Usarenyo ti Libro nga Agdayawkayo iti Dios iti Panangyadal iti Biblia
Nairanta ti libro nga Agdayawkayo iti Maymaysa a Pudno a Dios a tumulong kadagiti kabbaro a rumang-ay iti kinapudno ken mangparayray iti panangipategda ken ni Jehova ken iti organisasionna. Mabalin nga usaren dayta kadagiti iyad-adalan iti Biblia kas maikadua a maadal a libro. Inlawlawag ti Hunio 2000 a Ti Ministeriotayo iti Pagarian, panid 4: “No nabatad a rumangrang-ay ti maysa a tao, nupay nabannayat, ken apresiarenna ti maad-adalna, ituloyyo ngarud nga iyadalan iti Biblia iti maikadua a libro no nalpasnan ti broshur a Kalikaguman ken ti libro a Pannakaammo. . . . Iti amin a kasasaad, mayadal nga umuna ti broshur a Kalikaguman ken ti libro a Pannakaammo. Maibilang ken maireport ti panangyadal iti Biblia, dagiti panagsarungkar, ken ti oras a nausar iti panangituloy iti panagadal, uray no nabautisaranen ti estudiante a dina pay nalpas ti maikadua a libro.”
Siasino pay ti mabenepisiaran iti panagadal iti Biblia babaen ti libro nga Agdayawkayo iti Dios? Ituloy a kunaen ti isu met laeng nga artikulo: “No addada am-ammoyo a nagadal idin iti [broshur a Kalikaguman ken] libro a Pannakaammo ngem saanda a nagdedikar ken nagpabautisar, mabalin a kayatyo nga ammuen no tarigagayanda nga ituloy ti agadal iti Biblia.” Iti Abril ken Mayo, mangaramidtayo iti naisangsangayan a panagregget a mangirugi kadagiti panangyadal babaen ti libro nga Agdayawkayo iti Dios.