Panangitiempo iti Panagmagasina a Trabaho
1 Inkeddeng ni Jehova nga addanto ‘talna, masanguanan, ken namnama’ kadagidiay a sumurot iti daldalanna. (Jer. 29:11) Dagiti pakaammuan maipapan iti daytoy a namnama ti naidatag iti naintiempuan a wagas idiay Ti Pagwanawanan ken Agriingkayo! Dagitoy a magasina ti makagunggona iti amin a kita dagiti tattao. (1 Tim. 2:4) Itiempoyo kadi agraman ti pamiliayo iti regular a panagiwaras ti magasina?
2 No bumabbaba ti maipaimayo a magasina, kasanoyo a mairemedio daytoy? Maysa a nasken a banag isut’ panangbiag ti panangipategyo iti linaon dagiti magasinatayo. Nagsurat ti maysa a tao: “Ti panangbasa kadagiti magasinayo ket maysa a pudno a naragsak a kapadasan. Saanda a parawpaw, a nalaad ti kalidadda a ‘mangliwliwa’ ngem naglaonda iti giya ken bagnos no kasano nga adda kaeskan ti panagbiag.” Ti Pagwanawanan ken Agriingkayo! ket bunga iti natanang a panagsukimat ken pangtaraon “ti matalek ken naannad nga adipen.” (Mat. 24:45) Nakurri a rimienta dagitoy a pangdanon iti puso dagiti tattao.
3 Masapul a kabisadoyo dagiti artikulo ti magasina nga itukonyo. Sarakenyo dagiti punto maipapan ti agdama a problema iti komunidadyo. Agsaganakayo a makisao kadagiti lallaki, babbai, ken agtutubo a masabetyo kadagiti ruangan ken lansangan. Ipakitayo no kasano a dagitoy a magasina ket maisinggalutda iti intero a pamilia.
4 Sipapanunotkayo Koma iti Magasina: Ti panangasaba babaen iti magasina ti mangukopar koma iti napateg a paset ti iskediolyo iti serbisio. Ania dagiti kasayaatan a tiempo kadakayo a mangitukon iti magasina? Pinadasyo kadin ti nagtrabaho iti maysa nga oras wenno napapaut no mumalem sakbay ti Panagadal iti Libro ti Kongregasion? Ti panangasaba iti sardam wenno rumabii isut’ nabunga unay ti dadduma a lugar. Naimbag nga aldaw ti Sabado nga agiwaras iti magasina, ngem mabalin met dagiti dadduma nga aldaw iti daytoy nga aktibidad. Masapul a ti panagbalaybalay ken panagtrabaho iti pagtagilakuan ket agbalin koma a regular a paset iti Aldaw ti Magasina.
5 Maadda koma iti tunggal maysa ti regular a pedido dagiti maiwaras a kopia ti kada ruar dagiti magasina. No addaankayo kadagiti daan a ruar, mausar dagitoy a pangipakita kadagiti bumalay iti nagduduma a suheto a linaon dagiti magasina. Sagpaminsan, dadduma kadagiti daan a kopia ti maibati met kadagiti balay a pagtaraknan ken ospital a maipalubos daytoy. Amin dagita a magasina ti maibilang a naipaima idiay binulan a pedaso ti Field Service Report.
6 Babaen ti panangalagad kadagiti singasing ditoy ngato, awan duadua a makitayo ti panagrang-ay iti bilang dagiti maiwaras a magasina. Dagiti nasingpet ti panagpuspusoda a tattao a matuokan iti biag ditoy agdama a sistema ti mangipateg iti makabang-ar a linaon dagiti Ti Pagwanawanan ken Agriingkayo! Idinto ta maimalditdan iti uppat a kolor a mangrugi ita a bulan, mangnayon daytoy iti gagar nga agbalin a naalibtak maipapan kadakuada. Gapuna, sipupuottayo koma iti magasina, ken paaduenyo ti maiwaras a magasina idiay teritoriayo.