Saludsod
◼ Apay a masapul nga ireporttayo a masapa ti nagapuanantayo iti tay-ak ti serbisio iti kada bulan?
Maragsakantay amin no makadamagtayo kadagiti naimbag a bambanag a magapgapuanan iti panangikasaba iti mensahe ti Pagarian. (Kitaenyo ti Proverbio 25:25.) Ipadamag ti Aramid 2:41 a kasaruno ti diskurso ni Pedro iti aldaw ti Pentecostes, “nainayon ti agarup tallo ribu a kararua.” Di nagbayag kalpasanna, immadu dayta a bilang iti “agarup lima ribu.” (Ara. 4:4) Anian a makaparag-o dagitoy a report kadagiti Kristiano idi umuna a siglo! Kadagitoy nga aldaw maragsakantayo met a makangngeg kadagiti report maipapan iti balligi a sagsagrapen dagiti kakabsattayo iti panangikasaba iti naimbag a damag iti sangalubongan.
Tangay adu a tiempo ken trabaho ti nairaman iti pananggupgop kadagita a report, nasken ti kooperasion ti tunggal agibumbunannag iti Pagarian. Sipapanunotkay kadi a mangyawat a nasapa iti reportyo iti kada bulan?
Pagrag-oantay unay dagiti report maipapan iti panagrang-ay. Mainayon pay, makatulong dagiti report iti Sosiedad a mangkita iti panagdur-as ti sangalubongan a trabaho. Kasapulan nga ikeddeng no sadino a kasapulan ti ad-adu pay a tulong wenno no ania a kita ti literatura ti kasapulan a patauden ken no kasano kaadu. Usaren dagiti panglakayen iti kada kongregasion dagiti report iti panagserbi iti tay-ak a mangikeddeng no ania ti mabalin pay a parang-ayen. Makapabileg dagiti nasayaat a report, a manggutugot kadatayo amin a mangsukimat iti ministeriotayo tapno maparang-aytayo pay.
Kasapulan a mabigbig dagiti amin nga agibumbunannag ti rebbengenda a mangyawat a nasapa iti reportda iti tay-ak ti serbisio iti kada bulan. Dagiti konduktor ti Panagadal ti Kongregasion iti Libro addada iti nasayaat a posision a mangipalagip kadagiti agibumbunannag iti daytoy a rebbengen. Mabalinda nga ipalagip daytoy iti maudi a panagadal iti libro iti kada bulan. No awan ti gundaway a mangyawat kadagiti report iti tay-ak ti serbisio idiay Kingdom Hall, mabalin a kolektaen ida ti konduktor iti Panagadal ti Kongregasion iti Libro ket siertuenna a maitedda iti sekretario iti naikeddeng a tiempo tapno mairaman iti regular a binulan a report ti kongregasion iti Sosiedad.
Ti kinapasnektayo iti simamatalek a panangireport a nasapa iti nagapuanantayo iti tay-ak ti serbisio palag-anenna ti awit dagidiay addaan responsabilidad a mangasikaso iti naespirituan a pagsayaatantayo.