Agtultuloykayo nga Agsao Maipapan iti Bambanag a Nakita ken Nangngegyo
1 Agpapan pay naipangta iti pannakasaplit ken pannakaibalud, kinuna dagiti apostol kadagiti bumusbusor: “Saankami a sumardeng nga agsao maipapan iti bambanag a nakita ken nangngegmi.” (Ara. 4:20) Impategda iti balor ti trabaho ken sursuro ni Jesus.
2 Ti naimbag a damag maipapan ken Jesus ken iti Pagarianna isut’ nasken ita kadagiti tattao a kas met laeng idi. Gapuna, gundawayantayo ti kada oportunidad nga agsao maipapan iti daydiay nakita ken nangngeg manipud iti Sao ti Dios.
3 Agtutubo, Agsaokayo idiay Pagadalan: Adu dagiti agtutubo a Saksi ti makagundaway iti oportunidad a mangsaksi kadagiti kaadalan ken maestroda. Maysa nga agtutubo a Saksi a kanayon a naalibtak kadagiti agdama a topiko iti diskusion kadagiti kaadalanna ti nangala iti gundaway idiay pagadalan nga umasideg kadagiti maestro ken kaadalanna babaen ti maitutop a publikasion. Resultana? Nakapaima iti 35 a libro bayat ti maysa laeng nga aldaw! Idinto ta adu a tattao ita ti maseknan maipapan iti talna, saan ngata a naimbag no maammuan dagiti kaadalan ken maestro no kasano a ni Jesus kas agturturayen nga Ari ket solbarenna dagiti problema daytoy lubong?—Maidilig iti Lucas 2:14.
4 No ti panagkedkedyo a makiraman iti rambak ti Christmas idi Disiembre ket pataudenna dagiti saludsod, mabalinyo a kunaen:
◼ “Saanak a nakiraman iti piesta ti Christmas agsipud ta ti kasta a selebrasion ket saanna a dayawen ni Jesus a kas kakaisuna a pakaisalakanan ken mangiyeg iti panagngudo ti gubat. [Kotaren wenno basaen iti Aramid 4:12.] Ni Jesus ket saanen a maysa a maladaga ngem maysan nga agturturay nga Ari. Daytoy libro a, Ti Katan-okan a Tao a Nagbiag Pay Laeng, isut’ mangilawlawag iti amin a sursuro ken milagro ni Jesus ken ipakitana no kasano nga iyegna ti panagpatingga iti panagsagaba ti sangatauan.” Kalpasanna maipakita ti ilustrasion iti kapitulo 133, ken basaen ti maikadua a parapo iti sumaruno a panid. Maipakita dagiti dadduma a punto a mariknayo a makaallukoy iti tao ken itukon ti libro.
5 Makisaokayo Kadagiti Katrabahoyo: Maysa a kabsat a lalaki ti nakapaima iti 63 a libro babaen laeng ti panangiparabawna iti kopia ti Katan-okan a Tao a libro iti lamisaanna. Ti makaatrakar a langa ken titulona a mismo ti manggutugot iti panagsaludsod. Mabalinyo a maisaludsod iti katrabahoyo: “Siasino ti pagarupenyo a katan-okan a tao a nagbiag pay laeng?” Kalpasanna inayonyo: “Daytoy a libro ti mangisalaysay iti detaliado a biag ni Jesus, nga ilawlawagna ti kada palawag nga intedna, sungbatanna dagiti adu a saludsod maipapan kadagiti milagrona, ken mangted iti sabsabali a makapainteres a detalye. Maysa daytoy a naan-anay a repaso no ania iti isursuro ti Biblia maipapan ken Jesus ken patalgedanna nga awan panagduadua a ni Jesu-Kristo isut’ katan-okan a tao a nagbiag pay laeng.” Kalpasanna maiturong iti komento ni Napoleon maipapan ken Jesus kas nakotar idiay maikatlo a parapo ti introduksion daytoy a libro.
6 Lumtuad met dagiti kaasping a gundaway a mangsaksi kadagiti kaaruba wenno dipay mamati a kabagian. Ikararagyo a mangted ni Jehova kadakayo ti tured ken abilidad nga agsao iti maiparbeng a tiempo. (Ara. 4:29, 31) Ania pay ti nasaysayaat a kapadasan a maadda kadatayo ngem iti pannakatulong ti maysa a kaadalan, katrabaho, kaaruba, wenno kabagian a mangammo ti dalan nga agturong iti agnanayon a biag?—Juan 14:6.