Ikasabayo ti Naimbag a Damag iti Uray Sadinoman
1 Inkasaba dagiti nagkauna a Kristiano ti naimbag a damag iti uray sadinoman. Kasta unay a regtada nga iti las-ud ti 30 a tawen manipud panagungar ni Jesu-Kristo, ‘naikaskasaban [ti mensahe ti Pagarian] kadagiti isuamin a parsua nga adda iti baba ti langit.’—Col. 1:23.
2 Kasta met laeng ti ranta dagiti naregta nga adipen ni Jehova kadagitoy nga aldaw—idanon ti naimbag a damag ti Pagarian iti amin a tao aginggat’ mabalin. Ania ti makatulong kadatayo a mangibanag iti daytoy a kalat? Umad-adu dagiti tattao nga agtartrabaho iti agmalem ket masansan nga awanda iti pagtaenganda no sumarungkartayo. No awanda iti trabaho, agbibiahe, aggatgatang, wenno agal-aliwaksayda. Kasano a maidanon ti mensahe ti Pagarian kadagidiay maikari kadakuada?—Mat. 10:11.
3 Masarakan dagiti dadduma iti panggedanda. Uray kadagiti babassit nga ili, adda dagiti lugar ti negosio a kaaduan a yan dagiti tao iti agmalem. Kadagiti dadakkel a siudad, dagiti tattao nga agtartrabaho kadagiti industrial a parke wenno kadagiti nangangato a pasdek a pagopisinaan ken dagidiay agnanaed kadagiti nangato ken naguardiaan nga apartment ket makaskasabaan—nga adu kadakuada iti umuna a gundaway. Kadagiti ngudo ti lawas, madadaan dagiti dadduma a dumngeg iti naimbag a damag bayat nga agal-aliwaksayda kadagiti parke, pagpalpaliwaan, wenno bayat nga agur-urayda kadagiti paradaan wenno kadagiti shopping mall.
4 Umad-adu dagiti agibumbunannag a mangar-aramid iti naisangsangayan a panagregget a mangasaba kadagiti publiko a lugar, iti sadinoman a pakasarakan kadagiti tao. Idi damo, bumdeng ken medio agnerbios dagitoy a Saksi gapu ta nairuamda iti panangasaba kadagiti balbalay. Kasano ti panagriknada itan?
5 “Pinarayrayna ti ministeriok!” kuna ti maysa nga aduan kapadasan a kabsat. Kuna met ti sabali: “Natulongannak a mangipamaysa.” Kuna ti maysa a nataengan a payunir: “Makapakaradkad iti mental, pisikal, ken iti naespirituan, . . . ken rumangrang-ayak pay!” Kuna ti maysa nga agibumbunannag nga adu dagiti tao a makasarsaritana a pulos a di pay nakasarsarita idi dagiti Saksi ni Jehova. Sireregta met a makiramraman dagiti agtutubo iti daytoy a trabaho. Kastoy ti kuna ti maysa nga agtutubo: “Makaparagsak ta nakaad-adu a tao ti makasaom!” Kuna pay ti sabali: “Ad-adu ita ti literatura a maipapaimak!” Mapaspasamak amin dagitoy iti teritoria a masansan a matrabaho!
6 Mangidadaulo Dagiti Agdaldaliasat a Manangaywan: Yantangay ‘agbaliwbaliw ti buya daytoy a lubong,’ insingasing ti Sosiedad iti di pay nabayag a baliwbaliwan dagiti agdaldaliasat a manangaywan ti eskediulda iti panangasaba iti tay-ak kada lawas tapno ad-adu koma pay a tattao ti madanon ti naimbag a damag. (1 Cor. 7:31) Iti adu a tawenen, makiraman dagiti manangaywan iti sirkito iti trabaho a panagbalaybalay iti agsapa iti lawlawasna, ket agsarungkar ken mangikonduktada kadagiti panagadal iti Biblia iti pagtaengan iti malem. Iti dadduma a lugar, mabalin a praktikal pay laeng dayta nga eskediul. Iti dadduma, mabalin a bassit ti magapuanan iti panagbalaybalay iti agsapa iti lawlawasna. Kadagita a kasasaad, mabalin nga ikeddeng ti agdaldaliasat a manangaywan a nasayaat ti mangasaba kadagiti paglakuan wenno lansangan bayat a nasapa pay. Wenno mabalinna nga iyurnos ti panangasaba dagiti babassit a grupo kadagiti nangangato a pasdek a pagopisinaan, paggatangan, paradaan, wenno dadduma pay a publiko a lugar. Babaen ti mas epektibo a panangusar iti tiempo a mangasaba, ad-adu a tao ti madanon.
7 Ipakita dagiti report a nasayaat unay ti panangawat agpadpada dagiti agdaldaliasat a manangaywan ken dagiti agibumbunannag iti daytoy a panagbalbaliw. Adu dagiti panglakayen a nagkiddaw iti manangaywan iti sirkito a mangsanay iti sumagmamano nga agibumbunannag kadagiti paset ti trabaho nga agkasapulan iti atension. Nagunggonaan dagitoy nga agibumbunannag iti pannakikuyogda iti agdaldaliasat a manangaywan a makiraman iti maysa kadagitoy nga aktibidad. Iti kasta, nabaelanda met a sanayen dagiti dadduma. (2 Tim. 2:2) Kas resultana, ad-adu a tao ti madandanonen ti naimbag a damag.
8 Siempre, saan a kasapulan nga urayenyo ti ibibisita ti manangaywan iti sirkito tapno ipadas ti dadduma kadagitoy a sabali a pamay-an ti panangasaba. Adtoy ti nagduduma nga ideya a mabalin a praktikal iti teritoriayo:
9 Panangasaba iti Lansangan: ‘Napanan dagiti amin a tattao?’ makunatayo no dadduma no saantay a madanon dagiti tattao iti pagtaenganda iti agsapa iti lawlawasna. Mabalin a napan naggatang dagiti dadduma. Pinadasyo kadin a danonen ida babaen ti panangasaba iti lansangan? No umiso ti pannakaaramidna, mabalin a nabunga unay daytoy a benneg ti ministerio. Imbes nga agtakderkayo iti maysa a lugar a nakaiggem kadagiti magasin, nasaysayaat no asitganyo dagiti tattao ken nainggayyeman a makisaokayo. Saan a kasapulan a kasabaanyo dagiti amin nga aglabas. Makisaokayo kadagidiay saan nga agap-apura, kas kadagidiay kumitkita kadagiti tawa ti paglakuan, dagidiay adda kadagiti nakaparada a lugan, wenno dagiti tattao nga agur-uray iti lugan. Umuna, mabalin a nainggayyeman a kumablaawkayo laeng ket urayenyo ti sungbat. No mayat a makisao daydiay tao, imtuodenyo no ania ti makunana maipapan iti banag nga ipagarupyo a paginteresanna.
10 Idi bimmisita iti maysa a kongregasion, inawis ti agdaldaliasat a manangaywan ti innem nga agibumbunannag a kumuyog kenkuana ken iti asawana a mangasaba iti lansangan. Ania ti resultana? “Nasayaat ti nagapuananmi iti agsapa!” impadamagna. “Awan a pulos ti not-at-home. Walo pulo a magasin ken adu a tract ti naipaima. Adu ti naragsakan a nakisao kadakami. Kinuna ti maysa kadagiti agibumbunannag, a damona ti nangasaba iti lansangan: ‘Adu a tawenen nga addaak iti kinapudno ngem diak nabigbig ti maliwliwayak!’ Iti ngudo ti lawas, naibus ti nakaad-adu a suplay a magasin ti kongregasion.”
11 Bayat nga agserserbi iti sumaruno a kongregasion, naammuan ti isu met laeng nga agdaldaliasat a manangaywan nga adu kadagiti agibumbunannag ti nasapa a nangasaba iti lansangan ngem saan unay a nabunga. Dua laeng a tao ti nakasao ti maysa a kabsat kabayatan ti panangasabada, ta agdardaras amin a masabatna a mapan iti trabaho. Insingasing ti agdaldaliasat a manangaywan nga agsublida amin iti dayta met laeng a lansangan a naladladaw bassit iti agsapa. Kasta ti inaramidda, ket nagtalinaedda agingga iti agmatuon. Idi nagsubli, ad-adu ti nakasao daydiay kabsat a dua laeng ti nakasaona iti agsapa unay. Nakaipaima iti 31 a magasin ken 15 a broshur, naalana dagiti nagan ken direksion ti pito a tattao, ken nakairugi iti dua a panagadal iti Biblia iti pagtaengan! Makaparegta met ti nagapuanan dagiti dadduma iti grupo.
12 No makasarakkayo iti interesado, ikagumaanyo nga alaen ti nagan, direksion, ken numero ti teleponona. Imbes a kiddawenyo a dagus daytoy nga impormasion, mabalinyo a kunaen: “Maragsakanak iti daytoy a panagsaritata. Adda kadi pamay-an a maituloyta daytoy iti sabali a tiempo?” Wenno isaludsodyo: “Adda kadi pamay-an a madanonka idiay balayyo?” Adu kadagiti masarakan iti kastoy a wagas ti umanamong a masarungkaran. Siguraduenyo nga addaankayo iti umdas nga abasto a polieto para iti asinoman a mayat a tumabuno kadagiti gimongtayo.
13 No ti interesado a tao a makasaoyo ket agnanaed iti teritoria a naituding iti sabali a kongregasion, pakaammuanyo dagiti kakabsat sadiay tapno masurnadanda ti interes. Ti kadi panangasaba iti lansangan ket epektibo a wagas ti panangirakurak iti naimbag a damag iti lugaryo? No kasta, repasuenyo ti artikulo a “Panangsarak Kadagiti Interesado Babaen ti Epektibo a Panangasaba iti Lansangan” iti Hulio 1994 a ruar Ti Ministeriotayo iti Pagarian. Sa iyurnosyo ti makiraman iti panangasaba iti lansangan iti tumutop a tiempo iti aldaw tapno ad-adu a tao ti madanonyo.
14 Panangasaba iti Transportasion Publiko: Iti maysa nga agsapa inkeddeng ti sumagmamano a payunir a kasabaan dagiti tattao nga agur-uray iti lugan iti asideg ti lokal a kolehio. Nupay naaddaanda iti sumagmamano a nasayaat a saritaan, adda problema. No kaano a nasayaat ti diskusion, isu met ti isasangpet ti bus, a mangputed iti saritaan. Nasolbar dagiti payunir ti problema babaen ti panagluganda iti bus ket ituloyda ti mangasaba kadagiti pasahero bayat nga agbibiaheda. Iti pagpatinggaan ti biahe, aglugan dagiti payunir iti bus, sada ituloy ti mangasaba kabayatan ti biahe nga agsubli. Kalpasan ti sumagmamano a biahe nga agpapan ken agawid, ginupgopda ti resulta ti reggetda: Nakaipaimada iti nasurok a 200 a magasin ken nakairugida iti innem a panagadal iti Biblia! Madadaan ti dadduma kadagiti pasahero a nangted iti direksion ken numero ti teleponoda tapno masarungkaranda idiay balayda. Iti sumuno a lawas, nagsubli dagiti payunir iti pagsardengan ti bus ket kasdi met laeng ti inaramidda. Nakaipaimada iti 164 a magasin ken nakairugida iti maysa pay a panagadal iti Biblia! Iti maysa a pagsardengan, adda pasahero a limmugan iti bus ket nagtugaw iti kakaisuna a natda a pagtugawan—iti abay ti payunir. Kimmita iti kabsat ket nakaisem a kinunana: “Ammok, adda Pagwanawanan nga itedmo kaniak!”
15 Adu nga agibumbunannag ti makaipapaay iti epektibo a pammaneknek bayat nga agbibiaheda iti bus, tren, wenno eroplano. Kasanoyo a mairugi ti saritaan iti pasahero a katugawyo? Rinugian ti maysa nga agibumbunannag nga agtawen iti 12 ti agbasa iti Agriingkayo! iti bus, bareng no maawis ti interes ti balasitang a katugawna. Nagkurri! Sinaludsod ti balasitang no ania ti basbasaenna, ket insungbat ti agtutubo a basbasaenna ti maipapan iti solusion dagiti problema a pakaipasanguan dagiti agtutubo. Innayonna a dakkel ti nagunggonana iti artikulo ket mabalin a makatulong met dayta kenkuana. Siraragsak nga inawatna dagiti magasin. Naallingag ti dua pay nga agtutubo ti saritaanda ket nagkiddawda met kadagiti magasin. Iti kasta, nagpaigid ti drayber ti bus iti kalsada ket sinaludsodna no apay a paginteresanda unay dagitoy a magasin. Idi naammuanna, nangala met kadagiti kopiana. Siempre, saan koma a napasamak daytoy no awan umdas a magasin ti agtutubo nga agibumbunannag nga iranud iti amin a nangipakita iti interes!
16 Panangasaba Kadagiti Parke ken Paradaan: No ipalubos ti panniempo, nasayaat a wagas ti panangdanon kadagiti tao ti panangasaba kadagiti parke ken paradaan. Pinadasyo kadin ti nangasaba kadagiti paradaan ti maysa a shopping center? No addakayo iti paradaan, kitaenyo iti apagbiit ti aglawlawyo. Kumitakayo kadagidiay saan nga agap-apura wenno dagidiay agur-uray iti nakaparada a lugan ket padasenyo a rugian ti nainggayyeman a saritaan. No agtultuloy ti saritaan, iserrekyo ti mensahe ti Pagarian. Padasenyo ti agsina iti kaduayo nga agibumbunannag ngem dikay unay aginnaddayo. Dikay mangawit iti dakkel, napadiwakal a bag wenno iti aniaman a mangipadlaw iti trabahoyo. Naannadkayo koma. Mabalin a kasayaatan no mabiitkay laeng iti maysa a paradaan ket kalpasanna umakarkayo iti sabali. No adda agkedked a makisao kadakayo, sidadayaw a panawanyo ket kumitakayo iti sabali a maasitganyo. Iti panangusarna kadagitoy a wagas, nakaipaima ti maysa a kabsat iti 90 a magasin iti makabulan a panangasabana kadagiti paradaan!
17 Dagiti dadduma a tattao mapanda iti parke tapno agaliwaksay; dagiti dadduma mapanda sadiay tapno agay-ayam wenno mangipasiar kadagiti annakda. Saanyo a singaen dagiti aktibidadda, no di ket mangasabakayo no adda gundaway. Kinasao ti maysa a kabsat ti agay-aywan iti parke ket natakuatanna a maseknan daytoy maipapan iti droga ken iti masakbayan dagiti annakna. Nairugi ti panagadal iti Biblia ket regular a maar-aramid iti parke!
18 Impormal a Panangasaba Kadagiti Shopping Mall: Nupay saan a kanayon a posible ti mangasaba a pormal iti tunggal tiendaan kadagiti shopping mall gapu kadagiti lokal a panangipawil iti kakasta nga aktibidad, makapatanor dagiti dadduma nga agibumbunannag kadagiti gundaway a mangasaba a di pormal. Agtugawda kadagiti pagtugawan ket nainggayyeman a kasaritada dagiti sabsabali a sumardeng tapno aginana. No maipakita ti interes, siaannad a mangitukonda iti tract wenno magasin ken ikagumaanda nga iyurnos ti panagsarungkar. Kalpasan ti sumagmamano a minuto a panangasabada iti maysa a benneg ti mall, mapanda iti sabali ket makisaoda kadagiti dadduma. Siempre, nasken ti panagannad tapno saan a nakadidillaw ti panangasabayo a di pormal iti kastoy a wagas.
19 No kablaawanyo ti maysa a tao, rugianyo ti saritaan iti nainggayyeman a timek. No mangipangag ti kasaoyo, saludsodanyo, ket dumngegkayo a naimbag iti ibagana. Interesadokay koma iti sasawenna. Ipakitayo a raemenyo ti kapanunotanna. No mabalbalin, anamonganyo.
20 Naaddaan ti maysa a kabsat iti naragsak a pannakisarita iti maysa a baket babaen ti panangdakamatna iti kinangina dagiti gagatangen. Immanamong a dagus ti baket, ket nangiturong daytoy iti nabiag a saritaan. Naala ti kabsat ti nagan ken direksion ti baket, ket sinarungkaranna iti dayta met laeng a lawas.
21 Panangasaba Kadagiti Tiendaan: Addaan dagiti dadduma a kongregasion iti teritoria a sentro ti komersio. Mabalin a mangisagana ti kabsat a mangas-asikaso iti teritoria kadagiti espesial a map card kadagitoy a lugar a sentro ti komersio. Kadagiti map card ti aniaman a teritoria a pagnanaedan dagiti tao, silalawag koma a maipakita a maisina a matrabaho dagiti lugar ti negosio a masakupan ti teritoria. Iti dadduma a teritoria, mabalin a paggiddanen a trabahuen dagiti lugar ti negosio ken dagiti residensia. Mabalin nga awisen dagiti panglakayen dagiti kualipikado nga agibumbunannag a regular a mangtrabaho kadagiti lugar ti negosio tapno saan a maliwayan ti panangasaba kadagiti tiendaan.
22 No maawiskayo a makiraman iti daytoy a trabaho ngem saanyo pay a napadasan idi, ti nasayaat a wagas a ‘makaurnong iti tured’ isu ti panagtrabaho nga umuna kadagiti babbabassit a tiendaan; kalpasanna, no nataltalgeden ti riknayo, mapankayo kadagiti daddadakkel. (1 Tes. 2:2) No mangasabakayo kadagiti tiendaan, agkaweskayo a kas iti panagkawesyo no tumabunokayo kadagiti gimong iti Kingdom Hall. No mabalin, sumrekkayo iti tiendaan no awan ti aggatgatang nga agur-uray a maserbian. Kiddawenyo a kayatyo ti makisao iti makinkukua wenno iti mangimatmaton. Narayraykayo koma, ken kangrunaan iti amin, apagbiitkayo laeng. Saan a kasapulan nga agpadispensarkayo. Adu a negosiante ti nairuam kadagiti aggatgatang ket namnamaenda dagiti pakasingaan.
23 Kalpasan a makablaawanyo ti agbambantay iti tiendaan, mabalinyo nga ibaga daytoy: “Manmano a madanonmi dagiti negosiante iti pagtaenganda ta adu unay ti pakakumikomanda, isu nga immaykami ditoy tiendaanyo tapno mangibati iti makatukay-panunot nga artikulo a basaenyo.” Sa agkomentokayo iti maysa wenno dua maipapan iti agdama a magasin.
24 Wenno mabalinyo a padasen daytoy no umasidegkayo iti manedyer: “Napaliiwmi a kayat dagiti negosiante ti mapakaammuan a naimbag. Naglaon ti kaudian a ruar Ti Pagwanawanan (wenno Agriingkayo!) iti artikulo a personal a mangapektar kadatayo amin.” Ilawlawagyo no ania dayta, ken ingudoyo babaen ti panangikuna iti: “Siguradomi a pagragsakanyo a basaen dayta.”
25 No adda dagiti empleado, ken agparang a maitutop, mabalinyo nga inayon: “Di la mabalin ti makisarita iti apagbiit kadagiti empleadoyo?” No palubosandakayo, laglagipenyo nga inkariyo nga apagbiitkay laeng, ket namnamaen ti manedyer a tungpalenyo ti saoyo. No adda dagiti empleado a kayatda ti atiddog a diskusion, kasayaatan no sarungkaranyo ida idiay balayda.
26 Iti di pay nabayag, kinadua ti sumagmamano nga agibumbunannag iti maysa a bassit nga ili ti manangaywan iti sirkito a mangasaba kadagiti tiendaan. Idi damo, maamak ti dadduma kadagiti agibumbunannag, ta pulos a dida pay napadasan daytoy; ngem idi agangay kalmado ken kaykayatdan. Iti kurang pay a maysa nga oras, 37 a tattao ti nakasaoda ken 24 a magasin ken 4 a broshur ti naipaimada. Kinuna ti maysa a kabsat nga iti gagangay a binulan a trabaho a panagbalaybalay, saan unay nga adu dagiti tao a makasaoda no maidilig iti panangasabada kadagiti tiendaan iti dayta ababa laeng a tiempo.
27 Panangpatanor Kadagiti Gundaway a Mangasaba: Saan nga impamaysa ni Jesus ti panangasabana kadagiti pormal a kasasaad. Inrakurakna ti naimbag a damag iti amin a maitutop a gundaway. (Mat. 9:9; Luc. 19:1-10; Juan 4:6-15) Imutektekanyo no kasano ti panangpatanor dagiti dadduma nga agibumbunannag kadagiti gundaway a mangasaba.
28 Inruam dagiti dadduma ti mangasaba kadagiti nagannak nga agur-uray iti annakda iti asideg ti pagserkan ti eskuelaan. Tangay sumangpet dagiti nagannak iti 20 minuto a nasapsapa, adda tiempo a makisarita kadakuada maipapan iti Nainkasuratan a topiko.
29 Adu a payunir ti maseknan a mangdanon kadagiti tattao a nalabit interesado iti partikular a suheto nga adda kadagiti magasintayo. Kas pagarigan, nasayaat ti resulta ti isasarungkar ti maysa a kabsat a babai kadagiti innem nga eskuelaan iti teritoria ti kongregasionna iti panangusarna iti serye a “Krisis Kadagiti Eskuelaan,” a nagparang iti Disiembre 22, 1995, Agriingkayo! Napan met kadagiti family-care service a nagiwaras kadagiti magasin maipapan iti biag ti pamilia ken panangabuso iti ubing ket naawis nga agsubli a mangyeg kadagiti masanguanan a ruar a naglaon kadagiti umasping a topiko. Iti maysa nga opisina a mangtamtaming kadagiti awan panggedanna, nadeskribir kas “makarimbaw” ti panangawatda iti Marso 8, 1996 nga Agriingkayo! maipapan iti kaawan ti panggedan.
30 Inreport ti maysa a manangaywan iti distrito nga ugalida nga agassawa ti mangasaba a di pormal bayat nga aggatgatangda. Aggatangda iti tiempo ti aldaw a saan nga adu unay ti tao iti paglakuan, ken saan nga agap-apura dagiti aggatgatang. Adu a naimbag a saritaan ti impadamagda.
31 Adu nga agibumbunannag ti nangipadamag a nasayaat ti resulta ti panangasabada kadagiti tattao iti publiko a paglabaan. Saanda a basta mangibati kadagiti magasin no awan ti agpalaba. Ti kalatda isu ti panangidanon iti naimbag a damag kadagiti tattao, gapuna nga ikagumaanda ti makisao kadagidiay mangus-usar iti pasilidad.
32 Iti dadduma a lugar, napalubosan dagiti napili nga agibumbunannag a mangasaba kadagiti eropuerto. Makasabaanda no dadduma dagiti biahero a naggapu kadagiti pagilian a manmano dagiti Saksi ni Jehova. No makasarakda iti interesado, mangitukonda iti tract wenno kadagiti magasin.
33 No saanda a mapalubosan a mangasaba a personal kadagiti agnanaed iti nainget ti pannakaguardiana nga apartment iti teritoria ti kongregasion, dagiti dadduma sitataktika a kasabaanda dagiti guardia a nakapuesto wenno dagiti manedyer kadagiti opisina. Kasta met laeng ti ar-aramidenda kadagiti pribado a komunidad a maiparit iti publiko ti sumrek. Sinarungkaran ti maysa a manangaywan iti sirikito ken ti sumagmamano nga agibumbunannag ti pito nga apartment complex iti kastoy a wagas. Iti tunggal apartment, imbagada iti manedyer a nupay saanda a mapalubosan a sumarungkar kadagiti apartment iti gagangay a wagas, saanda a kayat a malabsanna ti impormasion kadagiti kaudian a pagiwarnak. Siraragsak dagiti manedyer kadagiti pito a pasdek a nangala kadagiti magasin ket kiniddawda pay dagiti sumaruno a ruar! Nakasaoda dagiti agindeg iti kakasta a pasdek babaen ti telepono.
34 Ikagumaanyo ti Mangasaba iti Uray Sadinoman: Ti panagbiag a maitunos iti dedikasiontayo ramanenna ti pannakarikna iti kinaganat maipapan iti annongentayo a mangikasaba iti mensahe ti Pagarian. Tapno madanontayo dagiti tattao iti tiempo a kombeniente kadakuada, saan koma a ti kaykayattayo ti mapaturay ‘tapno iti amin a pamay-an maisalakantayo ti sumagmamano.’ Kayat dagiti amin a dedikado nga adipen ni Jehova a maikuna, ti kas iti kinuna ni apostol Pablo: “Aramidek ti isuamin a bambanag maipagapu iti naimbag a damag, tapno agbalinak a manangiranud iti dayta kadagiti sabsabali.”—1 Cor. 9:22, 23.
35 Innayon ni Pablo nga insurat: “Siraragsak unay, ngarud, nga agpasindayagak pay ketdi no maipapan kadagiti kinakapuyko, tapno ti pannakabalin ni Kristo agtalinaed koma kaniak a kas iti maysa a tolda. . . . Ta inton nakapuyak, iti kasta nabilegak.” (2 Cor. 12:9, 10) Iti sabali a pannao, awan kadatayo ti makaibanag iti daytoy a trabaho iti bukodtayo a pigsa. Masapul nga agkararagtayo ken Jehova a dumawat iti nabileg a nasantuan nga espirituna. No agkararagtayo iti Dios a dumawat iti pigsa, makapagtalektayo a sungbatanna dagiti kararagtayo. Iti kasta ti ayattayo kadagiti tattao tignayennatayo a mangsapul iti gundaway a mangikasaba iti naimbag a damag kadakuada, iti sadinoman a pakasarakan kadakuada. Iti umay a lawas, apay a dikay padasen ti maysa kadagiti singasing a nadakamat iti daytoy a suplemento?