Panangusar Kadagiti Tract a Mamataud iti Makagunggona a Resulta
1 Ti moderno nga aldaw nga organisasion ni Jehova ket addaan ti historia iti naballigi a panangusar kadagiti tract. Ti mismo a nagan iti legal a korporasiontayo, a Watch Tower Bible and Tract Society, impamatmatna a dagiti tract ket nasken ti papelda iti paset ti pannakaiwaragawag iti naimbag a damag. Manipud 1881 aginggat’ 1918, nasurok a 300 a milion a tract ti naiwaras dagiti tattao ni Jehova. Adu kadagiti nagbalin a kameng iti natda a kakabsat ni Kristo bayat daytoy a periodo ti immuna a naiyammo iti kinapudno babaen kadagitoy a nagkauna a tract.
2 Idi 1987 napabaro ti pannakaigunamgunam iti pannakausar dagitoy a babassit a tract babaen ti pannakairuar dagiti uppat ti kolorna a maalan manipud pay idi. Naiyanunsio idi 1992 a “Manangawit iti Lawag” a Kombension ti Distrito a daytoy a serye dagiti tract iti mapawadwad babaen ti mainayon manen nga uppat a dekolor ken makatukay iti panunot a tract. Isuda dagitoy Liwliwa Kadagiti Malmaldaang, Tagiragsakenyo ti Biag ti Pamilia, Sino a Talaga ti Agturay ti Lubong?, ken Daytoy Kadi a Lubong Makalasatto? Us-usarenyo kadi amin dagitoy walo a tract a mamataud ti makagunggona a resulta iti ministerioyo?
3 Ti naimbag a resulta isut’ agtaud manipud iti panangusar kadagiti tract a sieepektibo. Kasapulan nga ikabisado ti bagbagitayo iti tunggal maysa kadagitoy. Kas ehemplo, pinadasyo kadin a binasa ida a siaannad tapno maimula iti panunot no ania ti ilawlawag iti tunggal maysa kadagitoy? Napanunotyon aya no ania a tipo dagiti tao ti maallukoy iti kada maysa a tract. Ti naan-anay a panangkabisado iti kada tract isut’ mamatanor ti talekyo a mangusar kadakuada iti panagbalaybalay a trabaho agraman ti dadduma a situasion a maipaay iti impormal a panangsaksi.
4 Usaren iti Panagbalaybalay a Ministerio: Insurat ti maysa a manangaywan ti sirkito: “Nagballigiak a nangirugi kadagiti kaaduan a diskusionko babaen ti tract.” Pinadasyo aya daytoy nga idudupag? Apay a dikay usaren dagiti tract a kas pamay-an a pangirubbuat iti saritaan? Babaen dagitoy walo a tract, maaddaantayon ti walo a pagpilian iti makatignay nga introduksion. Kada tract ti mangted kadatayo iti gundaway a mangirugi ti panagadal iti Biblia bayat ti umuna nga ipapan wenno panagsarungkar.
5 Adda sabsabali nga oportunidad a pangusaran kadagiti tract. Bayat ti saritaan iti ruangan, mabalin a maammuan a ti maysa a tao ket nagminatay iti maysa nga ay-ayaten wenno adda masaksakit. Dagiti tattao nga agsagsagaba ti nakaro a sinnaay wenno ikagkagumaanda a sarangten iti nabayagen a problema ti masansan a makapatanor iti negatibo a rikna ken kinaliday. Anian a naayat a banag nga iranud kadakuada ti mensahe iti pammaregta a masarakan idiay tract a Liwliwa Kadagiti Malmaldaang! Maammuanyo a ti maysa a tao ket nabiit pay a nakidiborsio, nakisina wenno napukawna iti panggedanna. Dagita a kapadasan ti nakas-ang ken makaranggas unay iti pamilia. Usarenyo ti salsaludsod iti panid 2 ti tract a Tagiragsakenyo ti Biag ti Pamilia: “Apay a dagiti pamilia ita ket nabombada kadagitoy a serioso a problema? Kasanotayo a masagrap ti biag iti pamilia?” Nalabit a dagitoy a saludsod ti kangrunaan nga adda iti panunot ti maysa a tao. Agpapan pay saan nga agminar a dagus iti interes, posible a ti tract ket basaenna iti masanguanan.—Ecl. 11:6.
6 Kadagiti dadduma a teritoria iti kongregasion ket masansan a matrabaho, ket adun a tattao ti addaanen iti literaturatayo. Babaen ti panangusar iti tract, maaddaantayo ti gundaway a mangilawlawag iti bumalay ti maysa a makapainteres a banag, a maallukoytayo, ket matignaytayo nga agpanunot maipapan iti namnama ti Pagarian. Mangimulakayo ti saludsod iti panunotda a mabalin a pagsaritaan ti masanguanan a tiempo. Sarungkaranyo, ket parnuayenyo ti mainayon nga interes. Inton agtanoy mabalin a mairugiyo ti panagadal kenkuana babaen iti maysa a broshur wenno libro nga addan kenkuana.
7 Usarenyo Dagiti Tract iti Impormal: No mangitugottayo ti tract iti nalaka laeng a magaw-at—idiay bulsa, pitaka, wenno bag a pangasaba—mausartayo ida iti adu a nagduduma nga okasion, uray sadino a pakasarakan ti tao. Usarenyo ida no aggatang, agbiahe, wenno makisaokayo kadagiti kabagian wenno sangaili. Tulongannatayo dagiti tract iti amin a gundaway a mangted ti ababa a panangsaksi. Ti maysa a tract ket banag a saanna a gaburan ti maysa a tao ngem maysa natadem ken nainsiriban. Masansan a nalaklaka nga awaten ngem ti maysa a libro wenno magasina, agsipud ta saan unay nga adu ti basaen.
8 Alistokayo koma iti amin nga oportunidad a mangitukon kadagiti tract nga impormal idiay pagadalan wenno lugar ti panggedan, iti restauran, estasion ti gas, ken dadduma pay. Idi naiyurnosna nga itulod ni apongna a baket idiay doktor, ti maysa a kabsat a babai ket sinigurona nga adda naitugotna a tract. Idiay opisina ti doktor, rinugianna a kinasao iti maysa nga ina a masikog. Kalpasan a naipakitana iti babai ti tract a Biag iti Maysa a Natalna a Baro a Lubong, sinaludsod ti kabsat a babai: “Kayatyo kadi a padakkelen dayta anakyo iti maysa a lubong a kas nailadawan ditoy?” Nabalinanna a sinaruno dayta a pannakisao idi a simmarungkar iti balay daytoy babai. Nagbanag daytoy iti regular a panagsarungkar kenkuana.
9 Mabalin a Mairugi iti Panagadal ti Biblia Babaen iti Tract: Maysa a manangaywan ti sirkito iti nagreport a ti kongregasion a binisitana ket nakairugi iti 64 a panagadal ti Biblia iti pagtaengan bayat ti lawas babaen iti panangusarna ti tract no kablaawanna iti bumalay.
10 Pinadasyo kadin nga intukon ti panagadal iti Biblia bayat ti umuna nga ipapan iti panagbalaybalay? Babaen ti panangusar iti tract, mabalin a maidemostrayo ti apagbiit no kasano a maidaulo iti panagadal. Maysa a kabsat a babai ti nangaramid iti daytoy babaen ti panangusarna iti Biag iti Maysa a Natalna a Baro a Lubong. Babaen iti panangitudona ti ladawan, sinaludsodna iti bumalay no patienna a ti dagatayo ket kastanto iti langana. Kalpasan a simmungbat daytoy bumalay, inawis ti kabsat a babai a basaenna iti 2 Pedro 3:13 ken Isaias 65:17, a dagitoy ti nailawlawag idiay tract. Kalpasanna kinuna daytoy kabsattayo: “Dagitoy a karkari ket saanda a tagtagainep wenno pantasia laeng ngem aktual a maaramid babaen ti Sao iti Dios, ti Biblia.” Inyurnosna ngarud ti agtultuloy a pannakisao iti sumaruno a lawas. Iti sumaganad a bisita, dadduma kadagiti saludsod ti babai iti nasungbatan ket ti libro a Mabalinyo ti Agbiag nga Agnanayon iti Paraiso a Daga ti naibati. Nagresulta daytoy iti panagadal ti Biblia.
11 Maysakayo aya a baro laeng a bautisado wenno nalabit saan pay a bautisado nga agibumbunannag nga agsansanay iti ministerioyo? No kasta, nalabit a kayatyo a saraken dagidiay addaanen ti kapadasan tapno kiddawenyo iti singasingda ti panangusar kadagiti tract iti teritoria ti kongregasionyo. Adu dagiti ehemplotayo iti Biblia maipapan kadagidiay immawat ti pammaregta ken panangiturong manipud kadagiti nataenganen iti pammati.—Ara. 18:24-27; 1 Cor. 4:17.
12 Ti konduktor iti Panagdal ti Libro iti Kongregasion ti nangruna a makatulong iti panangurnos kadagiti dadduma a tumulong ti sabsabali a mangusar iti tract a sieepektibo. Responsabilidad dagiti nagannak a tulongan dagiti annakda nga umabante iti panangasaba a trabaho. Maysa nga agtutubo a Saksi ti nasanay babaen dagiti nagannakna a mangitukon iti tract a Biag iti Maysa a Natalna a Baro a Lubong. Bayat a nakikuyog ken nanangna iti panagadal ti Biblia, intukonna ti maysa a tract iti asawa ti interesado a babai. Nagustuan ti asawa a lalaki daytoy agtutubo a tao nga addaan iti kasta a nabileg a relihioso a pammati. Nagragsakanna a binasa ti tract. Kada tiempo a kumuyog daytoy agtutubo a babai ken nanangna, makiraman a mangted iti maysa a kasuratan wenno estoria ti Biblia a nangruna nga insaganana a maipaay kenkuana. Itan ti lalaki a regularen a managbasa kadagiti magasina, ket naginteres iti libro a Tampok ti Apocalipsis, ken tumabtabunon iti gimong. Amin dagitoy ti resultana gapu ta dagiti nagannak ket itiempoda a tamingen ti rebbengenda a mangisuro iti anakda a mangusar a naimbag kadagiti tract.
13 Usarenyo Dagiti Baro a Tract a Sieepektibo: Iti panangusar ti tract a Daytoy Kadi a Lubong Makalasatto?, mabalin nga iyammoyo iti bagiyo ken rugian ti saritaanyo babaen iti panagkuna: “Naimbag a bigatyo. Makisasaokami kadagiti tattao maipapan ti kualidad iti biag kadagitoy nga aldaw. Pagarupenyo kadi a ti kualidad iti panagbiag ket sumaysayaat, wenno lumalaad? [Palubosan a sumungbat.] Kunaen dagiti adu a ti paspasamak ditoy lubong ita ket kaitungpalan dagiti padto iti Biblia ket ti panungpalan daytoy lubong asidegen. Ania ti makunayo?” Kalpasan a sumungbat iti bumalay, itukonyo ti tract ken awisenyo iti asikasona kadagiti tallo a saludsod idiay maikadua a parapo. Kalpasanna surotenyo nga agtultuloy ti sasao iti tract a mangipakita no kasano a nagpatingga idi ti maysa a lubong ket daytoy agdama agngudonto met. Inton agultimo ti bisita, maiyurnos iti sabali a sarungkar tapno mausig dagiti ebidensia ti Biblia a ti panungpalan daytoy lubong ket asidegen.
14 Adu a daras a maisarak ti bagbagitayo iti kasasaad a mairanud ti mensahe iti Pagarian kadagiti sabsabali ti uray apagbiit, a kas idiay panggedan ken pagadalan. Iti lugar ti pagsapulanyo, tumaud ti diskusion maipapan iti kallabes a damag maipapan ti gobierno. Kumanunongkayo a nupay ikarigatan dagiti pangulo a naimbag iti gandatda, ti lubong ket agsagsagaba latta a nakaro iti intero a historia. Kalpasanna iturongyo iti baba ti parapo idiay panid 2 iti tract a Sino a Talaga ti Agturay ti Lubong? Basaen dagiti tallo a makawarwar ti panunot a salsaludsod. No awan ti tiempo a maipaay iti ababa a saritaan, ited idiay tao ti tract ken maiyurnos a malawaganto dagiti saludsod iti sabali a tiempo wenno lugar.
15 Kas indibidual ken pamilia, itiempo a tingitingen no kasano a maiparang dagitoy a nagduduma a tract. Mangaramidkayo ti sesion iti panaginsayo. Kasanoyo nga usaren dagiti tract a kakuyog ti sabali a literatura a madakamat iti tay-ak ti ministerio iti bulan? Ania dagiti naitulag a turongenyo a mabalinyo nga itugot dagiti tract kadakayo? Adda aya makasaoyo iti daytoy a lawas a magunggonaanyo manipud iti naimtiempuan a mensahe dagiti tukon a tract?
16 Ti napasnek nga ayat ken Jehova ken pannakaseknan kadagiti tattao iti manggutugot kadatayo a mangaramid ti amin a kabaelantayo a mangipakaammo iti naimbag a damag. Ti panangusar iti tract a regular ti tumulong kadatayo iti dayta. Maysa nga ubing a lalaki, a pito iti tawenna, ti agtarigagay a tumulong iti kaaruba tapno makastrekda idiay baro a sistema, gapuna a nangted kadakuada ti tract, ket maysa a panagadal iti Biblia ti naipasdek. Kasdiay ti kalakana! Ngem patgentayo kadi daytoy a naglaka nga iyaasideg iti ministeriotayo? Iti sumaruno a daras a makaibatitayo ti tract iti maysa a tao, mabalin nga agtinnagto met dayta iti panagadal ti Biblia. No nainsiriban nga usaren dagiti tract a mangikasaba ti naimbag a damag iti Pagarian, masigurotayo a magun-odan dagiti makagunggona resultana.