Maparang-ayyo Kadi ti Panagdayawyo ken Jehova Bayat ti Abril?
1 Naaddaan ni David iti naimpusuan a tarigagay a mangidayaw ken Jehova, gapuna a kinunana: “Dayawekto ni Jehova iti kasta unay babaen ti ngiwatko, ket iti tengnga dagiti adu a tattao dayawekto.” (Sal. 109:30) Ti Abril isut’ nasayaat a tiempo a ‘mangnayon iti amin a dayawna’ babaen ti panangparang-ay ti pannakibuligtayo iti ministerio. (Sal. 71:14) Nakaplanokayo aya a mangaramid iti daytoy babaen ti pannakidanggayyo iti rango dagiti auxiliary payunir?
2 Agplanokayo Itan: “Dagiti plano ti nagaget a tao sigurado nga agrang-ayda,” kasta ti kuna ti Proverbio 21:5. Kaipapanan daytoy ti panangikararag ken Jehova, nga isut’ ilugar nga umuna iti planoyo. (Prov. 3:5, 6) Sumaruno a tingitingen ti iskediolyo tapno kitaen no sadino iti pangatoran tapno mabusbos ti dua nga oras iti kada aldaw idiay ministerio. Ti ‘pananggatang’ iti tiempo manipud dadduma nga ar-aramid ti mangipalubos kadakayo a mangideboto ti ad-adu a tiempo iti panangasaba a trabaho.—Efe. 5:16.
3 Makiuman ken Makitinnulong: Nadakamat ni apostol Pablo a dadduma ti “nagbalinda a makapabileg a tulong” kenkuana a nangitungpal iti ministeriona. (Col. 4:11) Ibagayo dagiti planoyo kadagiti dadduma a mayat nga agpalista inton Abril. Ti suportar ken pannakikuyogda ti mangyeg iti espiritual a gunggona. Ti manangaywan iti serbisio ti makatulong kadakayo no adda saludsodyo maipapan iti urnos ti tay-ak.
4 Ti kooperasion iti uneg ti pamilia ti tumulong iti dadduma a miembro nga ag-auxiliary payunir. Ti iskediol iti trabaho ti sangakabbalayan ti temporario a mabaliwan. Ti maysa a napamiliaan a diskusion kadagitoy a kasapulan ti makatulong a mangibanag iti daytoy a panggep. Ti nasayaat a komunikasion ken kooperasion isudat’ tulbek ti balligi.
5 Salimetmetanyo ti Positibo a Panangmatmat: Dikay agdardaras nga agkuna a saanyo a masapar ti ag-auxiliary payunir gapu iti di nawaya a sasaadenyo. Dagiti agtutubo ti pagadalan, dagiti retirado, assawa a babbai nga addaan annak, dagiti ulo ti pamilia iti amin a tiempo a trabaho, amin dagitoy ti maka-auxiliary payunir iti Abril. Kumanunongda iti salmista nga “iti biang dagiti nalinteg a tattao maiparbeng ti panagdayaw,” ket sitatallugodda a mangipamuspusan a mangusar ti 60 nga oras iti ministerio. (Sal. 33:1) No dikay makapalista, apay a dikay makiraman iti rag-o babaen ti panangparang-ay iti aktibidadyo kas agibumbunannag?
6 Kadagiti adu, ti panag-auxiliary payunir iti Abril isut’ tukad a bato nga agturong iti regular payunir a serbisio. Babaen ti naparang-ay nga aktibidadda, masarakanda a nalaka gayam ti agpalista a regular payunir.
7 Ti Abril isut’ napaburan a tiempo a maipaay iti napawadwad a teokratiko nga aktibidad, maigapu ta nasayaat iti panniempo ken bakasion ti pagadalan. Masansan nga ad-adu ti panangsaksitayo iti agsapa ken rumabii. Wen, ti panag-auxiliary payunir iti Abril isut’ nasayaat a dalan nga agturong iti maparang-ay a panagdayaw ken Jehova.