Dagiti Manangaywan a Mangidadaulo—Ti Konduktor ti Panagadal iti Pagwanawanan
1 Ti Pagwanawanan a Mangibumbunannag iti Pagarian ni Jehova isu ti kangrunaan a probision “ti matalek ken masirib nga adipen” iti pannakaipaay ti naespirituan a taraontayo “iti umiso a tiempo.” (Mat. 24:45) Ti panglakayen a mangidaulo iti Panagadal iti Pagwanawanan ket addaan iti nagpateg a responsabilidad kas makabael a mannursuro a mangipakpakita iti nasayaat nga ehemplo iti Nakristianuan a panagbiag.—Roma 12:7; Sant. 3:1.
2 Tapno epektibo ti panangisuro ti konduktor ti Panagadal iti Pagwanawanan, masapul a pagreggetanna unay ti agsagana iti kada lawas. Aramidenna dayta a buyogen ti kararag ken siaannad. Ti napasnek nga interesna iti kongregasion ket mayanninaw iti napaypayso a panangikagumaanna a mangdanon iti pusotayo babaen iti maad-adal a material. Ipamaysana ti atension kadagiti kangrunaan a punto iti adalen ken tulongannatayo a mangkita no kasano ti pannakainaig dagita iti tema ti artikulo.
3 Karaman iti napasnek a panagsaganana ti panangkitana a nasakbay kadagiti kasuratan tapno maammuanna ti pakayaplikaranda. Itandudona ti Sao ti Dios babaen ti panangparegtana iti kongregasion a mangusar a naimbag iti Biblia kabayatan ti panagadal. No adda napateg a punto a saan a nasaklaw kadagiti komento ti kongregasion wenno dida nakita ti aplikasion ti maysa a nagpateg a kasuratan, mangibangon iti espesipiko a kanayonan a saludsod a mangiruar iti impormasion. Iti kastoy a wagas, tulongannatayo a makagteng iti umiso a konklusion ken mangammo no kasanotay nga iyaplikar ti maadaltayo.
4 Ti konduktor ti Panagadal iti Pagwanawanan in-inutenna nga ikagumaan a parang-ayen ti abilidadna a mangisuro. Saan unay nga adu ti komentona no di ket paregtaennatayo nga agkomento—iti bukodtayo a sasao, ababa, ken direkta iti punto. Nalabit palagipannatayo sagpaminsan a ti damo a mangkomento iti parapo ket mangted koma iti ababa ken direkta a sungbat iti nayimprenta a saludsod. Dagiti kanayonan a komento ti tallaong nalabit iturongda ti atension kadagiti pakayaplikaran ti kasuratan, pangsuporta nga argumento, wenno praktikal nga aplikasion ti material. Iti panangiparegtana iti personal ken sangapamiliaan a panagsagana, ikagumaan ti konduktor ti Panagadal iti Pagwanawanan a gutugoten ti tarigagay ti isuamin a makiraman.
5 Kas tattao a ‘sinursuruan ni Jehova,’ apresiarentayo dagiti “sagut a tattao,” kas kadagiti konduktor ti Panagadal iti Pagwanawanan, nga “agtrabaho a sipipinget iti . . . panangisuro.”—Isa. 54:13; Efe. 4:8, 11; 1 Tim. 5:17.