Ipasagepsepyo Kadagiti Sabsabali ti Namnama a Biag nga Agnanayon
1 Nupay ti tao agbirbirok kadagiti wagas a mangpabannayat iti panaglakay ken mangpaatiddog iti biagna, kaskasdi a di maliklikan ti panaglakay ken ipapatay. Anian a yamantayo ta ilawlawag ti Biblia no apay a lumakay ken matay ti tattao, ken no kasano a mapukawton dagiti dakes nga epekto ti panaglakay ken awanton ti ipapatay. Makaguyugoy unay ti pannakaidatag dagitoy a kinapudno iti libro a Pannakaammo a Mangiturong iti Biag nga Agnanayon. Nalawag ti panangsungbat dayta a libro kadagiti narikut a saludsod maipapan iti biag ken ipapatay, nga ipakitana iti managbasa nga addanto tiempo a maisubli ti Paraiso.
2 Iti Marso itukontayo ti libro a Pannakaammo a ti kalattayo ket mangirugi kadagiti panangyadal iti Biblia iti pagtaengan. (Mat. 28:19, 20) Kalpasanna sarungkarantayo amin nga aginteres iti mensahe ti Pagarian. Iti kastoy a wagas maipasagepseptayo kadagiti sabsabali ti namnama a biag nga agnanayon. (Tito 1:2) Tapno maaramidanyo daytoy, mabalin a makatulong kadakayo dagiti sumaganad a singasing.
3 Iti damo nga ibibisitayo, mabalinyo nga isaludsod daytoy:
◼ “Pinampanunotyo kadin no apay a tarigagayan dagiti tattao ti at-atiddog a biag? [Palubosanyo a sumungbat.] Dagiti Budista, Kristiano, Hindu, Muslim, ken dadduma pay namnamaenda amin nga adda biag kalpasan ti ipapatay.” Ukradenyo ti libro a Pannakaammo iti kapitulo 6 nga, “Apay a Lumakay ken Mataytayo?,” sa basaenyo ti parapo 3. Ilawlawagyo dagiti naisitar a kasuratan. Iti panangdakamatyo kadagiti dua a saludsod iti ngudo ti parapo, isaludsodyo iti bumalay no kayatna nga ammuen a mismo dagiti sungbat. No tarigagayanna dayta, itultuloyyo a pagsaritaan ti sumagmamano pay a parapo. Nairugin ti panagadal! Ngem no dina kayat, ibatiyo ti libro tapno mabasana, sa iplanoyo ti agsubli, a no mabalbalin kalpasan ti maysa wenno dua nga aldaw, tapno pagsaritaanyo dagiti sungbat.
4 No surnadanyo ti napaimaan iti libro a “Pannakaammo,” mabalinyo a kunaen:
◼ “Nagsubliak tapno pagsaritaanta daydi dua a saludsod a saanta a nasungbatan maipapan iti ipapatay.” Ipalagipyo dagiti saludsod iti bumalay. Kalpasanna pagsaritaanyo ti impormasion iti kapitulo 6 iti sidong ti subtitulo a “Maysa a Sinasairo a Wayat.” Depende iti kasasaad, mabalin nga ituloyyo ti agadal wenno usarenyo ti maudi a saludsod iti ngudo ti parapo 7 tapno maisaadyo ti pundasion iti sumaganad nga isasarungkar. Mangaramid kadagiti masnup a plano iti panagsubli. Ikkanyo ti bumalay iti handbill, sa ilawlawag iti apagbiit no kasano a maangay dagiti gimong ti kongregasion. Sibabara nga awisenyo a tumabuno.
5 Iti man panagbalaybalay wenno di pormal a panangasaba, mabalinyo nga irugi ti saritaan a kunaenyo:
◼ “Pinampanunotyo kadin no aniat’ masanguanan nga agur-uray kadatayo ken iti daga? [Palubosanyo a sumungbat.] Gupgopen ti Biblia ti masanguanan iti maysa a sao—Paraiso! Ilawlawagna nga idi punganay, adda paset ti daga a pinagbalin ti Dios a nagpintas a paraiso a nangikabilanna iti pagassawaan a pinarsuana. Masapul a tagitauanda ti intero a daga, nga in-inutenda a pagbalinen a paraiso. Imutektekanyo daytoy a mangiladawan iti daydiay a paraiso.” Ukradenyo ti libro a Pannakaammo iti panid 8, sa basaenyo ti parapo 9, iti sidong ti subtitulo a “Biag iti Paraiso.” Kalpasanna pagsaritaanyo dagiti punto iti parapo 10, sa basaenyo ti naisitar a kasuratan, ti Isaias 55:10, 11. Ibagayo nga ituloyyonto a pagsaritaan ti maipapan iti kasasaad ti biag iti naisubli a Paraiso ken saklawenyonto ti parapo 11-16. Wenno paregtaenyo a basaenna a mismo dayta, sa iyurnosyo ti panagsubliyo ket pagsaritaanyo dayta.
6 No saanyo a nayadalan iti damo nga ibibisita, mabalinyo nga aramiden dayta iti isasarungkar a kunaenyo:
◼ “Kas napagsaritaanta iti napalabas, panggep ti Dios nga agbalin a paraiso ti intero a daga. Dayta ibangonna ti saludsod nga, Anianto ti kasasaad iti Paraiso?” Ukradenyo ti libro a Pannakaammo iti kapitulo 1, sa adalenyo ti parapo 11-16, iti sidong ti subtitulo a “Ti Biag iti Naisubli a Paraiso.” Kalpasanna ipakitayo ti ilustrasion iti panid 4-5, sa isaludsodyo no kayatna ti agnaed iti kasta ti kapintasna nga aglawlaw. Kalpasanna basaenyo ti umuna a sasao iti parapo 17 ti panid 10. Depende iti kasasaad, mabalin nga ituloyyo ti agadal wenno ibagayo nga iti sumaruno nga ibibisita ilawlawagyo no ania ti kasapulan tapno makapagnaed ti maysa a tao iti naisubli a Paraiso. Mangibatikayo iti handbill, ilawlawag ti eskediul ti gimong, ken sibabara nga awisenyo a tumabuno idiay Kingdom Hall.
7 Ti libro a Pannakaammo ket nagsayaat nga alikamen a pangipalgak kadagiti sabsabali ti maipapan “iti agnanayon a biag” nga inkari ti Dios. Babaen ti panangyadalyo iti Biblia kadagiti tattao, maipasagepsep kadakuada daytoy a nadayag a namnama nga impaltiing ti Dios “a dina mabalin ti agulbod.”