Tulongan ti Sabsabali a Gumun-od iti Pannakaammo a Mangiturong iti Biag
1 Inlawlawag ni apostol Pablo a ‘pagayatan ti Dios nga amin a kita dagiti tattao ket masapul a dumtengda ti umiso a pannakaammo iti kinapudno.’ (1 Tim. 2:4) Kasanotayo a matulongan ti sabsabali a mangawat iti dayta a pannakaammo? Ti maysa a wagas isut’ panangsarungkar kadagiti tattao a nangala ti libro a Pannakaammo a Mangiturong iti Biag nga Agnanayon. Kasanotayo a maparegta dagiti dadduma a makipagadal kadatayo iti dayta?
2 Kadagidiay nangipakita ti interes iti Biblia kas praktikal a giya, mabalinyo a sublian nga itukon ti panagadal, nalabit babaen ti panagkuna:
◼ “Iti daydi kaaddak ditoy, nagsaritaantayo no apay a mapagtalkantayo ti Biblia a kas praktikal a giya. Agsipud ta impaltiing ti Dios, ti Biblia ket maysa met a sigurado a gubuayan ti liwliwa ken namnama. [Basaen ti Roma 15:4.] Iti ngudo daydi naudi a panagsaritatayo, pinataudko ti saludsod a, Kasanotayo a personal a magunggonaan manipud iti pannakaammo a linaon ti Biblia?” Basaen ti parapo 18 iti panid 11 ti libro a Pannakaammo. Ibaga a mangidadaulo dagiti Saksi ni Jehova iti agarup lima a milion a panagadal ti Biblia iti sangalubongan. Itukon nga idemostrayo ti panagadal, nga usaren ti umuna a lima a parapo ti kapitulo 1.
3 No sarungkaranyo ti naganak a maseknan kadagiti problema ti pamilia, mabalinyo a sawen daytoy:
◼ “Ammok a kas naganak, kayatyo ti kasayaatan para kadagiti annakyo. Idinto ta imposible a masaluadan ida manipud ti kada banag a dakes, masapul a sanayenyo no kasanoda a sarangten dagiti problema ti biag. Kasano ti pagarupyo a panangaramid iti daytoy? [Palubosan a sumungbat.] Ditoy pinanid 145-6 iti libro a Pannakaammo, adda sumagmamano a nasayaat a balakad manipud ti Biblia.” Basaen dagiti dadduma a paset kadagitoy a pinanid, kalpasanna itukon ti panagsarungkar manen tapno idemostra no kasano a mausar ti libro a mangadal iti ad-adu pay maipapan no kasano a masagrap iti naragsak a biag ti pamilia.
4 No usarenyo ti direkta nga iyaasideg a mangirugi iti panagadal, mabalinyo a kunaen daytoy kas pasarunson iti daydi damo a panagsarita:
◼ “Inkagumaak manen ti bimmisita kadakayo agsipud ta kayatko a nayonan ti imbagak kadakayo maipapan iti libre a programami iti panagadal ti Biblia. Nakaibatiak idi kadakayo iti kopia daytoy a libro, Pannakaammo a Mangiturong iti Biag nga Agnanayon, nga isut’ us-usarenmi a katulongan ti panagadal. Kitaenyo no kasano a paregtaennatayo a mangusig iti Sao ti Dios. [Basaen ti parapo 23 iti panid 22.] Pangngaasiyo man ta alaenyo daydiay kopiayo a libro, ket mabalintay nga ituloy nga adalen manipud iti daydi nagpatinggaantayo idi napalabas nga iyaayko.” No saan a nairugi ti panagadal idi damo a napankayo, mabalinyo a kunaen: “Nalabit a nasayaat a tiempo daytoy nga idemostrak no kasanotayo nga adalen ti Biblia.” Iyurnos ti masinunuo a tiempo ti panagsubli a maipaay iti sumaruno a panagadal.
5 Ti panangusar iti libro a Pannakaammo tulongannatayo a mangirakurak iti umiso a pannakaammo a pakabendisionan ti sabsabali. (Prov. 15:7) Kadagidiay nalinteg ti panagpuspusoda, paregtaenna ida nga agbiag a maitunos iti kinalinteg ni Jehova, a mangiturong kamaudiananna iti biag nga agnanayon.