Iranudyo ti Umiso a Pannakaammo iti Pebrero
1 Iti tay-ak ti ministeriotayo bayat iti Pebrero, iparangtayo ti Agbiag nga Agnanayon a libro. Ania ti sawenyo a pangirugi iti natiempuan a diskusion ti Biblia, ken kasano a maiyammo daytoy nagsayaat a publikasion?
2 Panangusar Kadagiti Baro a Tract: Napadasan dagiti dadduma nga agibumbunannag a naballigi ti panangusarda iti tract a pangabbukay ti personal nga interes, uray sakbay a maitukon iti sabali a literatura. Kasanotayo a matulongan a mangibanag iti daytoy? Babaen ti panangusartayo iti baro a tract a Makalasatto Kadi Daytoy a Lubong?
Kalpasan ti maiparbeng a kabblaaw, mabalinyo a kunaen:
◼ “Salsaludsodanmi dagiti tattao no mariknada nga adda namnama a maipaay iti nasaysayaat a biag. Ania ti pagarupyo? [Palubosan a sumungbat.] Timudenyo ditoy Juan 17:3 no ania ti makuna iti Biblia. [Basaen.] Ti laeng Dios ken ni Kristo Jesus iti makaitukon kadatayo ti agnanayon a biag. [Iturong iti panid 3 ti tract.] Inlawlawag ni Jesus dagiti pasamak a dumteng sakbay unay iti panungpalan ti lubong. Ngem imbagana kadagiti disipulona nga agrag-oda agsipud ta dagitoy a pasamak ket kaipapananda ti umasidegen a pannakailasat.” Kalpasanna mabalinyo nga ipakita iti dadduma a ladladawan idiay kapitulo 19 ti Agbiag nga Agnanayon a libro a mangipamatmat kadagiti bendision iti panagturay ti Pagarian.
3 Ti maysa nga agtutubo wenno agdadamo nga agibumbunannag mabalinna nga usaren iti ilustrasion a kas introduksion.
Babaen ti panangusar iti tract a “Makalasatto Kadi Daytoy a Lubong?,” mabalin nga ukagen ti agibumbunannag iti pinanid 3 ken 4 ket kunaenna:
◼ “Imutektekanyo dagitoy dua a ladawan, maysa nga eroplano a mangitintinnag iti bomba bayat ti gubat ken iti sabali a maysa nga ubing a mabisinan. [Iturong iti panid 5.] Kitaenyo dagitoy ladawan iti maysa a ginggined ken ti masakit a tao iti pagiddaan ti ospital. [Agsarimadengkayo.] Ipakita ti Biblia a dagitoy a nakaal-alingget a bambanag ket agngudodan iti mabiit.”
4 No ti tao ket interesado, basaenyo ti Apocalipsis 21:3, 4 uray manipud iti Biblia wenno ti tract idiay panid 6. Kalpasanna mabalinyo nga ipakita ti maitutop a paset idiay Agbiag nga Agnanayon a libro, kas iti ilustrasion idiay panid 9 ken 11-13.
5 Maisaad ti Pamuon iti Masanguanan a Sarungkar: Siempre, makaibatitayo iti tract wenno maipaima ti Agbiag nga Agnanayon a libro, wenno naaramid laeng iti nasayaat a saritaan, mabalintayo a kunaen: “Inton umayak manen, kayatko nga iranud kadakayo ti makaipainteres a punto maipapan iti padto ti Biblia a mangipakita nga agbibiagtayon iti ruangan ti baro a lubong.” Siguruenyo nga inotar dayta a sarungkar ken ti interes a naipakita, ket sumarungkarkayo iti mabiit tapno maparayray ti interes ken nalabit a maipasdek iti panagadal ti Biblia.
6 Ti Pagarian ket itukonna iti kakaisuna a napudno a namnama ti sangatauan. Ipakitatayo iti kasgedan a tarigagaytayo a mangiranud kadagiti amin a masabettayo ti “umiso a pannakaammo iti sagrado a palimed ti Dios.”—Col. 2:2.