Tulongan iti Dadduma a Mangbigbig iti Dakkel a Gameng
1 No ikasabatayo ti naimbag a damag iti Pagarian, maysa kadagiti rantatayo isut’ panangtulong kadagiti tattao a mangipateg iti Sao ti Dios. (Fil. 3:8) Akmen dagiti literaturatayo ti napateg a paset iti pannakaiwaragawag ti damag iti Pagarian. Kas ehemplo, ti Agnanayon nga Agbiag a libro natulonganna dagiti ginasut a ribo a tattao nga agserbi ken Jehova a kas resulta ti kinapudno a naadalda.
2 Ti ministeriotayo ramanenna iti ad-adu ngem ti mangibati laeng iti literatura kadagiti tattao. Kayattayo nga iyammo ti damag iti makaawis a pamay-an, a denggen a buyogen ti pannakaawat no ania iti sawen ti bumalay, kalpasanna nakasaganatayo a ‘makirinnason kenkuana manipud iti Kasuratan.’—Ara. 17:2.
3 Kasano a Maaramid Daytoy? Ti introduksiontayo ti manglukat iti dalan nga agpaay ti bumalay a mangipakita no pudno nga interesado iti Biblia ken ti mensahena.
Mabalinyo a kunaen:
◼ “Immayak a makisarita kadakayo maipapan ti kaipapanan iti mapaspasamak ditoy lubong ita. Kadagiti adu a tattao bumasbassit ti interes maipapan iti Dios ken ti pagalagadanna a maipaay iti biag kas naituyang iti Biblia. Daytoy ti dakkel a nangimpluensia iti kababalin dagiti tattao iti maysa ken maysa. Nadlawyo kadi daytoy? [Palubosan a sumungbat. Mabalinyo a dakamaten dagiti masinunuo a pasamak.] Pangaasiyo ta siputanyo ti kababalin dagidiay nadakamat iti 2 Timoteo 3:1-5, ket ibagayo kaniak no pudno daytoy ita iti daytoy a lubong. [Basaen; palubosan nga agkomento.] Adda kadi natalged a rason a manamnama ti nasaysayaat a kasasaad iti masakbayan?” Iturong idiay ladawan iti pinanid 12 ken 13 ti Agnanayon nga Agbiag a libro ken iturong ti asikaso iti parapo 12 ken 13. Itukon ti libro.
4 No ti nagannak iti sumabat idiay ruangan, mabalinyo nga irugi ti saritaan iti kastoy a wagas:
◼ “Makisaritakami kadagiti tattao nga interesado no kasano a nasaysayaat a masaranget dagiti problema iti napamiliaan a biag. Padpadasentayo nga aramiden ti kasayaatan a kabaelantayo, ngem no adda banag a nasaysayaat pay a makatulong kadatayo nga agballigi, interesadotayo iti dayta, saan aya? [Palubosan a sumungbat.] Ited ti Biblia iti direksion maipapan daytoy a banag kas masarakan ditoy Colosas 3:12-14. [Basaen.] Gapuna, ania ti nasken tapno masagrap iti naballigi a biag ti pamilia? Siputanyo no ania ti nakuna iti daytoy a publikasion iti kapitulo a napauluan ti ‘Panamagballigi ti Biag ti Pamilia.’” Basaen ti parapo 3 iti panid 238 ti Agbiag nga Agnanayon a libro. No ti bumalay ket kupado ken saan a nakasagana a dumngeg, padasenyo nga itukon dagiti kallabes a magasina a mangilawlawag ti napamiliaan a bambanag wenno ti tract a Tagiragsaken ti Biag ti Pamilia.
5 Ditay kayat a pulos a mapukaw ti panagkitatayo iti panggep ti pannangted iti naan-anay a panangsaksi maipapan ti Pagarian. (Mat. 24:14) Babaen ti nasayaat a panangusar iti Biblia ken dagiti nakaskasdaaw a gameng dagiti teokratiko a literatura nga adda kadatayo, mabalintayo a sitatalek ti kumita ken Jehova a maipaay iti bendisionna a mangitungpal ti pagayatanna bayat dagitoy agngangabit a tiempo.—Gal. 6:9.