“Kasano a Maaramidak . . . Malaksid no Adda Nangidalan Kaniak?”
1 Idi dinamag ni ebanghelisador a Felipe iti eunuko nga Etiope no matarusanna ti basbasaenna iti Sao ti Dios, simmungbat ti lalaki: “Pudno unay, kasano a maaramidak ti kasta, malaksid no adda nangidalan kaniak?” Siraragsak a tinulongan ni Felipe a mangtarus iti naimbag a damag maipapan ken Jesus, a nagresulta iti dagus a panagpabautisar ti lalaki. (Ara. 8:26-38) Tinungpal ni Felipe ti bilin ni Kristo nga ‘agaramidda kadagiti adalan a tattao iti isuamin a nasnasion, a bautisaran ken isuroda ida.’—Mat. 28:19, 20.
2 Kas ken Felipe, masapul a tungpalentayo ti bilin a panagaramid kadagiti adalan. Nupay kasta, masansan a di makita kadagiti iyad-adalantayo iti Biblia ti kas iti kapartak ti naespirituan nga irarang-ay daydi eunuko nga Etiope. Nasingpet ti panagpuspuso daydi a lalaki, maysa a Judio a proselita nga adun ti ammona iti Kasuratan, ket kasapulanna laengen nga awaten a ni Jesus ti naikari a Mesias. Maysa a karit no dagidiay iyad-adalantayo ket dida kabesado ti Biblia, dati a naallilaw kadagiti palso a sursuro ti relihion, wenno mapadpadagsenanda kadagiti narikut a personal a problema. Aniat’ mamagballigi kadatayo a mangidalan kadagiti iyad-adalantay iti Biblia tapno agdedikar ken agpabautisarda?
3 Ammuenyo Dagiti Naespirituan a Kasapulan Dagiti Iyad-adalanyo iti Biblia: Inlawlawag ti suplemento ti Agosto 1998 a Ministeriotayo iti Pagarian ti mabalin a kaunday ti panangyadaltayo kadagiti tattao, nga usarentay ti broshur a Kalikaguman ken ti libro a Pannakaammo. Kastoy ti instruksion nga impaayna: “Nasken nga itunostayo ti kapartak ti panagadal sigun kadagiti sirkumstansia ken abilidad ti estudiante. . . . Ditay kayat nga isakripisio ti nalawag a panangtarus ti estudiante gapu laeng ta kayattayo a napartak. Kasapulan ti tunggal estudiante ti natibker a pundasion ti kaipaspasdek a pammatina iti Sao ti Dios.” Gapuna, maibalakad a diyo ap-apuraen nga iyadal ti libro a Pannakaammo a pampanunotenyo nga ikagumaanyo nga iringpas dayta iti innem a bulan. Mabalin a kasapulan ti nasursurok ngem innem a bulan tapno matulongan dagiti dadduma nga agprogreso agingga nga agpabautisarda. Bayat a mangyadalkayo iti linawas, mangbusboskayo iti umdas a tiempo a mangtulong iti estudiante a mangtarus ken mangawat iti ad-adalenna manipud iti Sao ti Dios. No dadduma, mabalin a kasapulan ti dua wenno tallo a lawas tapno masaklaw ti maysa a kapitulo iti libro a Pannakaammo. Daytoy ti mangipaay iti tiempo tapno mabasa ken malawlawagan ti adu kadagiti naisitar a kasuratan.—Roma 12:2.
4 Ngem ania ngay no apaman a maileppas ti libro a Pannakaammo, madlawyo a kasapulan pay ti estudiante ti naun-uneg a pannakatarus iti kinapudno wenno saan pay a naan-anay a natignay a mangitandudo iti kinapudno ken mangidedikar ti biagna iti Dios? (1 Cor. 14:20) Ania pay ti maaramidanyo tapno maiwanwanyo iti dalan nga agturong iti biag?—Mat. 7:14.
5 Pennekenyo Dagiti Naespirituan a Kasapulan ti Iyad-adalanyo iti Biblia: No makita a rumangrang-ay ti maysa a tao, nupay nabannayat, ken patpatanorenna ti apresasion iti ad-adalenna, ituloyyo ngarud nga iyadalan iti Biblia iti maikadua a libro no nalpasnan ti broshur a Kalikaguman ken ti libro a Pannakaammo. Nalabit saan a kasapulan a kastoy a kanayon ti aramiden, ngem no kasapulan, ituloyyo ti panagadal iti libro a Ti Pudpudno a Talna, ti libro a Nagkaykaysa iti Panagdayaw, wenno ti libro a Saot’ Dios. Kaaduan nga agibumbunannag addaanda iti personal a kopia dagitoy a libro a mausar no awan dagita iti kongregasion. No kasapulan, mabalin a pediduen dagitoy a libro iti sanga nga opisina. Iti amin a kasasaad, umuna nga adalen ti broshur a Kalikaguman ken ti libro a Pannakaammo. Maibilang ken maireport ti panangyadal iti Biblia, dagiti panagsarungkar, ken ti oras a nausar iti panangituloy iti panagadal, uray no nabautisaranen ti estudiante a dina pay nalpas ti maikadua a libro.
6 Kayat kadi a sawen daytoy a dagidiay nabautisaranen itay nabiit ngem maymaysa a libro ti inadalda ket rumbeng a matulonganda manen a mangadal iti maikadua a libro? Saan a kasta. Nupay kasta, nalabit nagbalinda a di aktibo wenno nalabit saanda a rimmang-ay iti kinapudno, ket mabalin a mariknada a kasapulanda ti personal a tulong tapno ad-adda a mayaplikarda ti kinapudno iti biagda. Makiuman iti manangaywan ti serbisio sakbay nga irugi ti panangyadal manen iti bautisado nga agibumbunannag. Ngem no addada am-ammoyo a nagadal idin iti libro a Pannakaammo ngem dida nakapagdedikar ken dida nabautisaran, mabalin a kayatyo nga ikagumaan nga ammuen no tarigagayanda nga ituloy ti agadal iti Biblia.
7 Maysa a pakakitaan iti Nakristianuan nga ayat ti panangipaay iti nasinged, personal nga atension iti kada interesado a tao a mayadalantayo. Ti panggeptayo ket tapno matulongantay ti estudiante a mangtarus nga ad-adda pay iti kinapudno ti Sao ti Dios. Iti kasta, sierto ken nainsiriban a maitandudona ti kinapudno ket idedikarna ti biagna ken Jehova, nga isimbolona dayta a dedikasion babaen ti bautismo iti danum.—Sal. 40:8; Efe. 3:17-19.
8 Malagipyo kadi ti napasamak idi nabautisaranen ti eunuko nga Etiope? “Sirarag-o a napan a nagtultuloy iti dalanna” kas maysa a baro nga adalan ni Jesu-Kristo. (Ara. 8:39, 40) Sapay koma ta datayo ken dagidiay sibaballigi a maiwanwantayo iti dalan ti kinapudno ti makasagrap iti naindaklan a rag-o iti panagserbi ken Jehova a Dios—itan ken iti agnanayon!