Panangiparang ti Naimbag a Damag—Babaen ti Panangusar a Sieepektibo Kadagiti Tract
1 Bayat daydi 1987 nga “Agtalekkayo ken Jehova” a Kombension ti Distrito, adda uppat a baro a tract a nairuar. Nausaryo kadin dagitoy a tract a sieepektibo iti tay-ak?
2 Adu dagiti agibumbunannag ti mangibati iti tract no awan dagiti madanon iti balay. Ken mangtedda kadagiti tattao a kupadoda unay a saanda a mabalin ti dumngeg kadagiti ruangan. Masarakan met dagiti dadduma a no usarenda ti tract a mangiyammo iti bagida, makatulong a mangtukay iti interes ti bumalay.
KAANO KEN KASANO NGA USAREN IDA
3 No naridamkayo kadagiti oportunidad, makasarakkayo iti adu nga okasion a maitukon dagiti tract. Kas pangarigan, makatulong dagiti tract no kasabaan dagiti kabagian. Mausaryo dagitoy no agbakasionkayo, no aggatang ken agbiahekayo, no addakayo iti pagadalan, wenno idiay panggedan. Mangiduldulinkayo aya kadagiti tract idiay nalaka laeng a magay-at, nalabit iti bulsa, pitaka, iti bag wenno maletayo? Apay a dikay isapul iti okasion nga itukon dagiti tract?
4 Mabalinyo nga usaren dagiti tract a mangted iti mas epektibo a pammaneknek. Nupay ababa ti mensahe a linaonda, makakombinseda unay ken suportadoda iti nalawag a Nainkasuratan nga argumento. Naranga iti kolor dagiti ilustrasion dagitoy a tract ken dakkel ti maibanagda a pagimbagan iti ministerio.
IDIAY TAY-AK Ti SERBISIO
5 Dadduma kadagiti agibumbunannag ti mangilawlawag a madagdagus iti titulo ti tract idiay introduksionda pay laeng. Apay a dikay padasen a mismo daytoy nga idudupag? Mabalinyo a kunaen: “Komustakayo. Maragsakanak a nakadanon kadakayo ditoy balayyo. Nagboluntarioak a mangidanon kadakayo iti maysa a napateg unay a mensahe. Isut’ masarakan iti daytoy tract a Biag iti Maysa a Natalna a Baro a Lubong. Isu daytoy ti kopiayo. Libre. [Maiyawat iti bumalay.] Dikay kadi kayat ti agbiag iti kasta a nagtalna nga arubayan?” Kalpasanna maitultuloy ti Topiko a Pagsasaritaan, a maisinggalut iti tukon ti bulan.
6 Ti tract a No Apay a Mapagtalkanyo ti Biblia ket mabalin nga epektibo met dita lugaryo. Kas pangarigan, mabalinyo a kunaen: “Mangibatbatikami iti libre a mensahe ti Biblia kadagiti kaarubami ita nga aldaw. Daytoy ti kopiayo. [Maiyawat iti bumalay.] Matmatanyo a ti suhetona isut’ maipapan iti Biblia. Makunayo kadi a dagiti tattao ita ket napukawen ti talekda iti Biblia? [Palubosan a sumungbat.] Daytoy a tract ti tumulong kadakayo a kumita no apay a mapagtalkantayo iti makuna ti Biblia.” Maituloy ti Topiko a Pagsasaritaan, a maipakita dagiti bendision nga insagana ti Dios ditoy daga.
7 Ti panangiwaras kadagiti tract ti Biblia isut’ maysa nga epektibo a pamay-an a mangiparang iti naimbag a damag. Napateg a papel iti takderanda iti ministerio ken panangasabatayo iti impormal. Usarentayo ida a sieepektibo a mangted iti naimbag a pammaneknek ken tumulong iti daddurna a mangadal maipapan iti Pagarian ti Dios.