Ti Memorial—Maysa a Nagpateg nga Okasion!
1 Iti Domingo, Marso 23, kalpasan ti ilelennek ti init, selebrarantayto ti Panglaglagip iti ipapatay ni Kristo. (Luc. 22:19) Pudno a maysa daytoy a nagpateg nga okasion! Babaen ti panangsalimetmetna ti kinatarnawna ken Jehova agingga ken patay, pinaneknekan ni Jesus a masalimetmetan ti tao ti naan-anay a nadiosan a debosion uray iti sidong ti nakaro a rigat, iti kasta intandudona ti kinalinteg ti kinasoberano ni Jehova. (Heb. 5:8) Kanayonanna, impaay ti ipapatay ni Kristo ti perpekto a natauan a daton a kasapulan tapno masubbot ti sangatauan, iti kasta agbiag nga agnanayon dagidiay mamati! (Juan 3:16) Iti itatabunotayo iti Memorial, maipakitatayo ti naimpusuan a panangapresiar agpadpada iti ayat ni Jehova ken iti sakripisio ni Jesus maipuon kadatayo.
2 Maparegta ti amin a mangsurot iti programa a panagbasa iti Biblia a nakaeskediul iti Marso 18-23, kas naipakita iti 1997 Calendar of Jehovah’s Witnesses. Kasta met, ti sangapamiliaan a panangusig iti kapitulo 112-16 ti libro a Ti Katan-okan a Tao a Nagbiag Pay Laeng tumulong a mangipamaysa iti atensiontayo iti kapatgan a lawas iti pakasaritaan ti tao.
3 Kabaelanyo kadi ti mangbusbos iti ad-adu a tiempo iti tay-ak ti ministerio iti panawen ti Memorial? Maikanatad nga iyurnos ti kongregasion ti ad-adu a panangasaba kadagiti aldaw kasakbayan ken kalpasan ti Memorial. Adu nga agibumbunannag ti manggundaway a naan-anay iti lima a ngudo ti lawas iti Marso tapno makapagserbida kas auxiliary pioneer. Apay a dikay danggayan ida? Mabalintay amin ti makiraman a naan-anay a mangipaganetget iti kinapateg ti itatabuno iti Memorial. Tangay maipatang dayta iti Domingo, nalaklakanto a makatabuno dagiti adu. Siguraduenyo nga awisen dagiti amin nga agad-adal iti Biblia ken dadduma pay nga interesado a tumabuno. Ibasayo kadakuada ti naikuna iti panid 127, parapo 18, iti libro a Pannakaammo maipanggep iti maysa a naisangsangayan nga aldaw ti tawen a laglagipen.
4 Agplano koma a nasaksakbay dagiti panglakayen tapno masigurado a nadalimanek ken nadalus ti Kingdom Hall. Adda koma matudingan a manggun-od kadagiti emblema. Maorganisar koma a naimbag ti pannakaiserbi dagiti emblema. Naipaay iti Pagwanawanan nga Agosto 15, 1985, panid 19, dagiti makatulong a singasing no kasanotay a maipakita ti panagraem iti Pangrabii ti Apo.
5 Tabunuanyo daytoy kapatgan nga okasion iti 1997 a buyogen ti nauneg a panangapresiar iti amin a kaipapanan kadatayo ti ipapatay ni Jesus. Addakayto koma iti rabii ti Marso 23, inton simamatalek a selebraran dagiti pudno a Kristiano iti sadinoman a lugar ti Memorial.