Panagrag-o iti Irarang-ay nga Ipaay ti Dios

¹ Dagiti Kristiano idi umuna a siglo ket naregtada a manangaskasaba iti Pagarian. Nagrag-oda idi a ‘dagiti kongregasion immaduda iti bilang iti inaldaw-aldaw.’ (Ara. 16:5) Nagsaknap ti natured a panangasabada iti Asia, Europa, ken Africa, a nagresulta iti nawadwad nga apit dagiti manamati.

² Impadto ni Jesus nga iti maudi nga al-aldaw, dumanon ti trabaho a panangasaba iti ‘amin a mapagnaedan a daga ken iti amin a nasion’! (Mat. 24:14) Bayat ti 1996 a tawen ti serbisio, nagtultuloy a nakaawattayo kadagiti report maipapan kadagiti nakaskasdaaw nga irarang-ay ken baro a kangatuan a bilang dagiti agibumbunannag kadagiti pagilian iti aglawlaw ti globo. Adu a kongregasion ti mabuangbuangay. Gapu iti daytoy napardas nga irarang-ay, kasapulan a mabangon dagiti ginasut a baro a Kingdom Hall ken Assembly Hall ken mapalawa ti sumagmamano a pasilidad dagiti sanga.

³ Inreport ti Agosto 1996 a Ti Ministeriotayo iti Pagarian ti nasaknap a trabaho a panagibangon a maar-aramid idiay Africa. Kasta met laeng ti maar-aramid idiay Latin America. Iti 1996 a tawen ti serbisio, nagreport ti Mexico iti nakaskasdaaw a kangatuan a bilang dagiti agibumbunannag nga 470,098 ken iti promedio nga 600,751 a panagadal iti Biblia, isu a kasapulan ti mangbuangay iti 466 a baro a kongregasion! Ti pannakapalawa dagiti pasilidad ti sangada ket nakaeskediul a malpas iti arinunos ti 1998. Gapu iti umasping nga irarang-ay iti adu a dadduma pay a pagilian, awan sarday dagiti nagduduma a kita ti nateokratikuan a proyekto a panagibagon.

⁴ Iti uray sadinoman, dakkel ti magasto iti panagibangon, ket dagiti kakabsattayo iti adu a pagilian bassit laeng ti maitulongda iti material. Nupay kasta, gapu iti kasta unay a regtada nga agserserbi ken Jehova, rumangrang-ayda iti naespirituan ken umad-aduda. Ipanamnama kadatayo ti Proverbio 28:27 a “ti mangted iti napanglaw dinto makurangan.” Ti kinatuloktayo a tumulong a mangsulnit iti kasapulan dagitoy a kakabsat agraman iti dadduma pay a gastos iti panagbangon ket agresulta iti “panamagpapada” kadagiti material a banag, a pakasagrapan ti amin iti ragsak nga aggubuay iti panangted ken ti rag-o nga agtaud iti pannakakita iti irarang-ay nga ipaay ni Jehova!—2 Cor. 8:14, 15; Ara. 20:35.

[Ladawan iti panid 4, 5]

Sanga iti Paraguay

[Ladawan iti panid 4]

Sanga iti Ecuador

[Ladawan iti panid 4, 5]

Ekstension iti Mexico a Madama a Mabangbangon

[Ladawan iti panid 4, 5]

Sanga iti Dominican Republic

[Ladawan iti panid 4]

Sanga iti Brazil Agraman ti Ekstension

[Ladawan iti panid 4, 5]

Sanga iti Uruguay a Madama a Mabangbangon

[Ladawan iti panid 5]

Dagiti gagangay a bassit ti pondona a Kingdom Hall idiay Latin America

1. Brazil

2. Nicaragua

3. Chile

4. Colombia

5. Mexico

6. Brazil

7. Peru

8. Venezuela

9. Mexico