Ti Bileg iti Sao ti Dios
1 Ti Sao iti Dios ket nabileg. (Heb. 4:12) Kadagitoy nga aldaw, ti ebidensia daytoy isut’ makita kadagiti minilion a biag a nagbalbaliw bayat a dagiti tattao ket inyaplikarda a personal iti naadalda manipud ti Biblia.—Roma 12:2.
2 Tapno magunggonaan dagiti tattao manipud iti sursuro ti Biblia, masapul a bigbigenda dayta a kas Sao ti Dios. (1 Tes. 2:13) Bayat ti Disiembre matulongantayo dagiti tattao a mangadal iti ad-adu pay maipapan ti pateg iti Biblia babaen ti panangitukon iti New World Translation of the Holy Scriptures ken ti libro a Ti Biblia—Saot’ Dios wenno iti Tao? idiay tay-ak ti serbisio.
3 Apay a dikay repasuen ti sumagmamano a makapainteres a paset iti Saot’ Dios a libro? Ti benneg iti linaonna ti mangiturong kadakayo iti kapitulo a mangilawlawag kadagiti milagro, maipagarup nga agkokontra, nasientipikuan a panagtutunos, padpadto, ken dadduma pay a suheto. Nawadwad dagiti ladawan ken ilustrasion. Dagitoy a benneg ti makabael kadakayo a mangiparang iti daytoy a libro a buyogen ti napudno a kinarayray.
4 Kasanotayo a mausar daytoy a libro kadagiti bumalay a siguden a mamati a ti Biblia ket Sao iti Dios? Mabalin a matukay ti interesda babaen iti panangilawlawag ti kapitulo 2, a mangisalaysay iti pakasarsaritaan ti pannakidangadang iti Biblia nga agbiag, wenno ti kapitulo 14, a mangparegta iti managbasa a mangawat ti tulong tapno nasaysayaat iti pannakaawatna ti kababagas iti Biblia kadatayo kadagitoy nga aldaw. Ti panangbasa iti kasuratan a nakanotar idiay kapitulo 14 ti mangisiguro iti bumalay a ti diskusionyo ket naibasar iti Biblia.
5 Adu dagiti agkedked a mangawat iti Biblia a kas sao ti Dios gapu iti kababalin ti Kakristianuan. Iti Kapitulo 3, a “Ti Palso a Gayyem ti Biblia,” isut’ mabalin a mausar nga epektibo iti daytoy a situasion.
6 No basaen manipud iti Bibliatayo, mabalin a komentuan ti bumalay iti kinalawag ti sasao a nausar iti New World Translation. Wenno mabalin a masarakantayo a ti bumalay ket interesado iti mensahetayo ngem awanan ti Biblia. Kadagitoy a kaso mabalintayo nga ilawlawag dagiti naisalumina a benneg ti Biblia nga us-usarentayo ken dagiti rason no apay a kaykayattayo daytoy ngem iti dadduma. Maysa kadagitoy, mabalintayo nga itudo iti listaan a “Bible Words Indexed” a tumulong kadatayo a mangsarak kadagiti nalatak a kasuratan. Kasta met, daydiay “Bible Topics for Discussion” iti likud ti Biblia ket makatulong a mangsarak iti sungbat dagiti adu a gagangay a maisaludsod.
7 Babaen iti Biblia, impakaammo ni Jehova kadatayo ti nakaskasdaaw a personalidadna. Sapay koma ta usarentayo ti New World Translation ken daytoy Saot’ Dios a libro a tumulong iti dadduma a mangadal maipapan ti bileg iti Saona.—2 Cor. 10:4.