Agbalinkayo a Pagulidanan iti Panagsao ken iti Kakabalin
1 Pinaregta ni apostol Pablo ni Timoteo nga agbalin a pagulidanan iti panagsao ken iti kababalin. (1 Tim. 4:12) Masapul met nga ipakitatayo ti mapagulidanan a panagsao ken kababalin, nangruna no makiramantayo iti ministerio, ta mabalin a dayta ti mangikeddeng no madanontayo wenno saan ti puso dagidiay makasaritatayo.
2 Masapul nga ipakitatayo ti amin nga aspeto ti naimbag a kababalin, agraman panagraem, konsiderasion, kinaanus, ken kinataktika. Mayarig ti naimbag nga aw-awid iti ministerio kadagiti rekado ti taraontayo. No awan dagitoy, mabalin a natamnay ken saan a makaawis ti naimas a taraon. Kasta met laeng ti epekto ti di panangipakita iti naimbag a kababalin.—Col. 4:6.
3 Agbalinkayo a Pagulidanan iti Panagsao: Napateg ti nainggayyeman nga isem ken nabara a kablaaw no iparangtayo ti naimbag a damag. No nabara ken napasnek ti introduksiontayo, mailasin ti bumalay a pudno a maseknantayo kenkuana. No agsao, dumngegkayo a naimbag ken raemenyo ti kapanunotanna. Nataktika ken makaay-ayo koma ti panagsaoyo.—Idiligyo ti Aramid 6:8.
4 No dadduma makasaraktayo iti tao a naalipunget, mannakiringgor pay ketdi. Kasanotay nga agtignay? Indagadag ni Pedro nga agsaotayo a “buyogen ti naalumamay a karirikna ken nauneg a panagraem.” (1 Ped. 3:15; Rom. 12:17, 18) Kinuna ni Jesus a no di awaten ti bumalay ti mensahe ti Pagarian, ‘pampagen[tay laeng koma] ti tapok kadagiti sakatayo.’ (Mat. 10:14) Ti mapagwadan a kababalintayo iti kakasta a kasasaad mabalin a paluknengenna ti puso ti bumusbusor inton agangay.
5 Agbalinkayo a Pagulidanan iti Kababalin: Iti panangikasaba iti naimbag a damag kadagiti lansangan nga adu ti tao ken kadagiti publiko a lugar, masapul a mannakaawattayo, saan a nalaaw wenno manangipapilit, ken ditay serraan ti pagpagnaan dagiti tao. No addatayo iti pagtaengan dagiti interesado a tattao, makaay-ayo koma ti kababalintayo kas sangaili. No adda ubbing a kakuyogtayo, masapul nga ipakitada ti panagraem iti bumalay ken iti sanikuana ken rumbeng nga agimdengda no makisasaotayo. No nagulo dagiti ubbing, mangibati daytoy iti naalas nga impresion.—Prov. 29:15.
6 Ti personal a langatayo ipakitana koma kadagiti sabsabali a ministrotayo iti Sao ti Dios. Saan koma a narugit wenno ti la adda a panagkawkawes ken panaglanglangatayo, wenno naranga ken aglablabes. Ti langatayo kanayon koma a “maikari iti naimbag a damag.” (Idiligyo ti Filipos 1:27.) No aramidentay daytoy, saantayo a makaited iti pakaitibkolan dagiti sabsabali wenno pakababalawan ti ministeriotayo. (2 Cor. 6:3, 4) Ti mapagulidanan a panagsao ken kababalintayo ad-adda a papintasenna ti mensahe ti Pagarian, a pakaidayawan ni Jehova.—1 Ped. 2:12.