Ikasaba iti Dalan ti Dios nga Agturong iti Talna ken Talged
1 Adu ti pamuspusan dagiti tattao a maipaay iti talna ken talged, ngem awan kadagitoy ti nakaitungpal iti kasapulan dagiti tattao ti sangalubongan. Nupay ti relihioso, rasa, ken nasional a guranggura ket agparangda a kangrunaan a lapped iti dalan nga agturong ti maysa a natalged ken natalna a lubong, ammo dagiti pudno a Kristiano a ti kangrunaan a lapped isu ni Satanas a Diablo ken ti panagmadi iti tao nga agpaituray ken Jehova a Dios.—Sal. 127:1; Jer. 8:9; 1 Juan 5:19.
2 Bayat ti Abril, ikagumaantayo a tulongan dagiti kaarubatayo a kumita a ti wagas iti Dios nga agturong ti talna ken talged isut’ kakaisuna a dalan ket ni Jehova addaan iti ultimo a solusion kadagiti amin a problema ti amin a sangatauan.
3 Usaren Dagiti Baro a Tract: Mairanudtayo daytoy a makapabileg a mensahe babaen ti panangusar kadagiti baro a tract a naiyammo kadagidi “Manangawit iti Lawag” a Kombension ti Distrito. Maysa a nalaka a demostrasion ti naipakita no kasano a mausar iti Tract Num. 19 nga, Daytoy Kadi a Lubong Makalasatto?, a pangirugi ti saritaan ken mangiturong iti panagadal ti Biblia. Ti nalatak a kaitungpalan iti padto ni Jesus maipapan ti panungpalan daytoy lubong isut’ mangarestar ti asikaso dagiti adu.
4 Minilion a tattao ita ti maldaangan, ket iliwenda iti tiempo ti pannakaagas ken iti pudno a talna ken talged. Ti Liwliwa kadagiti Malmaldaang (Tract Num. 20) isut’ mabalin a pudno a gubbuayan iti pammabileg.
5 Ti Tract Num. 21 a, Tagiragsakenyo ti Biag ti Pamilia, isut’ mangted iti praktikal a balakad no ania ti maaramid a pangpasayaat iti biag ti pamilia uray itan bayat nga ur-urayen iti nakaskasdaaw a masanguanan idiay baro a lubong ti Dios.
6 Ti Tract Num. 22 mangted ti diretso a sungbat iti saludsod a Sino a Talaga ti Agturay ti Lubong? Ilawlawagna no apay a dagiti tattao ket inusarda dagiti karanggasan a metodo ti panangtuok ken panagpipinnatay iti maysa ken maysa uray pay tarigagayan ti kaaduan a tattao iti natalna ken natalged a biag. Adda dagiti dakes nga espiritu a puersa kadagiti nailangitan a lugar, ken ti kasikapan a pangallilaw ni Satanas a pangallukoy iti adu a mamati nga isu ken dagiti demoniona ket saan a pudno nga addada.
7 Irugi Dagiti Panagadal ti Biblia: Mabalin a mairugi iti panagadal ti Biblia babaen iti tract, broshur, magasina, wenno libro. No ti bumalay ket addaanen kadagitoy a publikasion, itukonyo ti pannakaidemostra no kasano a mausar dagitoy iti panagadal ti Biblia. Dagiti baro a tract ken baro a broshur a Pudno Aya a Maseknan ti Dios Kadatayo? isudat’ ekselente a kagawaan a mausar iti panangirugi kadagiti panagadal ti Biblia.
8 Ti napudno a talged isut’ agtaud laeng iti Namarsua, ni Jehova a Dios. Sayaatentayo koma nga usaren dagiti katulongan a pangisuro nga adda kadatayo a mangikasaba iti dalan ti Dios nga agturong iti talna ken talged.—Isa. 2:3, 4.