Dagiti Manangawit ti Lawag iti Sangakaarubaan
1 Kalpasan ti itatabuno iti kombension ti distrito iti daytoy a tawen, mas sipupuottayo itan ti panagkasapulan a mangawit iti lawag kadagiti kaarubatayo. (Mat. 5:14) Bayat nga isilnagtayo ti amin nga impormasion a naidatag iti programa ken ikagumaan nga iyaplikar bayat ti inaldaw a biagtayo, matulongantayo nga umadani ken Jehova iti pudno a panagdayaw ken tulongan met ti dadduma a mangadal maipapan iti karkarina.
2 Ti oportunidadtayo a mangawit iti lawag isut’ napaadu, idi agngudo ti sesion iti agsapa ti Biernes, idi a ti baro a tract a Makalasatto Kadi Daytoy a Lubong? ket nairuar. Ti demostrasion iti agsapa ti Sabado ket nakatulong a mangipakita no kasano a daytoy a tract ket mausar. Maisinggalut iti daytoy, adda naaramid nga anunsio a tallo a sabsabali a tract ti mabalinen a maala. Napauluan dagitoy iti Liwliwa Kadagiti Malmaldaang, Tagiragsakenyo ti Biag ti Pamilia, ken Sino a Talaga ti Agturay ti Lubong? Naited ti pammaregta nga awitentayo dagitoy a mausar no tumaud iti gundaway.
3 Iti konklusion daydi palawag a “Pannakailasat Inton Pannakaiparangarang ni Jesu-Kristo” idi malem ti Sabado, maysa baro a broshur a natituluan iti Pudno Aya a Maseknan ti Dios Kadatayo? isut’ nariuar. Daytoy a napintas ti ilustrasionna a broshur iti sumungbat kadagiti adu a saludsod ti tattao a kas iti: Apay nga impalubos ti Dios iti panagsagaba? Agngudonto ngata ti panagsagaba? Kasanotayo nga ammo nga addatayon iti maudi nga al-aldaw? Kasanotayo a maragpat iti agnanayon a biag idiay baro a lubong ti Dios? Daytoy a broshur ti ekselente nga instrumento a mangipasdek iti panagadal.
4 Anian a yamantayo iti kawadwad ti espiritual a taraon a naawattayo idi “Dagiti Manangawit iti Lawag” a Kombension ti Distrito! Sapay koma ta datayo, kas manangawit iti espiritual a lawag ti Dios, ket desidido a mangalagad iti naadaltayo ken gagetantayo ti mangusar kadagiti nagsayaat a baro a ruar a tumulong iti tattao a mangammo ken agserbi ken Jehova.