Usaren Dagiti Tract a Mangiwaragawag iti Naimbag a Damag
1. Kasano nga inusar dagiti adipen ti Dios dagiti tract?
1 Nabayagen nga us-usaren dagiti adipen ni Jehova dagiti tract a naibatay iti Biblia a mangiwaragawag iti naimbag a damag. Idi 1880, inrugi ni C. T. Russell ken dagiti kakaduana nga ipablaak ti Bible Students’ Tracts, ken naited daytoy kadagiti agbasbasa iti Watch Tower tapno iwarasda kadagiti tattao. Nakapatpateg dagiti tract ta idi inrehistro ni C. T. Russell idi 1884 ti saan a komersial a legal a korporasion para iti pannakayadelantar dagiti interes ti Pagarian, ti sao a “tract” ket nairaman iti nagan a Zion’s Watch Tower Tract Society, a maawagan itan iti Watch Tower Bible and Tract Society of Pennsylvania. Idi 1918, nasurok a 300 a milion a tract ti inwaras dagiti Estudiante ti Biblia. Agingga ita, epektibo pay laeng dagiti tract a mausar iti panangasaba.
2. Apay nga epektibo dagiti tract?
2 No Apay nga Epektibo: Namaris ken makaay-ayo a kitaen dagiti tract. Ti ababa a mensahena ket nalaka a tandaanan ken makaisuro. Makaay-ayo dagitoy kadagiti bumalay nga agkedked a mangala iti magasin wenno libro. Dagiti tract ket nalaka nga ipaima, uray dagiti kabbaro nga agibumbunannag ken ubbing. Malaksid iti dayta, bassit ken nalaka nga itugot dagiti tract.
3. Mangisalaysaykayo iti personal wenno naipablaak a kapadasan a mangipakita iti kinapateg dagiti tract.
3 Adu ti nakaammo iti kinapudno babaen iti tract. Kas pagarigan, adda maysa a babai iti Haiti a nakakita iti maysa kadagiti tract-tayo iti kalsada. Pinidutna dayta, binasana sa kinunana, “Nasarakakon ti kinapudno!” Di nagbayag, napan iti Kingdom Hall, nagpayadal iti Biblia, ken nabautisaran idi agangay. Napasamak dagitoy gapu iti bileg ti Sao ti Dios a nailanad iti tract.
4. Ania ti kalattayo no dagiti tract ti tukon iti bulan?
4 Iti Binalaybalay: Yantangay epektibo dagiti tract iti panangasaba, addanto dagiti bulan a dagitoy ti maitukon a literatura, mangrugi inton Nobiembre. Ti kalattayo ket saan laeng a basta agipaima iti tract no di ket usarentayo dagitoy a mangirugi iti saritaan. No interesado ti bumalay iti damo a pannakisaritatayo wenno iti isasarungkartayo, mabalintayo nga idemostra ti panagadal iti Biblia babaen ti panangusartayo iti libro nga Isursuro ti Biblia wenno ti sabali pay a publikasion a mausar iti panangyadal. Kasanotayo nga itukon dagiti tract iti binalaybalay? Agduduma dagiti tract isu a masapul a pamiliartayo iti tunggal maysa kadagita.
5. Kasanotayo nga itukon dagiti tract iti binalaybalay?
5 Masapul nga ibagaytayo ti presentasiontayo iti teritoria ken iti tract nga ipaimatayo. Mabalintayo nga irugi ti saritaan babaen ti panangted iti tract iti bumalay. Mabalin a matukay ti interes ti bumalay gapu iti makaay-ayo a parupana. Wenno mabalintayo ti mangipakita iti sumagmamano a tract sa pagpilientayo ti bumalay no ania ti magustuanna. No saan a kayat dagiti tattao a luktan ti ridawda, ibatogtayo dagiti tract iti lugar a makita ti bumalay ti parupana, wenno nalabit saludsodentayo no mabalintayo ti mangisuksok iti pagbasaan iti ridawda ken ammuentayo ti opinionna. No maysa a saludsod ti paulo ti tract, mabalintayo a damagen no ania ti makunana iti dayta. Wenno mabalintayo ti mangibangon iti saludsod a mangtukay iti interes ken mangirugi iti saritaan. Kalpasanna, ibasatayo ti sumagmamano a linaon ti tract, agsardengtayo kadagiti saludsod, ken kiddawentayo a sumungbat ti bumalay. Mabalintayo a basaen iti Biblia dagiti kangrunaan a teksto. Kalpasan a mausig ti sumagmamano a material, ingudotayo ti saritaan ken makitulagtayo no kaanotayo nga agsubli. No gagangay a mangibatbati ti kongregasion iti literatura kadagiti pagtaengan nga awan dagiti bumalayna, mabalintayo ti mangibati iti tract iti lugar a saan a makita dagiti aglabas no awan ti madanontayo a bumalay.
6. Kasano a mausar dagiti tract iti panangasaba iti lansangan?
6 Panangasaba iti Lansangan: Inus-usaryo kadin dagiti tract iti panangasabayo iti lansangan? Adda dagiti tattao nga agdardaras ken saanda a kayat ti sumardeng tapno makisarita kadatayo. Mabalin a narigat nga ilasin no interesadoda. Imbes nga ikkantayo ida kadagiti kaudian a ruar dagiti magasin a ditay ammo no basaenda wenno saan, apay a ditay ikkan ida iti tract? Gapu ta makaay-ayo ti parupana ken ababa ti mensahena, mabalin a matignay dagiti tattao a mangbasa iti linaonna no adda wayada. Siempre, no saanda nga agdardaras, mabalintayo nga ilawlawag kadakuada ti sumagmamano a linaon ti tract.
7. Mangisalaysaykayo iti kapadasan a mangipakita no kasano nga usaren dagiti tract iti di pormal a panangasaba.
7 Di Pormal a Panangasaba: Naglaka ti mangasaba iti di pormal babaen kadagiti tract. Adda maysa a kabsat a lalaki a mangibulbulsa iti sumagmamano a tract no adda papananna. No adda makasaritana, kas iti tindero, ikkanna laeng iti tract a basaenna. Idi napan nagpasiar idiay New York City ti maysa a pagassawaan, napanunotda nga adu ti tattao sadiay a naggapu iti nagduduma a pagilian. Gapuna, intugotda ti bokleta a Nations ken ti sumagmamano a tract a nagduduma ti lenguahena. No adda mangngegda nga agsasao iti ganggannaet a lenguahe nga aglaklako iti igid ti kalsada wenno dagidiay adda iti asideg ti pagtugtugawanda iti parke wenno restawran, mangtedda iti tract iti lenguahe dayta a tao.
8. Iti ania a pamay-an a mayarig dagiti tract iti bin-i?
8 “Imulam ti Bin-im”: Dagiti tract ket mayarig iti bin-i. Ti mannalon iwarisna ti bin-i gapu ta saanna nga ammo no ania kadagita ti agtubo. Kuna ti Eclesiastes 11:6: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.” Sapay koma ta ‘agtultuloytayo nga agiwara iti pannakaammo’ babaen daytoy nga epektibo unay nga alikamen iti panangasaba.—Prov. 15:7.
[Blurb iti panid 3]
Yantangay epektibo dagiti tract iti panangasaba, addanto dagiti bulan a dagitoy ti maitukon a literatura, mangrugi inton Nobiembre