Nainsiriban a Panangusar Kadagiti Nasken a Kagawaan
1 Bayat a mangsaksikayo kadagiti ruangan, masapul a ti kalatyo isut’ Nainkasuratan a pannakisao iti kada bumalay babaen ti panangusar iti Biblia ken dadduma a nasken a kagawaan. (Maidilig iti 2 Corinto 6:1; 2 Timoteo 2:15.) Ania ti pakaseknan dagiti tattao idiay teritoriayo kadagitoy nga aldaw? Madanaganda aya maipapan iti kasasaad ti ekonomia ken iti panagbahada ti kualidad iti biag ti pamilia? Ti sumagmamano a panglukat a sasao iti uray ania kadagitoy a topiko ti mabalin a mangiturong iti nasayaat a diskusion ti Biblia.
2 Mabalinyo a kunaen:
◼ “Kadagitoy dumegdeg a tiempo, adu a tattao ti makarikna iti rumigat a panagbiag. Pagarupenyo kadi a ti natauan a gobierno ket masolbarna iti pinansial a problematayo? [Denggenyo ti sungbatna.] Nasarakak a mismo daytoy a kapanunotan nga isut’ kaimbagan . . . ”
3 Kalpasanna mabalinyo a basaen iti Salmo 72:12-14 ken pumilikayo met ti kanayonan a teksto manipud iti pinanid 157-8 ti Panakirinnason a libro. Wenno kalpasan a mabasa ti maysa a kasuratan, mabalinyo nga iturong iti maysa a parapo idiay tract a Biag iti Maysa a Natalna a Baro a Lubong. Adu nga agibumbunannag—agraman agtutubo—ti naballigi a nangirugi iti panagadal ti Biblia kadagiti tract babaen iti panangbasa ti maysa a parapo ken kalpasanna masaludsodan iti bumalay no ania ti opinionna iti nabasa.
4 Iti dadduma a komunidad nalabit a kaykayatyo nga usaren daytoy nga iyaasideg:
◼ “Adu a tattao ti agmayat a makakita a maisubli iti nabangonan a biag ti pamilia. Mapanunotyo kadi a tunggal maysa ket ikeddengna no ania a prinsipio ti masurot, wenno adda maysa a pagalagadan nga agpaay iti amin? [Palubosanyo a sumungbat.] Adu ti kumanunong a no ti balakad iti Biblia ti masurot, adda nagpaiduma a panagsayaat iti kualidad ti napamiliaan a biag.”
5 Iti daytoy a punto mabalin a kayatyo nga usaren dagiti puntos idiay baba ti subtema a “Sadino ti Dalan nga Agturong iti Balligi?” idiay baro a tract a Tagiragsakenyo ti Biag ti Pamilia a pangirugi iti panagadal ti Biblia, wenno iturongyo iti kapitulo 29 ti Agbiag nga Agnanayon a libro ken maipakita dagiti puntos idiay pinanid 243-6.
6 No kabaelanyo nga ipasdek iti panagadal ti umuna a sarungkar, aramidenyo iti masinnunuo nga urnos a maitultuloy ti diskusion iti masanguanan a petsa. Mabalin a maisaadyo ti pamuon a maipaay iti sumaruno a sarungkar babaen ti panangibagayo iti bumalay nga no agsublikayo kayatyo a mairanud kenkuana ti sungbat daytoy masansan a maisaludsod: “Apay a pinalubosan ti Dios iti kinadakes?” Ti artikulo iti baba ti mangisingasing no kasano a ti suheto ket maputar iti sumaruno a sarungkar.