Naragsakan Amin iti Pannakairuar ti Baro a Libro idi Kombension Distrito
Baro a Libro a Mangitampok iti Pannakaammo ti Dios
1 Iti daydi kombension distritotayo idi Disiembre, anian a ragsaktayo iti intero a programa! Iti malem ti Sabado napnotay ti rag-o a nakangngeg iti anunsio maipapan ti baro a libro a, Pannakaammo a Mangiturong iti Biag nga Agnanayon, ken ti nainaig nga impormasion a naisaruno. Kasapulan dagiti binilion a tattao iti daga ti pannakaammo a ti Dios laeng ti makaited—ti pannakaammo iti Dios ken ti Anakna, ni Jesu-Kristo.—Prov. 2:1-6; Juan 17:3.
2 Anian a naglawag ti panangisalaysay ti managpalawag kadagiti benneg ti libro! Dagiti makaawis a paulo dagiti kapitulo, praktikal nga ilustrasion, positibo a pannakaiparang ti kinapudno, saan a narikut a salsaludsod, ken, iti ngudo ti kada kapitulo, maysa a kahon a napauluan ti “Subokenyo ti Pannakaammoyo” dagiti sumagmamano a paset a makaallukoy kadagiti amin a mangbasa iti dayta.
3 Iti pangserra a palpalawag iti Sabado ken Domingo, naparegtatayo a maaddaan iti panagadal ti pamilia nga usaren daytoy baro a libro. Agarup ita, nalabit a kabisadotayon dagiti linaonna. Awan duadua a napagsaritaanyo metten dagiti punto a masapul nga ikabil iti panunot no itukonyo daytoy baro a libro iti tay-ak.
4 Dagiti Punto a Repasuen: Mabalin a malagipyo nga idi naidatag ti tema a “No Apay a Kasapulan ti Sangatauan ti Pannakaammo ti Dios,” impaganetget ti managpalawag dagiti sumagmamano a punto, a pakairamanan dagiti sumaganad: (1) No usarenyo daytoy a libro a mangikondukta kadagiti panagadal, saan a nainsiriban ti mangiserrek kadagiti kanayonan a material, a mabalin a manglibeg kadagiti kangrunaan a punto; basta maipamaysa ti pannakaibuksil no ania ti paneknekan ti kada kapitulo daytoy a libro. (2) Kalalainganna ti kaatiddog dagiti kapitulo tapno gagangay a mawanas ti maysa iti tunggal panagadalyo. (3) Iti ngudo ti kada kapitulo, mangted iti ababa a repaso dagiti saludsod iti kahon a napauluan ti “Subokenyo ti Pannakaammoyo.”
5 Usarna Kadagiti Panagadal ti Biblia: Sumagmamano nga agibumbunannag ti nagsaludsod no maiparbeng a maibaliw dagiti panagadalda ti Biblia iti daytoy baro a libro. No nakaadayokayon iti libro a madama a maad-adal, praktikal unay no leppasen nga adalen dayta a publikasion. No saan a kasta ti kasasaad, mairekomenda a mayallatiwen iti libro a Pannakaammo. No inusaryo ti maysa a broshur wenno tract a pangirugi iti panagadal ti Biblia, iti maitutop a tiempo, mayam-ammon ti baro a libro ket usarenyon dayta iti panagadal ti Biblia iti pagtaengan. Adu pay nga impormasion iti usar daytoy libro a Pannakaammo ti agparangto iti Ministeriotayo iti Pagarian iti umay a bulbulan.
6 Impaay ni Jehova daytoy baro a libro a tumulong kadatayo a mangisuro iti sabsabali maipapan ti pannakaammo a mangiturong iti biag nga agnanayon. Ita kasapulan nga agsaganatay a naimbag ken naan-anay a makiraman iti trabaho a masapul pay a maileppas.