Mangpili Kadagiti Artikulo a Mangtukay Kadagiti Espesipiko a Paginteresan ti Tattao
1 Kas kadagiti pumapana a siaannad a mangisirig kadagiti panada, adu ti agibumbunannag ken payunir iti kongregasion a mangtagtagiragsak iti nagsayaat a balligi babaen ti panangusar kadagiti napili a ruar Ti Pagwanawanan ken Agriingkayo! a mangtukay kadagiti espesipiko a paginteresan dagiti tattao iti teritoriada. Ammuenda no siasino dagiti nangnangruna a maragsakan a mangbasa kadagiti espesipiko a ruar dagiti magasin. Kasanoda nga aramiden daytoy?
2 Umuna, basaenda ti intero a magasin. Kalpasanna, iyimtuodda iti bagbagida, Siasino ti aginteres iti kada artikulo? Kalpasanna pagreggetanda a sarungkaran dagiti tattao a nalabit interesado a mangbasa iti dayta a ruar ti magasin. No adda partikular a ruar a namnamaenda a nalaka nga ipaima iti teritoriada, mangalada iti ad-adu.
3 Mararaem Unay Dagiti Magasintayo: Maysa kadagiti suskritortayo nga agtartrabaho iti kalatakan nga internasional a magasin idiay Nigeria kinunana maipapan iti Agriingkayo!: “Makablaawankayo gapu iti kasayaatan a pangpubliko a magasin iti intero a lubong.” Kinuna ti maysa a napasnek nga agbasbasa kadagiti magasintayo: “Anian a nakaskasdaaw a saniata ti di magatadan a sirib! Gistay awan tema a diak paginteresan a naisalaysay kadagiti panid ti maysa kadagitoy [a warnakan].”
4 Adu a tema ti saklawen dagiti magasin, a pakairamanan ti Biblia, paspasamak iti lubong, dagiti pakaseknan ti pamilia, parparikut iti kagimongan, historia, siensia, biag ti animal ken mulmula, kas panangdakamat laeng iti sumagmamano. Sigurado a kaykayat ti tao a basaen ti maysa a banag no adda pakainaiganna kadagiti kasapulan, kasasaad, wenno propesionna. Yantangay nagduduma a tattao ti makasaritatayo, a tunggal maysa ti addaan kadagiti bukodda a partikular a paginteresan ken parikut, epektibo unay ti panangpili kadagiti espesipiko nga artikulo a magustuan dagiti tattao a makasaritatayo.
5 Kitaenyo ti napasamak idi intukon ti dua a Saksi ti Setiembre 8, 1996 a ruar ti Agriingkayo! iti kolumnista ti maysa a pagiwarnak. Insuratna: “Sakbay a maibagak a saanak nga interesado, kinuna ti maysa kadakuada: ‘Adda artikulo maipapan kadagiti American Indian. Ammomi nga adun ti insursuratyo maipapan iti daytoy a tema.’” Innalana ti magasin sa, kabayatan ti pamigat, binasana ti material maipapan kadagiti Indian, kalpasanna binigbigna nga “ekselente dayta” ken “naan-anay a mapagtalkan.”
6 Aniat’ Paginteresan Dagiti Tattao iti Teritoriayo? Aniat’ nakitayo kadagiti magasin iti kallabes a bulbulan a mabalin a makaguyugoy kadagiti aglaklako ken kadagiti propesional iti teritoriayo wenno kadagiti kaarruba, katrabahuan, ken kaeskuelaanyo? Aniat’ partikular a paginteresan dagiti abogado, edukador, mammagbaga iti pamilia ken iti eskuelaan, mammagbaga kadagiti agtutubo, dagiti mangipapaay iti serbisio sosial, ken dagiti mangngagas? Ti panangpampanunot kadagiti tattao a kasabaanyo bayat nga usigenyo ti kada magasin ipaayannakayo kadagiti nagsayaat a wagas tapno maisaknapyo ti sao ti kinapudno.
7 No makasarakkayo iti mangipakita iti naisangsangayan nga interes iti maysa nga artikulo ti Pagwanawanan wenno Agriingkayo! ket alaenna ti magasin, mabalinyo a kunaen: “Inton adda artikulo kadagiti sumaganad a ruar ti magasin a pagarupek a paginteresanyo met, maragsakanakto a mangyeg iti kopiayo.” Mabalinyo nga inayon dayta a tao kadagiti rutayo iti magasin, a kanayon a sublianyo tapno ipaayanyo kadagiti baro a magasin. Umasping dayta iti dati a maar-aramid no agkidkiddawtay iti pammalubos a sumarungkar kadagidiay nangnangruna nga interesado kadagiti dadduma nga artikulo nga agparang kadagiti magasintayo.
8 Maaddaan iti Naespirituan a Panggep: Sumagmamano a tawenen ti napalabas, nangala ti maysa nga edukado a lalaki iti magasin nga Agriingkayo! gapu iti tema a naginteresanna. Nupay kasta, binasa met daytoy a relihioso a tao ti naipakuyog a ruar Ti Pagwanawanan, a naglaon iti artikulo a nangtignay kenkuana a mangusig iti namulagatanna a pammati iti Trinidad. Innem a bulan kalpasanna, nabautisaran! Gapuna, dikay bumdeng a mangiserrek iti Nainkasuratan a saritaan kadagiti agbasbasa iti magasintayo. Mabalinyo nga ipakita ti broshur nga Ania ti Kalikaguman ti Dios Kadatayo? ket ibagayo a pagsaritaanyo iti sumagmamano laeng a minuto ti maysa a leksion iti kada isasarungkaryo a mangitugotkay kadagiti baro a magasin.
9 Panunotenyo a naimbag no siasino kadagiti sarsarungkaranyo ken kanegosioyo ti nalabit maragsakan a maaddaan kadagiti agdama a ruar Ti Pagwanawanan ken Agriingkayo! Kalpasanna pagreggetanyo ti sumarungkar kadakuada. Ikagumaanyo koma nga iburay dagitoy a napateg a warnakan kadagiti adu a tattao. Ket diyo pulos liplipatan a bayat nga ikagumaanyo a tulongan ti ad-adu a tattao a mangbasa kadagiti magasintayo, ‘ipalpalladawyo ti tinapayyo iti rabaw dagiti dandanum.’ Inton agangay, makabirokkayto kadagiti agbalin a padatayo nga adalan.—Ecl. 11:1, 6.