‘Bangonem ti Sangakabbalayam’
1 Di pagduaduaan, agrakrakaya ti biag ti pamilia iti amin a paset ti daga. Nailumlom ti lubong ni Satanas iti allilaw ken imoralidad. (1 Juan 5:19) Ipaganetget daytoy kadatayo ti kinaganat ti ‘panangbangon iti sangakabbalayantayo’ ken panangisuro kadagiti sabsabali no kasanoda a maaramid met dayta.—Prov. 24:3, 27.
2 Mangsaluad Dagiti Prinsipio ti Biblia: Masarakan ti sekreto ti pudno a kinaragsak iti pamilia no iyaplikar dagiti prinsipio ti Biblia. Makagunggona dagitoy a kinapudno iti tunggal miembro ti sangakabbalayan. Masagrap ti pamilia a mangyaplikar kadagitoy ti nadiosan a talna ken kinaragsak.—Idiligyo ti Isaias 32:17, 18.
3 Nailawlawag dagiti prinsipio a tumulong kadatayo a mangbangon iti sangakabbalayantayo iti baro a libro a Ti Sekreto ti Kinaragsak iti Pamilia. Iti ngudo ti tunggal kapitulo, adda pangisuro a kahon a mangipaganetget kadagiti prinsipio a masapul a laglagipen dagiti miembro ti pamilia. Mangrugi ti kaaduan kadagitoy a kahon iti saludsod a, “Kasano a makatulong dagitoy a prinsipio ti Biblia . . . ?” Tumulong daytoy kadatayo a mangipamaysa iti kapanunotan ti Dios iti suheto a mapagsasaritaan.—Isa. 48:17.
4 Ammuenyo a naimbag ti linaon ti libro. Sursuruenyo a biroken dagiti prinsipio a makatulong no tumaud dagiti nadumaduma a parikut. Ilawlawag ti libro dagiti banag a kas kadagitoy: ania ti rebbeng a sapulen ti maysa iti tao a panggepna a pakiasawaan (kapitulo 2), ania dagiti napateg a tulbek a manglukat iti ruangan nga agturong iti manayon a kinaragsak ti agassawa (kapitulo 3), kasano a mapadakkel ti nagannak dagiti agtutubo nga annakda tapno agbalinda a responsable nga adulto (kapitulo 6), kasano a masalakniban ti pamilia manipud kadagiti makadadael nga impluensia (kapitulo 8), dagiti prinsipio a tumulong kadagiti pamilia nga addaan agsolsolo a nagannak (kapitulo 9), naespirituan a tulong para kadagiti pamilia a rirriribuken ti alkoholismo ken kinaranggas (kapitulo 12), ania ti aramiden no dandanin magsat ti singgalut ti panagasawa (kapitulo 13), ania ti mabalin nga aramiden tapno mapadayawan dagiti lallakay ken babbaketen a nagannak (kapitulo 15), ken kasano a masigurado ti manayon a masakbayan ti pamilia (kapitulo 16).
5 Usarenyo a Naan-anay ti Baro a Libro: No diyo pay inaramid, apay a dikay pagadalan a sangapamiliaan ti libro a Kinaragsak iti Pamilia? Kasta met, no maipasango ti pamiliayo kadagiti baro a parikut wenno karit, repasuenyo dagiti kapitulo iti libro a mangilawlawag kadagitoy, ken nainkararagan nga usigenyo no kasano nga iyaplikar ti balakad. Mainayon pay, iti Marso, mangyeskediulkayo iti ad-adu a tiempo iti tay-ak ti ministerio tapno adu ti mapaimaanyo iti Ti Sekreto ti Kinaragsak iti Pamilia.
6 Dagiti pamilia nga agbiag a buyogen ti nadiosan a debosion tumibkerda iti naespirituan ken nagkaykaysa ken nakasaganada a naimbag a mangsaranget iti iraraut ni Satanas. (1 Tim. 4:7, 8; 1 Ped. 5:8, 9) Anian a yamantayo ta addaantayo iti nadibinuan a pannursuro a naggapu iti Namunganay iti pamilia!