Biroken nga Umuna ti Pagarian ti Dios—Babaen iti Kanayon a Panangipaay Kadagiti Daton ti Panagdayaw
1 Kanayon a sasawen dagidiay mangbirok nga umuna iti Pagarian ti maipapan ken Jehova ken ti Pagarianna. (Sal. 145:11-13) Inaldaw nga addada gundaway a mangisarita iti naimbag a damag. (Sal. 96:2) Kinuna ti salmista: “Iti Dios mangidatonkamto ti panagdayaw iti agmalmalem.” (Sal. 44:8) No kasta met ti riknatayo, agraguttayto a makiraman a regular iti ministerio ti Pagarian.
2 Saan a nangipasdek ni Jehova kadagiti espesipiko a kasapulan no kasanot’ kaadu ti tiempo a masapul a busbosentayo iti ministerio, ngem paregtaennatay a “kanayon” a mangidayaw kenkuana. (Heb. 13:15) No ipalubos ti kasasaadtayo, pagbalinentay koma a kalat ti mangbusbos iti sumagmamano a panawen a mangidayaw ken Jehova a linawas. Dagidiay mangar-aramiden iti dayta mabalin a kabaelandan ti ag-auxiliary payunir sagpaminsan wenno regular pay ketdi. Sumagmamano kadagidiay auxiliary payuniren ti nalabit kabaelandan ti agpasalista kas regular payunir.
3 Posible kadi a pawadwadentay ti daton ti panagdayawtayo? Maparugso ti regta babaen iti panangipateg. Ti panangipateg sukayen ti personal a panagadal iti Saot’ Dios. Tignayennatay dagiti gimong ti kongregasion a mangyebkas iti dayta a panangipateg iti praktikal a wagas. Ti nasinged a pannakilangen kadagiti dadduma a naregta a managdaydayaw mabalin a ‘mangparegta [kadatayo] iti nasayaat nga ar-aramid.’ (Heb. 10:24) No gundawayantay a naan-anay dagitoy a probision, nalabit a maparang-aytayto ti daton ti panagdayawtayo.
4 Nangted ni propetisa Ana iti nasayaat a pagwadan iti serbisio ken ni Jehova. Nupay agtawen idi ti 84, “saan a pulos limmanglangan idiay templo, a mangipapaay iti sagrado a panagserbi iti rabii ken aldaw.” (Luc. 2:37) Ti naimpusuan a pannakiramanna kadagiti aramid ti kongregasion ket mangted ti pammaregta kadatayo itatta.
5 Inrekomendar ni Pablo a dagidiay ‘napigsa rebbeng nga anusanda dagiti pagkapuyan dagidiay di napigsa.” (Roma 15:1) Nalabit adda sumagmamano iti kongregasionyo ti mabalin a magunggonaan iti naasi a tulong ken pammaregtayo. Mabalin a masapul ti maysa nga agibumbunannag ti pagluganan wenno kaduana a mangasaba. Mabalin a parikut ti pannakaupay ti siasinoman, ket mabalin a makaipaaykay iti makapabileg a tulong tapno maisubli ti regta ti kabsat iti serbisio ti Pagarian.—1 Tes. 5:14.
6 Ditay mabalin nga inaganan amin dagiti bambanag nga inaramiden ken aramidento pay ni Jehova kadatayo. Ditayo mabalin a subadan [ni Jehova] kadagitoy a bendisionna. Iti kasta adda nabibileg a rason nga “amin nga adda angesna idaydayawda ni Jehova!”—Sal. 150:6.