Sigaganat a Panangiparang iti Naimbag a Damag
1 Maipakitatayo ti nauneg a panangipateg kadagiti kari ti Pagarian ti Dios babaen ti naimpusuan a pannakiraman iti Nakristianuan a ministerio. Nasken a sigaganat a makiramantayo iti daytoy a trabaho. Apay? Agsipud ta manmano ti trabahador, umad-adanin ti panagpatingga daytoy dakes a sistema ti bambanag, ken agpegpeggad ti biag dagidiay adda iti teritoriatayo. (Ezeq. 3:19; Mat. 9:37, 38) Kasanotay a maipakita ti kinaganat iti trabahotayo iti tay-ak? Babaen ti panangisagana a nasakbay kadagiti nasayaat a presentasion, babaen ti panangbirok kadagiti tao iti sadinoman a pakasarakan kadakuada, babaen ti panangirekord kadagiti amin a mangipakita iti interes ken panagsubli a dagus tapno surnadan dayta nga interes. Mabalin a makatulong dagiti sumaganad a singasing bayat a sigaganat nga iparangtayo ti naimbag a damag iti Pebrero. Ti libro a Creation ti maitukon.
2 Mabalin a makairugikayo iti saritaan babaen ti apagbiit a panangdakamat iti sumagmamano a parikut ti komunidad, ket kalpasanna mabalinyo a kunaen:
◼ “Adu a tattao ti mamati nga adda Dios, ngem pampanunotenda: ‘Ania a masakbayan ti kayatna para kadatayo?’ Kasanoyo a sungbatan dayta? [Palubosanyo a sumungbat.] Ammoyo kadi nga ilawlawag ti Biblia no ania ti pagayatan ti Dios para iti sangatauan ken no kasanona nga ibanag dayta?” Ukagenyo ti libro a Creation iti panid 239. Basaenyo ti Apocalipsis 21:4 iti parapo 13. Ipakitayo dagiti ladawan iti panid 237 agingga iti 239 a mangyilustrar iti kaipapanan daytoy iti masakbayantayo. Itukonyo ti libro. Iyurnosyo ti kombeniente a tiempo a panagsubliyo tapno maituloy ti saritaan.
3 Mabalinyo a surnadan ti napalabas a saritaan iti Apocalipsis 21:4 babaen iti daytoy ababa a presentasion:
◼ “Iti napalabas nga isasarungkarko, nagsaritaantayo ti maipapan iti kari ti Dios a mangisagana iti baro a kagimongan ditoy daga para iti sangatauan. [Iturongyo manen ti atension iti ladawan iti panid 237 ti libro a Creation.] Kayatyo kadi a makita ti pamiliayo a mangsagrap iti kasta a naragsak a kasasaad? [Palubosanyo a sumungbat.] Ti saludsod, Mapangnamnamaan kadi dagiti kari ti Dios? Pangngaasiyo ta imutektekanyo no ania ti kunana a mismo.” Basaenyo ti Apocalipsis 21:5, 6a. Basaenyo dagiti saludsod iti parapo 13 ken 14 iti panid 239, ken basaenyo ti sungbat. Itukonyo ti libre a panagadal iti Biblia. Ibagayo a baliwanyonto ti umay tapno idemostrayo dayta.
4 Tangay adu ti maseknan iti umad-adu a parikut ti sangatauan, mabalinyo a kunaen daytoy iti damo nga ipapanyo:
◼ “Maseknan dagiti amin a nakasaritak kadagiti parikut iti komunidadtayo. [Mangdakamatkayo iti sumagmamano.] No manon a dekada nga inkarkari dagiti politiko a risuten dagitoy, ket pinadas dagiti dadduma dayta. Ania ti pagarupyo a makagapu iti agtultuloy nga ikakaro ti kasasaad? [Palubosanyo a sumungbat.] Ilawlawag ti Biblia a ti makagapu iti daytoy, agbibiagtayon iti panungpalan ti sistema ti bambanag.” Basaenyo ti Mateo 24:3 iti panid 223, parapo 20 ti libro a Creation, sayo basaen dagiti subtitulo iti parapo 22-27 iti panid 224 ken 225 ken saludsodanyo ti bumalay no umanamong a mapaspasamaken dagitoy. Itukonyo ti libro ken iyurnos ti panagsubliyo tapno pagsaritaan no kasano a risuten ti Dios dagiti parikut ti sangatauan.
5 No inkariyo nga agsublikayo tapno ilawlawag ti solusion ti Dios kadagiti agdama a parikut, mabalinyo a padasen daytoy a pamay-an:
◼ “Inkagumaak ti agsubli tapno maituloytayo a pagsaritaan ti napaypayso a solusion dagiti parikut ti sangatauan. Iti napalabas nga isasarungkarko, nakitatayo a sigun iti Biblia, agbibiagtayo iti panawen ti panungpalan ti sistema ti bambanag. Ania ti kaipapanan daytoy kadatayo? Kaipapananna a din agbayag gibusanto ti Dios daytoy intero a dakes a sistema ket suktanna iti baro.” Basaen ken ilawlawagyo ti Apocalipsis 21:1, 4. Usarenyo ti ladawan iti panid 4-5 ti libro a Pannakaammo a mangipakita no anianto dagiti kasasaad iti baro a sistema. Itukonyo ti panagadal iti Biblia ket ikagumaanyo nga irugi a dagus.
6 Tangay nakaad-adu a tao ti maseknan iti aglawlaw, mabalinyo a kunaen daytoy a pangiruangan iti saritaan:
◼ “Napaliiwmi a gistay amin ket maseknan iti pannakarugit ti angin, danum, ken dagiti kankanentayo. Iti dadduma a pagilian, pagpegpeggadenen ti kasasaad ti aglawlaw ti biag dagiti tao. Tangay ti Dios ti Namarsua iti daga, iti panagkunayo anianto ngata ti aramidenna maipanggep iti daytoy? [Palubosanyo a sumungbat.] Kuna ti Biblia nga isingirto ti Dios ti wagas a pannakausar ti daga. [Basaenyo ti Apocalipsis 11:18b.] Panunotenyo ti panagbiag iti daga nga awan a pulos ti polusion!” Dakamatenyo ti kari ti Dios maipapan iti paraiso, kas ipakita ti Apocalipsis 21:3, 4. Ipakitayo ti ladawan iti panid 237 iti libro a Creation. Itukonyo ti libro sayo iyurnos ti panagsubliyo.
7 No sublianyo ti tao nga interesado iti Paraiso a daga, mabalinyo a kunaen:
◼ “Iti napalabas nga isasarungkarko, nagnumuantayo a tapno marisut ti parikut maipapan iti pannakarugit ti daga, masapul a makibiang ti Dios kadagiti aramid ti tao. Ngem ti saludsod, Ania ti masapul nga aramidentayo tapno makalasat nga agturong iti nalinteg a baro a lubong nga aramiden ti Dios?” Basaenyo ti Juan 17:3. Awisenyo ti bumalay a manggundaway iti libre a panagadal iti Biblia nga ituktukontayo tapno magun-odna daytoy naisangsangayan a pannakaammo.
8 Anian a pribilehio ti pannakaaramattayo kas moderno-aldaw a managani ken makiraman iti makaispal-biag a trabaho a panangasaba! Sapay koma ta kanayon a naagawatay amin a mangiparang a sigaganat iti naimbag a damag, ‘nga ammotayo a ti panagbannogtayo saan nga ubbaw.’—1 Cor. 15:58.