Mangidaulo iti Panagadal ti Biblia iti Agbiag nga Agnanayon a Libro
1 Maipapan iti libro nga Agbiag nga Agnanayon, kinunana ti maysa a babai: “Sumaruno iti Biblia a mismo, nasarakak daytoy a libro nga isut’ kaumisuan ken makatignay a pedaso ti literatura a nabasak pay laeng!” Amintayo ti kumanunong a daytoy a libro isut’ kasayaatan pay laeng a naipablaak a tumulong iti tattao a mangawat ti Biblia ken matignayda nga agbalin a managdayaw ken Jehova.
2 Idi 1982, idi a nairuar ti Agbiag nga Agnanayon a libro, 60,098 nga agibumbunannag ti mangidadaulo iti 26,056 a panagadal ti Biblia ditoy Pilipinas. Idi Nobiembre, 1992, 111,665 nga agibumbunannag ti nangidaulo iti 95,357 a panagadal ti Biblia. Agingga ita, 62 a milion a kopia daytoy a libro ti naimalditen iti 115 a pagsasao. Anian a puersa ti naitulong daytoy a libro iti sangalubongan a trabahotayo!
3 Maituyang Dagiti Kalat: Daytoy a nagpaiduma a panagrang-ay isut’ resulta iti bendision ni Jehova ken ti pinget dagiti tattaona a tumulong iti tattao babaen ti makasalbar iti biag a mensahe ti Biblia. (Roma 10:13-15; 1 Tim. 2:4) Mailasintayo iti kinaganat ti tiempo ken iti panagkasapulan ti nagaget a panangiwaragawag iti Pagarian ti Dios.
4 Bayat nga umab-abante ti organisasion, ania ti ar-aramidentayo a tunggal maysa? Determinadotayo kadi a naan-anay a makiraman iti panagaramid ti disipulo a trabaho? Tapno maaramid daytoy, mangituyangtayo kadagiti bukodtayo a kalat. Mabalinantayo aya ti mas nagaget a mangsaruno iti interes? Apay a dikay mangiwayat iti kalat a mangirugi ti baro a panagadal iti Biblia bayat ti bulan iti Abril?
5 Siasino ti Makaidaulo iti Panagadal ti Biblia?: Adu nga agibumbunannag manipud iti nagduduma a nalikudan ti naaddaan iti rag-o a nangidaulo iti panagadal ti Biblia babaen iti Agnanayon nga Agbiag a libro. Gapu iti nalaka nga istilona, uray dagiti agdadamo nga agibumbunannag ket kabaelanda ti makiraman iti daytoy a trabaho. Mainayon pay, adu kadatayo ti nangadalen a personal iti daytoy, gapuna kabisadotayo dagiti linaonna. Maysa nga agibumbunannag nga awanan iti panagadal ti Biblia iti napalabas a nangusar iti Agnanayon nga Agbiag a libro ti nagsurat: “Adda tallo a panagadalko ken dandani mairugi iti maikapat. Diak maiyebkas ti umdas a panagyamanko iti kalaka ti mangikondukta kadagiti panagadal ti Biblia.”
6 Agtutubo, mangidaulokayo met iti panagadal babaen ti Agbiag nga Agnanayon a libro. Maysa nga agtutubo a kabsat a lalaki ti nangibati iti daytoy a libro ti rabaw iti lamisaanna idiay pagadalan. Daytoy ti nangituggod iti adu a panagadal ti Biblia. Dadduma nga agtutubo ti nangkiddaw kadagiti nagannak a masabetda iti balaybalay a ministerio ti permiso a maiyadalan iti Biblia dagiti annakda. Saan nga ubbing unay dagiti annaktayo a makisao maipapan iti kari ni Jehova a biag nga agnanayon idiay paraiso a daga.
7 Agtutubo wenno nataengan, ti maysa kadagiti karagsakan a maadda iti maysa idiay ministerio isut’ panangidaulo ti panagadal iti Biblia ti pagtaengan. Gapuna nga ikararagtayo amin iti tulong ni Jehova ken gammatan iti tunggal gundaway a mangiwaragawag ti namnamatayo iti publiko. Usaren ti Agbiag nga Agnanayon a libro a tumulong iti sabsabali a mangadal no kasano a maaddaanda ti pannakiraman iti panagdayaw ti Diostayo, ni Jehova.—Sal. 148:12, 13.