Siguruenyo ti Sumarungkar
1 “Iti napalabas a dua a tawen, nabasak [ti Creation a libro] iti uppat a daras ket agtultuloy a magustuak iti nauneg a panangadal, kinaiskolar, ken dokumentado a pannakapartuatna. Daytoy a libro ti masapul koma nga adda iti ima ti tunggal tao ditoy lubong. No mapasamak daytoy, amin dagiti panangballikug ken riribuk maipapan iti nagtaudantayo ken ti ateistiko a pammati iti madagdagus nga agngudo.” Dayta ti insurat iti maysa nga abogado, kas inreport ti Agriingkayo! iti Abril 22, 1992, panid 32.
2 Ti kasta a nagsayaat a komento, saan ngata a kayattayo amin a maipan daytoy Creation a libro iti ima dagiti adu nga interesado a tattao agingga ti mabaelantayo? Kalpasanna masapul a siguruen ti sumarungkar a mangtukay iti agtultuloy nga interesda maipapan daytoy a publikasion.
3 Awan kadatayo ti nangaramid iti detaliado a panangadal kadagiti nawadwad a teoria nga inggannuat dagiti ebolusionista. Nupay kasta, saantayo a kasapulan nga ammuen dagiti amin a teoria dagiti ebolusionista tapno maipakita iti nasingpet a tattao dagiti naruay nga ebidensia a ti sursuro iti ebolusion ket pamay-an nga inusar ni Satanas a mangipababa iti Namarsua ti tao. Dikay koma agkedked a sumubli gapu iti amak a saanyo a kabaelan a sungbatan dagiti teknikal a saludsod nga ipasango dagiti dadduma. Mismo a ti publikasion ket nangted iti nawadwad a pammaneknek kadagiti sasao a dinakamatna.
4 Mainayon pay, nawadwad ti impormasion iti kapitulo 16 aginggat’ 20 a naglaon kadagiti sursuro ti Biblia maipapan iti punganay ti sangatauan, ti panggep iti Dios a maipaay ti daga ken iti tao, ken ti panagpili a naipasango iti sangatauan ita. Gapuna a naruay dagiti naimbag nga impormasion a mausar iti panagsarungkar.
5 No agalangankayo a sumarungkar, apay a dikay mangikuyog iti maysa a mas makabael wenno nasaysayaat ti pannakaammona maipapan iti sursuro ti ebolusion? Nalabit a maysa nga agtutubo a kabsat a lalaki wennmo babai a madama iti pagadalan ti mas kabisadona dagiti agdama a teoria iti ebolusion. Wenno adda maysa iti kongregasion a dati a manamati ti ebolusion ngem naadalnan iti kinapudno ti Biblia ket kabaelannan a ripuogen iti palso a sursuro ti ebolusion.
6 Dikay koma agkedked a mangiturong ti asikaso iti kapitulo 19 daytoy Creation a libro ken usaren ti namnama iti Biblia a maipaay ti masakbayan kas basaran iti panagsarungkaryo. Dayta a kapitulo ti addaan iti adu a puntos a mabalin a mausar a pammaregta ti kada tao a mangadal maipapan iti karkari ti Biblia iti masanguanan. Mabalinyo nga usaren ti benneg a mangrugi iti panid 236 ti subtema a “The Earth Transformed,” a sarunuen iti “An End to Poverty” ken “No More Sickness, No More Death” iti pinanid 238-9.
7 Daytoy a nagsayaat a publikasion ti nakatulong iti adu a tattao a nangsarak iti dana nga agturong ti biag. Mabalintayo a matulongan iti ad-adu pay babaen ti pammaregta kadakuada a bumasa no ania iti kunaen ti Creation a libro maipapan iti biag ken no kasano a dimteng ditoy.