Petpetan a Siiirut ti Publiko a Panangideklara iti Namnamayo nga Awanan Panagpangpangadua
1 Ti Panagadal ti Pagwanawanan isut’ kangrunaan a pamay-an a ti espiritual a ‘taraon iti umiso a tiempo’ ket maipaay kadagiti tattao ti Dios kadagitoy nga aldaw. (Mat. 24:45) Tumabunotayo nga addaan iti dua a kangrunaan a panggep: Tapno mapabilegtayo iti naespirituan, ken tapno maaramid iti publiko a panangideklara ti namnamatayo iti sabsabali.—Heb. 10:23-25.
2 Pananggunggona iti Bagbagitayo: Napattapatta a kaaduan kadagiti kongregasion ti kakatlo laeng iti timmabuno ti nangadal a nasakbay iti leksion. Agarup a kasta met ti kaadu dagiti agkomkomento. Ti solido a naespirituan a taraon iti Panagadal ti Pagwanawanan ti saan a naan-anay a maawatan bayat iti mismon a gimong. Kasapulanyo nga itiempo ti nasakbay a panagadal iti material.
3 No agsaganakayo iti panagadal, nasayaat no umuna a basaenyo dagiti saludsod iti kahon idiay ngudo ti artikulo. Dagitoy ti mangipamaysa ti asikasoyo kadagiti kangrunaan a puntos a mausig iti leksion.
4 Kabayatan ti panagadal dumngegkayo a siaannad no ania ti maibaga. Imutektekanyo ti panglukat a sasao ti konduktor. Nalabit a mamataud ti tallo wenno uppat a saludsod a masungbatan, wenno irepasona dagiti lawag iti napan a lawas a leksion. No adda panagbalbaliw ti pannakaawat iti padto ti Biblia wenno Nainkasuratan a prinsipio, daytoy ti dakamatenna. Siempre, masapul nga ababa dagiti komento ti konduktor, idinto ta ti panggep iti panagadal isut’ pannangted ti kongregasion iti gundaway a mangiyebkas ti namnamada.
5 Ideklarayo ti Namnamayo: Regularkayo kadi a mangidatag ti komentoyo bayat iti panagadal? Mas kayattayo dagiti ababa, natadem a sasao. (Maidilig iti Lucas 21:1-4.) Ti nalaka a komento manipud iti puso ti patgen dagiti amin. Masansan a ti umuna a komento iti saludsod ti masapul nga ababa ken direkta. Palubosanna daytoy dagiti dadduma a mangdakamat iti maysa a teksto ken mangawis ti asikaso iti detalye idiay parapo. Iti kastoy a wagas adu ti makaideklara iti publiko ti namnamada. Kanayon koma a positibo ken makapabileg dagiti komento.
6 No karrugiyo laeng ti tumabuno wenno agnerbioskayo nga agkomento, nalabit a kayatyo ti agpatulong iti konduktor. Kiddawenyo kenkuana a kumita kadakayo no itayagyo ti imayo iti masinunuo a parapo a masungbatan. Nalabit nga agboluntariokayo a bumasa iti maysa a kasuratan ken iyaplikaryo ti kaipapananna. Agnotarkayo idiay marhin a tumulong kadakayo a manglagip no ania ti kayatyo a sawen. No maysakayo nga agtutubo, laglagipenyo a maipateg dagiti komentoyo.—Mat. 21:16.
7 Nasken nga iyebkas ti pammatitayo, ket ti Panagadal ti Pagwanawanan ti mangted iti oportunidad a mangaramid iti dayta. Ti libro a Qualified to Be Ministers inyebkasna a kastoy: “Aniaman ti problema, parmekenyo dayta ken aramidenyo ti bagiyo a makaited iti uray maysa laeng a sungbat. Makaipaaykayo ti pagimbagan iti gimong, ket nasaysayaat ti riknayo iti dayta.” (Panid 99) Apay ngarud a dikay iplano ti mangted iti uray maysa laeng a komento iti sumaruno a Panagadal ti Pagwanawanan?—Prov. 15:23.