Itukonyo Dagiti Magasin iti Kada Okasion
1 Addaantayo ti naimbag a rason a mangipateg iti Pagwanawanan ken Agriingkayo! Iti daytoy a bulan maaramat dagiti magasin iti panangasabatayo, ket anian a nagbileg nga impormasion ti linaon dagiti ruar iti Oktubre! Gapuna a sisasaganatayto koma a mangitukon kadakuada iti amin a maitutop nga okasion.
2 No itukon ti Oktubre 1 a “Pagwanawanan,” mabalinyo a tignayen ti interes iti artikulo a “Maysa a Lubong nga Awan ti Gubat—Kaano?” a kunaen:
◼ “Adu a tattao ti agduadua no apay a kasla saan a maragpat ti maysa a lubong nga awanan gubat. Ania ti makunayo maipapan kadagitoy a sasao iti panid 5 ti Oktubre 1 a Pagwanawanan? [Basaen ti umuna a balbalikas iti kada umuna a dua a parapo iti babaen ti subtema a “Ti Relihion—Maysa a Dakkel a Lapped,” ken iwayaan ti sungbat.] Siempre, saan a kayat a sawen daytoy a kanayonto nga adda gubgubat. Siputanyo ti kari ti Dios ditoy Isaias 9:6, 7.” Itukon dagiti magasin.
3 No ipresenta ti Oktubre 22 nga “Agriingkayo!” mabalinyo a kunaen:
◼ “Aniat’ makunayo maipapan ti saludsod iti akkub daytoy a magasin: ‘Apay a Nakaab-ababa ti Biag?’ [Palubosan a sumungbat.] Daytoy a serye dagiti artikulo iturongna ti panunottayo iti makuna dagiti moderno a sientista ken sabsabali pay maipapan iti panaglakay ken panagbaket, kalpasanna ipamaysana iti kari ti Namarsuatayo maipapan iti namnama iti agnanayon a biag.” Itukon dagiti magasin.
4 No makasarakkayo kadagiti tattao a relihioso, apay a dikay dakamaten ti maysa nga artikulo manipud Oktubre 15 a “Pagwanawanan”? Mabalin a mangtukay iti nasayaat a panangipangag daytoy a presentasion:
◼ “Kayatko nga alaen ti opinionyo iti daytoy a saludsod: Posible kadi a paggiddanen nga ayaten ken pagbutngan ti Dios?” Palubosan a sumungbat, kalpasanna basaen ti paulo a teksto ti artikulo nga “Apay nga Agbutengkayo iti Pudno a Dios Itan?” (Ecl. 12:13) Itukon ti magasin.
5 No agbalaybalaytayo, ditay koma labsan dagiti babassit a paglakuan. Dagidiay regular a sumarsarungkar kadagiti paglakuan kunada a makaparagsak daytoy ken nabunga. Mabalinyo nga ipadas ti simple a presentasion a kas iti daytoy no itukonyo ti Oktubre 8 nga “Agriingkayo!”:
◼ “Ammomi nga ipateg dagiti negosiante a maammuan dagiti agdama nga isyu a mangapektar iti komunidad. Masiguradok a daytoy nga artikulo ket makapainteres kadakayo.” Kalpasanna iranud iti apagbiit ti maysa a punto manipud iti artikulo nga “Dagiti Pamilia ti Agsolsolo a Nagannak—Kasanot’ Kaballigida?”
6 No ti tao a maasitganyo ket pudno a makumikom, mabalinyo nga ipakita dagiti magasin ken kunaen:
◼ “Ammok a saanyo a ninamnama nga adda bisitayo ita nga aldaw, isu nga apagbiitak laeng. Kayatkay nga ikkan iti oportunidad a mangbasa iti maysa a banag a napateg.” Ipakita iti artikulo a napiliyo, sa itukon dagiti magasin.
7 Mangidulinkay iti nasayaat a house-to-house record, ket sublianyo dagiti amin a naipaimaan. No makasarakkayo ti napasnek nga interes bayat ti panagsarungkar, itukonyo ti suskripsion iti maysa wenno iti dua a magasin. Nakasagana ken agalertotay koma a mangitukon kadagiti magasintayo iti kada maitutop nga okasion.