaro babaen iti regtatayo nga agsarungkar.—Prov. 10:22.
6 Saan nga ipaidam dagiti tattao ni Jehova daydiay naimbag iti dadduma, ket daytoy isut’ makita babaen ti sangalubongan nga aktibidadda bayat iti 1991 a tawen ti serbisio. (Prov. 3:27) Nakaaramidtayo ti 344,926,952 a panagsarungkar ken nakaidaulotayo iti 3,947,261 a panagadal ti Biblia iti pagtaengan. Adda 300,945 a baro a disipulo a nangidedikar ti bagbagida ken Jehova a nabautisaran. Daytoy a nakaskasdaaw a panagadu ti saan koma a dimteng no saan a gapu iti kinatuloktayo a nangawat iti responsabilidad a nagsarungkar.—1 Tes. 2:8.