Masapul nga Ulit-ulitentayo ti Mapan
1 Nangipangagkayo aya a dagus iti daydi damo a naikasaba kadakayo ti naimbag a damag? No saan, agyamankayo ta inulit-ulitdakay a kinasabaan dagiti Saksi ni Jehova agingga a kamaudiananna immanamongkayo nga agadal iti Biblia. Nasayaat a panunoten dayta no ulit-ulitenyo a trabahuen ti naituding a teritoriayo.
2 Masansan nga agbaliwbaliw ti panagbiag dagiti tattao. Maipasangoda kadagiti baro a parikut wenno kasasaad, makangngegda kadagiti makaburibor a pasamak iti komunidad wenno iti lubong, aglak-amda iti rigat ti panagbiag, wenno agsakitda wenno adda matay a miembro ti pamiliada. Dagita ti mabalin a mangtignay kadakuada a mangammo iti pakaigapuan dagitoy a pakarigatan. Masapul nga ammuentayo dagiti banag a pakaburiboran dagiti tattao ket kalpasanna mangiburaytayo iti makaliwliwa a mensahe.
3 Panangispal a Trabaho Daytoy: Panunotenyo dagiti tattao nga agisalakan iti lugar ti didigra. Nupay nalabit agsawsawar dagiti dadduma iti maysa a lugar a bassit ti mabirokan a nakalasat, dida agpampamayan ken dida sumardeng gapu laeng ta ad-adu dagiti nakalasat a mabirbirokan dagiti padada nga agisalsalakan iti sabali a lugar. Saan pay a nalpas ti panangispal a trabahotayo. Kada tawen, ginasut a ribu ti mabirbirokan nga agtarigagay a lumasat “iti dakkel a rigat.”—Apoc. 7:9, 14.
4 “Tunggal maysa nga umawag iti nagan ni Jehova maisalakanto.” (Roma 10:13-15) Dagitoy a sasao ti mangipaganetget koma iti tunggal maysa kadatayo ti pateg ti panagtultuloy a mangasaba. Sipud idi damo a mawanas ti teritoriatayo, dimmakkelen dagiti ubbing ken nataengandan nga agpanunot a siseserioso para iti bagbagida maipapan iti masakbayanda ken ti panggep ti biag. Ditay ammo no siasinonto ti dumngeg iti kamaudiananna. (Ecl. 11:6) Adu ti dati a bumusbusor a nangawat iti kinapudno. Ti trabahotayo ket saan a mangukom kadagiti tattao no di ket agtultuloy nga ipaayantay ida iti gundaway a makangngeg ken maisalakan iti daytoy daan a lubong. Kas ti inaramid dagidi nagkauna nga adalan ni Jesus, masapul a ‘mapantayo nga agtultuloy’ kadagiti tattao ken ikagumaantayo a tukayen ti interesda iti mensahe ti Pagarian.—Mat. 10:6, 7.
5 Ebkas ti asi ni Jehova ti kaadda pay laeng ti gundawaytayo a mangasaba. (2 Ped. 3:9) Bayat nga ulit-ulitentayo a kasabaan dagiti sabsabali, itamtampoktayo ti ayat ti Dios, ket iti kastoy a wagas maidaydayawtayo ti Dios.