Gutugoten Dagiti Dadduma a Kumita a Sipapasnek ken Jesus
1 Ti Katan-okan a Tao a Nagbiag Pay Laeng ket nagpaiduma a libro. Dagiti 133 a kapitulona ti makagutugot kadagiti managbasa a kumita sipapasnek ken Jesus ken tuladenda iti ehemplona. Nakuna a dagiti amin nga ar-ari a nagturay, uray pagkaykaysaen, saanda nga apektaran iti biag ti maysa a tao a nabilbileg ngem iti panangapektar ni Jesus. Dagidiay a kumita a sipapasnek ken Jesus ti sigurado a magunggonaan.
2 Insuro ni Jesus dagiti disipulona maipapan ken Amana ken inyulidanna dagiti kualidad ti Dios. Matignay dagiti pusotayo no usigentayo iti nagpaiduma nga abilidad ni Jesus kas mannursuro, ti awanan buteng a panangidaulona, ken iti kinadungngona. No lagipen iti panagsagabana bayat nga indatonna ti biagna a kas subbot kadatayo, matignaytayo a mangipateg! Ti Katan-okan a Tao a Nagbiag Pay Laeng isut’ tumulong kadagiti tattao a kumita ken Jesus iti kastoy a wagas.
3 Agsaganakayo a Naimbag: Nakasaganakayo koma a naimbag a mangirubbuat iti diskusion ti Biblia a manggutugot iti dadduma a kumita ken Jesus a sipapasnek. Dagiti grupo ti pamilia ken dadduma pay ket mabalinda iti agsanay a sangsangkamaysa. Ikagumaanyo a riingen ti interes ken tignayen dagiti tattao a bumasa iti Katan-okan a Tao a libro. No limitado laeng ti interes, mangibatitayo iti tract wenno nalabit maysa a broshur wenno magasina.
4 Dagiti diskusiontayo iti balaybalay bayat ti Enero isut’ maisentro ken Jesus ken paregtaen dagiti tattao a mangammo kenkuana a naimbag. Babaen ti panangaramat iti Katan-okan a Tao a libro, matulongan dagiti tattao a kumita ken Jesus, saan laeng a kas maysa a tao, ngem kas Anak ti Dios ken agturturayen nga Ari iti gobierno a mangsolbar ti amin a problema iti sangatauan.
5 Kasanotayo a maikeddeng no ti maysa a tao ket pudno nga interesado? No ti tao ket dumngeg a siaannad, agsaludsod, wenno imutektekanna no ania daydiay nabasatayo iti Biblia, daytoy ti tanda nga adda pudno nga interesna. No ipakita ti libro ket sidadaan a mangawat, ipamatmat daytoy a napudno iti interesna a dayta ti kayattayo a makultibar. Agpapan pay saanna nga alaen ti libro, no nangipakita iti interes nasayaat no maikkan ti tract, a mapataud dagiti saludsod a maipaay iti masanguanan a diskusion, ket maiyurnos ti panagsarungkar.
6 Adda maysa a tao a saan a gagangay a managbasa ti nangiyebkas iti panangipategna a maipaay ti Katan-okan a Tao a libro, a nakunana a maysa a makaay-ayo a basaen iti ngudo ti aldaw. Tulongantayo dagiti dadduma a makarikna met iti kasta, a gutugoten ida a kumita a sipapasnek ken Jesus babaen ti panagbasada iti Ti Katan-okan a Tao a Nagbiag Pay Laeng.