Panangirugi iti Panangyadal ti Biblia Babaen iti Libro nga Agbiag nga Agnanayon
1 Tignayennatay koma ti ayat iti tattao nga agsubli a dagus tapno matulongan dagidiay mabisin ken mawaw ti kinapudno. (Mat. 5:6) Parayrayentay koma ti aniaman a rissik ti interes a masarakantayo, no ditay kayat a maiddep. Ti panagsagana isut’ tulbek ti balligi.
2 Ti koma kalattayo isut’ panangirugi iti panangyadal ti Biblia. (Mat. 28:20) Nairaman kadagiti damo a kopia ti libro nga Agbiag nga Agnanayon dagitoy pangrugian a sasao: “Pudno nga ekselente daytoy a libro nga usaren a mangyadal iti isuamin, ubbing ken lallakay, uray aniat’ nagaw-atda nga adal.” Ti estilo [ti pannakaisuratna] ti mangpalaka iti panangyadal, a mabalin a pakiramanan uray dagiti agdadamo nga agibumbunannag.
3 Kasanotay a Mairugi ti Panagadal?: Inton agsublitayo, nasayaat no pakisaritaan ti sumagmamano a saludosd a nadakamat idi damo a simmarungkartayo. Nalabit nagsaritaanyo ti kasasaad dagiti natay, a nangibati iti saludsod, “Aniat’ namnama dagiti pimmusay nga inay-ayattayo?” Ilawlawagyo a nalagda ti nakaibasaran ti namnama ti panagungar; nawadwad ti nailanad iti Biblia a pagarigan ti napasamaken a panagungar. Repasuen dagiti ilustrasion iti pinanid 167-9. Kalpasanna isalaysay ti naibaga iti parapo 1 ken 2 iti panid 166.
4 Nalabit adda nakasaritayon a naganak a maseknan iti parparikut iti panangpadakkel kadagiti annak. Mabalin a kastoy ti kunayo:
◼ “Kayat dagiti nagannak a naimbag ti pagbanagan dagiti annakda. Naglaon ti Biblia iti pagsurotan a tumulong iti nagannak tapno masanay dagiti annakda a maaddaan iti makapnek a biag. Gapu iti dayta, irekomendarmi ti sangsangkamaysa a panangadal dagiti pamilia iti Biblia. [Kitaenyo ti parapo 23 iti panid 246.] Ti nagun-odan a pannakaammo mangyeg iti agnanayon a bendision iti intero a pamilia!” Basaenyo ti Juan 17:3. Itukonyo nga agsublikayto tapno idemostra iti pamilia no kasano a mairugi ti panagadal.
5 No maysakay nga agtutubo wenno agdadamo nga agibumbunannag ket nakisaritaanyo ti namnama ti Paraiso iti damo nga isasarungkar, a silulukat ti libro iti panid 3, kunaenyo laeng:
◼ “Ikari ti Biblia a dagidiay agaramid iti pagayatan ti Dios manamnamada ti agbiag iti maysa a lubong a kas itoy. Tinulongannak daytoy a libro a nangadal no aniat’ masapul nga aramidek tapno matagiragsakko dayta a bendision. Kayatkay koma a tulongan no kasano a maaramidyo met dayta.” Itukon nga idemostra ti wagas ti panagadaltayo.
6 Kas ad-adalan ni Jesus, obligasiontayo a tulongan dagiti tattao. (Roma 10:14) Rebbengentayo a parayrayen ti masarakantayo nga interes. (Mat. 9:37, 38) No umiso ti panangitungpaltayo iti daytoy nga annongen, mabalin a makiraman ti amin kadagiti ibungana a bendision.—1 Tim. 4:16.